Komparashon di preis Material pa Konstrukshon

Dia 1 di yüni 2023 te ku 30 di novèmber 2023 ta temporada di orkan . Den kuadro di esaki Fundashon pa Konsumidó ta para ketu na e importansia pa e konsumidó ta bon prepará. 

Sigurá bo kas, drecha dak, drecha zink i bentananan los tambe ta parti importante di e preparashon aki. Ta p’esei nos di Fundashon pa Konsumidó ta haña importante pa duna e konsumidó un bista unda ta kumbiní mas pa kumpra materialnan pa konstrukshon. E komparashon di preis di un total di 153 produkto a keda hasí di 3 pa 15 di mei 2023 na 6 establesimentu ku ta ofresé material pa Konstrukshon. E establesimentunan ku a partisipá ta Kooyman , Gomez Enterprises, Dijtham, Fereteria Skèrpènè, Building Depot i Staal Antillen.

Ta importante pa remarká ku Staal Antillen ta indiká ku kalidat di su materialnan ta europeo. Tambe ta bon pa splika ku no ta tur establesimentu tin tur material. Ta p’esei no por kompará preis den tur kategoria. Segun komparashon general Building Depot a resultá di tin mayoria di e materialnan ku nos a anotá na mihó preis ku 67 material. Kooyman ta e establesimentu ku ta mihó surti ku 110. 

Den e temporada di mal tempu hopi biaha ta rekomendá pa drecha bo dak i check zinkplaat ku ta lòs. Si bo ta buskando eternit por ehèmpel, Gomez Enterprise tin e mihó preis den e kategoria aki. Si nos tira un bista riba e preisnan di zinkplaat i diferente tipo di palu, Building Depot tin e mihó preis den e kategoria aki. 

Fundashon pa Konsumidó ta rekomendá e konsumidó pa konsultá e lista aki sigur na momento ku bo ta traha bo lista segun bo nesesidat i asina di forma responsabel bo kumpra materialnan pa drecha bo kas. Kòrda check nos website pa tira un bista amplio riba e lista i tambe check nos guia pa kalamidat. Pa kualkier informashon por tuma kontakto na 4626666 òf manda nos un e-mail na info@fundashonpakonsumido.org. 

E komparashon di preis aki no a tene kuenta ku pais di importashon ni kalidat di produkto.