- September 1, 2023
- Posted by: FPK
- Category: Komparashon di preis
Resientemente Fundashon pa Konsumidó a anotá i kompará preis di produktonan ku mas e konsumidó ta kumpra na e diferente botikanan aki na Kòrsou. Ku esaki nos ke yuda e konsumidó pa hasi su eskoho di forma mas konsiente. Saliendo for di e punto di bista ku mayoria konsumidó ta kumpra nan produktonan di higiena personal den botika, Fundashon pa Konsumidó ta rekomendá pa informá bo mes bon pa por hasi bo kompra di forma responsabel i konsiente.
Nos a bishitá un kantidat di 29 botika den e periodo di 11 pa 19 di ougùstùs 2023. Durante di e bishita aki a anotá preis di un kantidat di 93 produkto repartí den diferente kategoria. E kategorianan aki ta entre otro: awa pa higiena pa boka, pasta di djente, habon pa baña, djèl pa baña kuné, puiru, deodorante, toaya femenino, pomada, krema pa kurpa i produkto pa kabei. A kontrolá tambe palitu pa limpia orea, katuna,‘remover’ pa uña, produktonan di limpiesa pa kara, ‘face maskers’, krema pa feita i tambe ‘splash lotion’.
Pa duna un mihó bista di e resultado nos ta indiká un tòp 3 di e botikanan ku mas tantu produkto na e mihó preis den e grupo di produktonan pre selektá i tambe nos ta indiká un tòp 3 di e botikanan mihó surtí. Pues e botika ku tin mas tantu di e produktonan den e grupo di produkto pre selektá.
Tòp 3 di Botikanan ku e mihó preis
1) Botika Groot Piscadera ku 23 produkto.
2)Botika Cerrito ku un kantidat di 21 produkto.
3)Novo, ku 16 produkto.
Tòp 3 di botikanan mihó surtí
1)Botika Groot Piscadera ku 67 produkto
2)Botika Cerrito ku 65 produkto
3) Botika Mahaai ku 63 produkto.
Diferensia di preis
Durante e anotashon di preis aki, Fundashon pa Konsumidó a nota algun diferensia grandi den preis entre botikanan. Un ehèmpel di esaki ta preis di produktonan Nivea na e diferente botikanan. Un Nivea Verzachtende Tonic na Botika Zuikertuintje ta kosta FL 21,45 siendo na mayoria botika e produkto aki ta kosta apénas FL 6,45. Esaki ta un diferensia di FL14,50. Un otro ehèmpel: Nivea Verfrissende Tonic ta kosta FL 23,16 na Botika Sorsaka pero na otro botikanan e konsumidó por kumpr’é pa FL 12,95. Esaki ta un diferensia di FL10,21. Aki por ta trata di pais di importashon di e produkto ku por ta hunga un ròl den e diferensia grandi di preis. Ta p’esei ta importante pa abo konsumidó konsultá e lista di komparashon di preis aki pa asina tòg por hasi un eskoho responsabel.
Pa un bista mas amplio riba e lista di komparashon di preis di produktonan di botika i otro informashonnan relashoná ku derechinan di konsumidó nos ta invitábo bishitá nos wèpsait www.fundashonpakonsumido.org . Tambe bo por hasi petishon pa e lista via di nos e-mail info@fundashonpakonsumido.org òf bèl nos na 462-6666.