- October 31, 2022
- Posted by: FPK
- Category: Komparashon di preis, Komunikado di prensa
Fundashon pa Konsumidó ta hasi komparashon di preis na diferente establesimentu pa asina publiká esaki. E meta prinsipal ta pa informá e konsumidó unda tin e mihó surtido di produkto i tambe e mihó preis pa asina e konsumidó por hasi un eskoho responsabel na momento di hasi su kompra. Na e okashon aki e komparashon di preis ta di produktonan alimentisio.
Un kantidat di 21 establesimentu a keda bishitá entre dia 8 di òktober te ku 15 di òktober 2022 kaminda a kompará 136produkto. E establesimentunan kaminda e komparashon di preis a tuma lugá ta: supermarket 2000, Arco Iris, Van den Tweel ,Arti’s , Best Buy, Bon Bini supermarket, Boulevard Market Place, Centrum Mahaai i Piscadera, Carrefour, Esperamos supermarket, Dande, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade, LI’S, Queens, i Tropicana .
E diferente kategorianan di produkto alimentisio ta kos pa hunta den pan, bonchi di bleki, bonchi den paki, maishi di bleki/glas, sòpi di bleki/paki, spaguèti i makaroni, aros, ariña di funchi, ariña di pan, zeta, manteka, tomati pasta, suku, te, kòfi, cornflakes, djus di fruta, lechi di paki, lechi di bleki, lechi di puiru, stropi, limonada, pasta di djente, habon di baña, toaya sanitario, habon di laba tayó, desinfektante, kloròks i papel di w.c. Esakinan ta produktonan esensial den nos bida diario.
Fundashon pa Konsumidó ta kompartí un tòp 3 di e establesimentunan ku tin mas tantu di e 136 produktonan ku nos a selektá. Bo por bisa ku e 3 supermerkadonan aki ta mihó surti den e kategoria di produktonan ku nos a menshoná.
E tòp 3 di e supermerkado mihó surti ta:
Magusa hypermarket na promé lugá ku 116 produkto. Centrum Mahaaina di dos lugá ku 111 produkto i Mangusa Rio na di tres lugá ku 108 produkto.
Na e okashon aki nos no a saka un tòp tres di e establesimentu ku e mihó preis òf mas barata mirando ku mayoria supermerkado ta mantené kasi mesun preis i e supermerkadonan ku tin mas tantu produkto mas barata no ta ku un diferensia signifikativo pa bo por hasi komparashon i indiká ku e ta mas barata.
Loke si nos a hasi ta duna un indikashon di e diferensia di preis den e diferente kategorianan ku mas a resaltá.
Kategoria di kos pa hunta den pan
Centrum Mahaai tin mayoria na e mihó preis, i ku diferensia di fl. 0.50 te ku fl.2.39.
Por ehèmpel pindakaas Teddie smooth 18 oz fl. 7.54 i na Ruyterkade fl.8.99 un diferensia di fl.1.45
Kategoria di Aros
Mayoria supermarket ta mantené mesun preis. Den e kaso aki Arco Iris Supermarket si ta mantené su preis di aros mas abou ku un diferensia di fl. 0.01 te ku 1.76.
Por ehèmpel Blue Ribbon blanku di 5 lb na Arco Iris fl.6.38 na Arti’s fl.8.14 un diferensia di fl. 1.76.
Diferensia di preis grandi den kategoria di papel di w.c.
Na Luna Park bo ta paga fl. 12.99 pa un pakete ku 12 papel di wc marka Swave i na Minimarket LFZ bo ta paga fl. 17.25, un diferensia di fl. 4.26
Nos ta invitá bo pa check nos nos wèpsait www.fundashonpakonsumido.org kaminda bo por tuma notá di e anotashon di preis di un forma amplio òf tuma kontakto ku nos pa e lista di preisnan na number di telefòn 462-6666 òf e-mail info@fundashonpakonsumido.org. Asina bo mes por hasi bo komparashon, traha bo lista di kompra delantá i skohe unda ta kumbiní abo pa hasi bo kompra.
Pa e komparashon di preis aki no a tene kuenta ku kalidat ni tampoko e pais di kaminda e produkto ta keda importá.