Merkado mester por ofresé opshonnan mas saludabel pa e persona ku tin diabétis 

E malesanan ku mas ta bini dilanti bou di nos poblashon ta preshon haltu, diabétis i astma (astma i bronchitis). 

Sigun un investigashon hasi na 2017aki na Kòrsou, mas di 10.000 persona  tin e malesa di suku. Esaki ta 8 % di e poblashon adulto. Por tin diferente kousa i por tin diferente tipo di diabétis tambe. Pa Fundashon pa Konsumidó ta importante ku e personanan ku tin diabétis òf kualkier otro malesa, no keda ekskluí na momentu ku ta ofresé un produkto òf servisio.Tambe ta sumamente importante pa e preisnan di produktonan saludabel ta mas rasonabel. Mas ku klaro ku e konsumidó ta keda responsabel na momentu ku e ta hasi su eskoho.

Di otro banda tòg ta bon pa nos para ketu tambe riba loke merkado ta ofresé.  Nos por komprondé ku e establesimentunan prinsipalmente restorantnan ta enfoká mucha mas riba e poblashon general i esaki ta hasi e opshon pa e poblashon ku tin sierto malesa poko mas limitá. Hopi biaha nos ta tuma nota ku ta tene mas kuenta ku e sabor di e alimento òf bebida i esaki ta pone ku nos por pèrdè e aspekto saludabel for di bista. Ta p’esei Fundashon pa Konsumidó ta hasi un yamada na establesimentunan prinsipalmente restorantnan pa mira e poblashon ku diabétis tambe komo un oportunidat den merkado pa ofresé opshonnan muchu mas balansá . Por ehèmpel por trata di traha un menú apart pa e personanan aki i ofresé un variashon di produkto spesial di moda ku un persona ku tin diabétis tambe por hasi un mihó eskoho i kuida su salú. Di e forma aki por hasi e eskoho pa un persona ku tin diabétis muchu mas fásil i e por tene kuenta muchu mas mihó ku su salú. Naturalmente e konsumidó ta keda responsabel pa su salú i kon e ta kuida esaki. 

Inklushon i seguridat pues e konfiansa ku loke ku bo ta kumpra no ta hasi daño na bo salú, ta algun di e derechinan di e konsumidó. Ta p’esei Fundashon pa Konsumidó ta rekomendá e komersiantenan pa pone atenshon na e yamada aki. Pa finalisá nos ta gradesí nos dietista Elise Faries ku resientemente ta kolaborá ku Fundashon pa Konsumidó pa yuda eduká i konsientisá e konsumidó pa biba un bida mas saludabel. Pa kualkier pregunta por tuma kontakto ku Fundashon pa Konsumidó na 462666 òf por  manda nos un e-mail na info@fundashonpakonsumido.org



Leave a Reply