Fundashon pa Konsumidó ta selebrá 47 aniversario

Fundashon pa Konsumidó ta un organisashon independiente ku a lanta dia 17 di òktober 1975 ku e meta pa sali na interes di e konsumidó i alabes empoderá e konsumidó pa e sali pa su derechinan. E enfoke di Fundashon pa Konsumidó ta eduká i informá e konsumidó pa asina e por hasi mihó eskoho. Tambe ta hopi importante pa e konsumidó sa kiko ta su deber i derechinan. Fundashon pa Konsumidó ta hopi kontentu i orguyoso ku atraves di tempu nos a sa di hasi diferente proyekto ku a aportá na edifiká e konsumidó pa e ta independiente, konsiente di su poder i posishon. Asina Fundashon pa Konsumidó a sa di gana su lugá den nos komunidat komo un instansia di balor ku tei pa aportá na adelanto i protekshon di e siudadano den e kaso aki e konsumidó. Kòrsou i Ulanda ta e úniko paisnan den reino ku ta afiliá na e organisashon Consumers International. For di aña 1984 Fundashon pa Konsumidó ta miembro di Consumers’ International, e organisashon madre di tur organisashon pa konsumidó na mundu. Di e forma aki bo por mira e seriedat ku nos komo Fundashon pa Konsumidó ta hasi e trabou aplikando informashon i rekomendashonnan internashonal.

Awe Fundashon pa Konsumidó ta kumpli 47 aña di eksistensia i asina nos ta habri un siman spesial di selebrashon. Fundashon pa Konsumidó ta gradisí tur persona ku durante di añanan a aportá di un manera òf otro na Fundashon pa Konsumidó su kresementu i logronan. Danki na tur kolaboradó i trahadó ku tur dia ta ehersé nan trabou ku hopi amor i pasenshi na bienestar di e konsumidó. Den e siman spesial aki dia 20 di òktober Fundashon pa Konsumidó ta bai tin su tremendo seminario ‘Fair Digital Finance’. Pues esaki tambe ta motibu di selebrashon. Hinter e ekipo di trabou a bin ta traha masha duru mes pa esaki i ta hopi kontentu kon tur kos ta kanando. Un danki for di awor na tur ku a registrá i tambe na e oradornan i panelistanan ku ta bai kompartí nan konosementu tokante e tópiko importante aki. Nos ta den gran espektativa di kuantu informashon balioso nos ta bai risibí pa asina nos por sigui kumpli ku nos ròl di eduká i konsientisá den e era digital aki tambe. Awe nos ta selebrá pero trabou nan ta sigui i Dios duna nos forsa pa esaki ta pa hopi tempu mas. Pa kualkier informashon por yama nos na 4626666 òf pasa na DR Martin Luther King 29 A na Mari Pampoen. I semper bai bo por manda nos un email na info@fundashonpakonsumido.org.