Komparashon di preis di karni, belèg, fruta i berdura

Fundashon pa Konsumidó ta hasi komparashon di preis den e kategoria aki pa asina e konsumidó ta bon informá unda ta kumbiní pa kumpra. 

E meta prinsipal di e komparashon di preis ku fundashon pa konsumidó ta hasi ta pa e konsumidó por tin un mihó bista di e diferensia di preisnan na e diferente establesimentunan i asina hasi un mihó eskoho na momento di hasi kompras. 

E komparashon di preis a tuma lugá durante di 16 di mei pa 24 di mei 2023. A hasi anotashon di 100 produkto na 21 diferente establesimentu. Nos ta rekomendá pa tuma nota di e lista aki riba nos wèpsait www.fundashonpakonsumido.org kaminda bo ta mira tur establesimentu i e lista amplio di produkto i kada unu su preis. Asina bo mes por hasi bo komparashon i traha bo lista adelantá i asina skohe na unda ta kumbiní abo pa kumpra. Na momento ku bo konsulta e lista aki tuma bon nota di e diferensia grandi den preis di sierto produktonan. Por ehèmpel den e kategoria di karni por a nota un diferensia grandi den preis di for di 3 florin te ku 13,90 florin. Por ehèmpel un kilo di karni mulá na Vreugdenhil ta kosta 10,55 florin i na Carre Four esaki ta kosta 24,45 florin. Den kategoria di belèg tambe nos a nota algun diferensia manera por ehèmpel 1 kilo di wòrs dushi na Ruyter Plaza ta kosta 45,95 florin i na Centrum Mahaai i Piscadera e ta kosta 28,27 florin. Esaki ta un diferensia di 17,68 florin. 

Por último nos kier mustra otro ehèmpel di diferensia di preis grandi. Esaki ta den e kategoria di berdura. Na Esperamos Supermarket por ehèmpel bo por nota preis pa Broccoli ta 9,55 florin i na Li’s esaki ta kosta 20,95 florin. Pues un diferensia di 11,40. Na Centrum Mahaai i Piscadera Prei ta kosta 6,80 florin i na Best Buy esaki ta kosta 19,65 ku ta un diferensia di 12,85 florin. 

Den e komparashon di preis di Karni, Belèg, Fruta i Berdura aki Centrum Mahaai i Piscadera ta resultá e establesimentu ku mas produkto na mihó preis i esaki ta ku 24 produkto.  Bon Bini Supermarket ta mihó surtí ku un total di 80 produkto. 

Durante di e komparashon di preis aki no a tene kuenta ku kalidat ni pais di importashon. Pa kualkier pregunta por semper tuma kontakto ku nos na 462666 òf manda nos un e-mail na info@fundashonpakonsumido.org. Kòrda sigui nos página di Face Book pa bo no pèrdè niun informashon.