Fundashon pa Konsumidó ta hasi anotashon di preis di tayer

Den kuadro di informá i konsientisá e konsumidó nos a realisá un anotashon di preis di tayer. Esaki sigur lo yuda e konsumidó hasi eskoho mas konsiente na momentu di kumpra tayer. 

E anotashon di preis a tuma lugá den e periodo di 11 te ku 14 di aprel 2024. Fundashon pa Konsumidó a bishitá 6 establesimentu i a anotá preis di tayer ku mas e establesimentu ta bende. E establesimentunan kaminda e anotashon di preis a tuma lugá ta: Señor Barata, Napa, Western Tires,Double R Banden Curacao,Tire Sales & Services Del Caribe i Tire Tire Automotive.

Notabel ta ku den e anotashon di preis aki kada establesimentu su markanan ta diferensiá for di otro, tambe e orígen di kada tayer. Esaki ta pone ku no por hasi un komparashon pero den e kaso aki ta bon pa konsultá e tabèl ku preisnan pa hasi un mihó eskoho. 

A anotá preis di tayer 155/70 R13 t/k 225/60 R18. Siguiente un ehèmpel di numbernan menshoná

  • 155: Ta number di e tayer den mililiter
  • 70: Ta e aspekto duars kòrtá di porsentahe di e hanchura
  • R: E lèter aki ta para pa diameter di e tayer
  • 13: e sifra aki ta para pa grandura di e rim.

Ilustrashon di fecha i kódigo di fábrika: Tur tayer tin un number di departamento di transportashon ariba. Aki por tuma nota fecha ku e tayer a keda trahá. E lastu kuater sifranan ta indiká luna i aña ku a fabriká e tayer. Esei ta nifiká ku tayer tambe tin su fecha di vensementu. No kumpra tayer di mas ku un par di aña bieu.

Por último nos ta kompartí algun tep pa konserva bo tayernan safe: 

  • Kontrolá bo tayer nan por lo ménos un bes pa luna.
  • Pèrkurá pa tayernan ta di pòmp ku e airu ku tin indiká den bo porta di outo. No usa e indikashon di airu ku tin para riba e tayer; esei ta pa e airu máksimo di e tayer.
  • Chek si e tayernan tin sker, kòrtá òf waya ta bula afó. Si esaki ta e kaso, ta rekomendabel pa kambia e tayer.
  • Kontrolá si e tayernan ta gastá (keshi)

Hopi biaha e konsumidó ta skohe pa kumpra un tayer segunda mando pensando ku esaki ta mas kumbiniente. Fundashon pa Konsumidó ta rekomendá pa hasi uso di e tabèl aki pa evitá ku bo ta kumpra un tayer segunda mano na mes un preis ku un nobo.

Pa kualkier pregunta òf remarke semper por tuma kontakto na 462-6666 òf manda nos un mail na info@fundashonpakonsumido.org



Leave a Reply