Kumpra responsabel durante di Black Friday 

Black Friday ta un tradishon merikano ku ta tuma lugá e djabièrnè despues di ‘Thanksgiving’, dia di yama danki. 

Black Friday a bira sumamente popular no solamente na Merka pero na diferente otro parti di mundu tambe. Asta ta duna e dia aki liber pa asina e personanan ku ke por bai hasi nan kompra. Establesimentunan ta purba atrae klientenan dor di pone preisnan drástikamente abou riba merkado i esaki ta okashoná reinan largu di personanan ku no ke pèrdè e oportunidat di haña bon artíkulonan na un preis abou. Na e paisnan aki tin persona ku ta asta para for di mardugá pa warda e establesimentunan habri pa asina nan por kumpra lokual nan ta desea, pa si akaso e stòk ta limitá. Esaki por trese kuné tin biaha te asta bringamentu entre klientenan pa wak ken al final ta logra bai ku e artíkulo. 

Entre tantu e tradishon aki a bira hopi popular aki na Kòrsou tambe. Durante di e dia aki hopi konsumidó ta probechá hasi nan kompra pa Sinterklaas i Pasku mirando ku aparentemente tin hopi bon preis riba merkado. E la bira un kustumber i pa hopi e ta te asta un señal ku e temporada di Pasku i fin di aña a kuminsá.  Aki tambe bo ta mira diferente propaganda di preisnan super atraktivo riba merkado. Esaki sigur ta algu masha interesante pa e konsumidó por probechá di dje. 

Esaki no ta kita ku Fundashon pa Konsumidó ta supliká tur konsumidó pa kumpra di forma responsabel i pone bon tinu na propagandanan ku por ta engañoso. Kòrda ku e komersiante ta liber pa skohe kon e ta bende su produkto i abo ta liber pa skohe pa tuma desishonnan konsiente i responsabel! 

Black Friday no ta nifiká hasi un krédito, pues fia pa paga tiki tiki.Tur krédito tin kondishonnan mará na dje. Pues despues di tempu bo por haña bo ta paga mesun montante ku e preis normal òf  muchu mas tantu. Esaki sigur no ta e intenshon di Black Friday. Ta bon pa tene kuenta tambe si e preis spesial ta estilo Black Friday, paso si no bo por kumpra e artíkulo deseá na kualke otro okashon. Pensa bon promé si di bèrdat bo mester di e produkto i tene kuenta ku bo presupuesto. No bai gasta loke bo no tin i sòru semper pa bo debernan prinsipal ta kubrí. Hopi importante, no kore kumpra òf drenta den areglonan atraktivo dor di emoshon di e momentu pa un término largu. Apesar ku e deal ta mustra atraktivo pensa bo bon promé ku bo tuma akshon. 

Semper por tuma kontakto ku nos na Fundashon pa Konsumidó na telefòn 4626666, bo por manda nos un e-mail na info@fundashonpakonsumido.org òf pasa serka nos na Dr. Martin Luther King Boulevard 29A na Marie Pampoen pa kualke informashon i òf remarke.