Anotashon di preis di material pa skol

Falta poko pa “Back to School” I manera ta e kustumber Fundashon pa Konsumidó den kolaborashon ku Ministerio di Desaroyo Ekonómiko ta publiká e preisnan di e diferente establesimentunan ku ta ofresé material pa skol pa asina mayornan por tin un mihó bista unda ta kumbiní pa kumpra. Den e periodo di 12 pa 19 di yüli 2023 a hasi bishita na un total di 16 establesimentu i a anotá e preisnan di mas barata optenibel na kada establesimentu. E establesimentunan ku a forma parti di e anotashon di preis aki ta:

Office Stop, La Curaçao Zeelandia, Curaçao Office Supply, Mensing’s Caminada, Multi Centrum 2000,  Super Barata, Bruna, Office System, Casa Cesar, Home Plus Sta Maria, Samsom ,Martis Agencies, Alankar , Señor Barata, Building Depot i Good Friends.

Pa fasilitá e proseso di ehekushon, Fundashon pa Konsumidó a skohe e 63 artíkulonan di skol mas usá i kolaboradónan di Ministerio di Desaroyo Ekonómiko (MEO) a anotá e preis mas barata na tur e establesimentunan. Mester enfatisá ku preisnan di artíkulonan pa skol no ta kai bou di un preis máksimo stipulá pa gobièrnu di Kòrsou, kual ta pone ku kada negoshante ta liber pa pone su mes preis. Den e anotashon di preis aki no a hasi komparashon di e kalidat di artíkulonan. 

Top 3 Mihó surtí for di lista pre selekta 

1-Bruna ku 50 artikulo

2- Samsom i Casa Cesar ku  49 artikulo

3- Home Plus Sta Maria ku 48 artikulo 

Remarke;

Tur establesimentunan di Samson ta mantene mesun preis.

Mester  tene kuenta ku marka i preis, dor ku artikulonan ta bini for di diferente destinashon.

Preisnan variá

Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Tur e variashon di markanan aki ta brinda e posibilidat pa konsumidónan por hasi nan eskoho konsientemente. 

Fundashon pa Konsumidó ta invitá bo pa tira un bista riba nos website www.fundashonpakonsumido.org  pa e lista amplio di preis i artíkulo. Kòrda sigui nos página di Facebook Fundashon pa Konsumidó i pa kualkier pregunta por tuma kontakto na 4626666. Pa finalisá Fundashon pa Konsumidó ta deseá tur alumno for di awor un felis komienso di aña eskolar nobo.