Komparashon di preis Makutu di pasku 2022  

Fundashon pa Konsumidó den kolaborashon ku Ministerio di Desaroyo Ekonómiko (MEO) a realisá e komparashon di preis di makutu di pasku e aña aki tambe. Meta prinsipal di e komparashon di preis aki ta pa duna e konsumidó un bista di e preisnan di produktonan spesialmente ku mas nos ta kumpra den temporada di pasku. Inspekshon Ekonómiko (MEO) a bishitá e aña aki 15 supermerkado durante e periodo di  5 pa 7 di dezèmber, pa asina anotá preis di 125 produkto ku ta kai den e asina yamá makutu di Pasku. E produktonan ku nos ta konsiderá spesialidatnan di Pasku. Por ehèmpel: ham i orea, makrel, pekelé, kalakuna, salmou, orea, biña, ròm, whiskey, ponche crema, serbes, limonada, chips, preimu, rasenchi, anasa den bleki, soda water etc. 

E establesimentunan ku a keda bishitá pa por a realisá e komparashon di preis aki ta ; DANDE, VAN DER TWEEL, ARCO IRIS, LUNA PARK, BEST BUY, BON BINI ,BOULEVARD, CENTRUM MAHAAI  CENTRUM PISCADERA , ESPERAMOS, MANGUSA RIO, MANGUSA HYPERMARKT, RUYTERKADE, VREUGDENHILL, CARREFOUR. 

Analisando e preisnan di e produktonan na e diferente establesimentunan ariba menshoná nos a nota diferensia basta grandi entre establesimentunan prinsipalmente riba e produktonan ku ta e spesialidatnan di pasku. Ta pesei nos ta konsehá e konsumidó pa tuma bon nota di e lista aki i asina bo por tuma un desishon konsiente unda ta bai hasi bo kompra di pasku i tambe kua ta e produktonan ku bo ta skohe. Manera por a premirá e preisnan en general ta basta haltu i ta varia hopi. Apesar di esaki nos ta menshona e top 3 di e establesimentunan ku tin mas tantu di e produktonan ku nos a anotá na un miho preis. 

Di e 125 produktonan ku nos a anotá Mangusa Hypermarket ta na promé lugá ku 29 produkto na un miho preis kompará ku e otro establesimentu nan. Bon Bini Supermarket ta na di dos lugá ku 28 produkto i Mangusa Rio ta na di 3 lugá ku 27 produkto. Esaki ta abase di nos analisis general. Mas ku klaro nos ta konsehá tur konsumidó ku ta sumamente importante pa konsultá ku e lista amplio riba nos wepsait www.fundashonpakonsumido.org pa bo por tin un bon bista i traha bo lista di forma konsiente i responsabel. 

Pa motibu di e kantidat di diferensianan di preis aki Fundashon pa Konsumidó i Ministerio di Desaroyo ekonómiko ke pa nos konsumidónan ta praktiká un komportashon di kompra aun mas konsiente. 

Gasta bo plaka di un manera responsabel, tene kuenta ku bo presupuesto i konsulta e lista di komparashon di preis ku FpK i MEO ta brinda. Finalmente nos ta deseá tur nos konsumidónan un felis Pasku i un próspero aña 2023. Kòrda semper ku nos komportashon finansiero den luna di dezèmber lo definí kon ‘largu’ nos luna di yanüari lo ta. Pa kualkier pregunta i/òf remarke por tuma kontakto ku Fundashon pa Konsumidó na telefòn 4626666. Tambe por manda nos un email na info@fundashonpakonsumido.org. Si bo ke pasa personal serka nos, kòrda ku nos ta situá na nos adrès nobo; Dr Martin Luther King Boulevard 29A na Mari Pampoen.