- November 6, 2023
- Posted by: FPK
- Category: Komparashon di preis
Fundashon pa Konsumidó a hasi komparashon di preis di supermerkadonan. Pa e komparashon di preis aki a selektá un kantidat di 135 produkto i a bishitá 21 establesimentu den e temporada di 14 di òktober 2023 te ku 20 di òktober 2023. E supermarket i minimarketnan kaminda e komparashon di preis a tuma lugá ta: supermarket 2000, Arco Iris, Van den Tweel ,Arti’s , Best Buy, Bon Bini supermarket, Boulevard Market Place, Centrum Mahaai i Piscadera, Esperamos supermarket, Carrefoure, Timmy Mangusa Rio Canario i Hypermarket, Vreugdenhil, Minimarket XIN Beaurs, Luna Park, New Plaza/ De Ruyterkade, LI’S, Queens, i Tropicana .
E supermerkadonan ku a resultá ku mas tantu produkto na mihó preis ta: Mangusa Hyper Market ku 39 produkto, Mangusa Rio ku 38 produkto i Centrum Mahaai ku 24 produkto. E supermerkadonan mihó surti a resultá Mangusa Rio ku 114 produkto, Mangusa Hypermarket ku 111 produkto i Centrum Mahaai ku 105 produkto.
Fundashon pa Konsumidó a evaluá e komparashon di preis aki i a tuma nota ku tin diferensia basta grandi den preis entre supermerkadonan i ku hopi di e produktonan aki ta den e makutu regulá pa gobièrnu. Esaki sigur ta algu pa e tim di inspekshon di MEO tene kuenta kuné pa asina hasi e kontrolnan nesesario pa wak si e subida di preis nan aki ta na lugá.
Un ehèmpel di esaki ta hariña di pan Goldmedal(all purpose) 5lbs ku ta kai den makutu básiko tin un diferensia di preis di fl 6,96-, entre supermerkadonan. Na carrefoure e hariña aki ta kosta fl 15,51-, i na Best Buy e ta kosta fl 8,55-, un diferensia fl 6,96-,.Otro ehempel ta macaroni marka Casa Italiana di 1000gr. Esaki ta kosta na Esperamos fl 4.37-, i na Bon Bini fl 7,93-,. Un diferensia di fl 3.56-,.
En bista di e subida di preis ku ta tuma lugá i e diferensia di preis entre establesimentunan nos mester keda mantené nos mes bon informá pa asina kumpra di forma responsabel. Bo por tuma nota di e lista di anotashon di preis riba nos wèpsait www.fundashonpakonsumido.org. Pa kualkier pregunta por tuma kontakto ku nos na 462-6666 òf manda nos un e-mail na info@fundashonpakonsumido.org.Tene na kuenta ku pa e komparashon di preis aki no a tene kuenta ku kalidat di produkto ni pais di importashon.