Diferensia drástiko den preis di piska

Temporada di kuaresma I spesialmente den siman santu nos pueblo tin e kustumber di kushiná kuminda di laman. Ta p’esei nos di Fundashon pa konsumidó ta haña importante pa hasi komparashon di preis i informá e konsumidó na unda ta kumbiní mas pa kumpra. 

E anotashon di preis aki a tuma lugá den e temporada di 20 pa 23 di mart 2023 den koperashon ku Ministerio di Desaroyo Ekonómiko MEO. Nos a kompará preis di 102 diferente tipo di kuminda di laman na 16 establesimentu.  Nos por a tuma nota di diferensia grandi den preisnan di piská. Esaki ta pone ku nos mester hasi nos mes e pregunta kon leu por mantené e kustumber aki mirando ku e preis di e diferente kumindanan di laman aki ta birando kasi impagabel. Un alternativa ku e konsumidó tin ta pa hasi resetanan por ehèmpel ku piska seku manera balchi di bakiou. Di e forma aki por tòg kushina algu dushi i mantené e kustumber. 

Apesar di e diferensia grandi den preis nos por a saka e tòp 3 nan kustumbrá di e supermerkadonan mihó surti i e supermerkado ku e mihó preis den e kategoria aki. Pa mas informashon di e preisnan di e diferente produktonan na e establesimentunan aki por check nos wèpsait www.fundashonpakonsumido.org. Aki bo por tira un bista riba e lista amplio i asina traha bo lista di kompra i skohe unda ta kumbiní abo pa kumpra bo kuminda di laman. 

E tòp 3 di supermerkadonan mihó surti na e okashon aki ta:

1. Mangusa Hypermarket ku 78 produkto 
2. Mangusa Rio ku 74 produkto 
3. Bon Bini Supermarket ku 68 produkto. 

E tòp 3 supermerkadonan ku e mihó preis na e okashon aki ta: 

1. Mangus Hypermarket ku 34 produkto
2. Mangusa Rio ku 30 produkto
3. Bon Bini Supermarket ku 15 produkto 

Durante di e komparashon di preis aki no a tene kuenta ku kalidat ni pais di importashon di e produktonan. Pa kualkier remarke òf informashon por tuma kontakto ku nos semper na 462-6666 òf manda nos un e-mail na info@fundashonpakonsumido.org.