Fundashon pa Konsumidó a sinta na mesa ku FLOW 

Dia 22 di aprel último Fundashon pa Konsumidó a sinta na mesa ku e tim di maneho di e kompania di telekomunikashon FLOW. Motibu di e reunion aki tabata pa papia tokante e puntonan ku a bini dilanti den e karta ku Fundashon pa Konsumidó a manda pa FLOW relashoná ku e kehonan ku komunidat tin tokante nan produkto i servisio. 

Mester bisa ku e kombersashon a kana den bon esfera mirando ku a duna e oportunidat na Fundashon pa Konsumidó trese dilanti tur e puntonan ku na nos pareser mester mehora na bienestar di e konsumidó. Di otro banda e tim di maneho di FLOW  tabata  habri pa skucha. E tim di maneho di FLOW a rekonosé e puntonan aki i ta trahando kaba pa mehorashon. Nan a aseptá ku tin algun punto ku por traha riba dje mes ora.  Mientras tin algun di e puntonan ku mester tòg un tiki mas tempu pa yega na un solushon por ehèmpel e proseso di kambio den FLOW su infrastruktura.  

Flow a kompartí ku ta trahando riba e parti di komunikashon ku nan klientenan di moda ku e kliente ta  mihó informá i konsiente kon pa uza nan produkto i servisio di forma mas efektivo i asina evitá mal komprendementu i desapunto. Tambe FLOW a indiká di ta trahando riba un manera mas strukturá i dirigí pa atendé kehonan di nan klientenan. 

Mas aleu FLOW ta splika ku e subida di tarifa ta resultado di inflashon ku ta tumando lugá rònt mundu i esaki sigur tin impakto riba e kompania tambe. Esaki ta pone ku pa e kompania por sigui drai, e subida di tarifa aki ta inevitabel. 

A yega na e palabrashon ku FLOW lo enfoká riba komunikashon mas efektivo i transparente.. Kehonan ku drenta serka Fundashon pa Konsumidó lo keda atendé di forma direkto i  lo sòru pa pone atenshon dediká pa atendé barionan ku tin kehonan regular o repetitivo. 

E kompania FLOW ta garantisá ku lo bai mira mehorashon den e aspekto di servisio i Fundashon pa Konsumidó lo keda atento pa sigui e desaroyo aki i protehá e derechinan di e konsumidó. 

Pa kualkier pregunta por semper tuma kontakto ku Fundashon pa Konsumidó na 4626666 òf manda nos un email na info@fundashonpakonsumido.org



Leave a Reply