Komparashon di preis: produktonan di botika 2022

Resientemente Fundashon pa Konsumidó a anotá i kompará preis di produktonan ku mas e konsumidó  ta kumpra na e diferente botikanan aki na Kòrsou. Ku esaki nos ke yuda e konsumidó pa hasi su eskoho di forma mas konsiente. Saliendo for di e punto di bista ku mayoria konsumidó ta kumpra nan produktonan di higiena personal den botika, Fundashon pa Konsumidó ta rekomendá pa informá bo mes bon pa por hasi bo kompra di forma responsabel i konsiente.    

Nos a bishitá un kantidat di 29 botika den e periodo di 18 pa 20 di ougùstùs 2022. Durante di e bishita aki a anotá preis di un kantidat di 113 produkto repartí den diferente kategoria. E kategorianan aki ta entre otro: awa pa higiena pa boka, pasta di djente, habon pa baña, djèl pa baña kuné, puiru, deodorante, toaya femenino, pomada, krema pa kurpa i produkto pa kabei. A kontrolá tambe palitu pa limpia orea, katuna, ‘remover’ pa uña, produktonan di limpiesa pa kara, ‘face maskers’, krema pa feita i tambe ‘splash lotion’, tapa boka i handsanitizer.

Pa duna un mihó bista di e resultado nos ta indiká un tòp 3 di e botika ku mas tantu produkto na e mihó preis den e grupo di produktonan pre selektá i tambe nos ta indiká un tòp 3 di e botika mihó surtí. Pues e botika ku tin mas tantu di e produktonan den e grupo di produkto pre selektá. 

Tòp 3 di Botikanan ku e mihó preis

Basá riba e resultado di e komparashon di preis, Botika Groot Piscadera ku 33 produkto a resultá e botika ku na momentu di e anotashon di preis tabatin mas produkto na un preis mas ekonómiko, kompará ku sobra botikanan. E di dos botika ku preis mas ekonómiko a resultá Botika Cerrito ku un kantidat di 29 produkto na e mihó preis for di e 113 produktonan pre selektá . E di tres botika ku mihó preis ta botika Novo, ku 25 produkto. 

Tòp 3 di botikanan mihó surtí

Pa loke ta surtido, botika Nos Deseo resultá esunnan mihó surtí ku un kantidat di 77 produkto di e 113 produktonan ku nos a pre selektá. Botika Cerrito i Botika Jannoorduyn a posishoná su mes na di dos lugá ku 75 produkto i botika Groot Piscadera na di tres lugá ku 72 produkto.

Diferensia di preis

Ta importante pa indiká algun punto remarkabel ku nos por a nota durante di e komparashon di preis aki . Nos a tuma nota di diferensia remarkabel di preis entre botikanan. Por ehèmpel Talko Johnsons di 500gr ta kosta na botikanan di servisio fl7,95 i na botika mampuritu e ta kosta fl15,48 pues un diferensia di fl7,53. Tin un total di 7 botika ku ta kai bou di Curaçao Botika Holding NV ku ta konosí tambe pa Botikanan di Servisio. Tambe nos por a tuma nota di un subida di preis drástiko kompará ku e aña anterior. Nos ta papia aki di un subida di entre 23% pa 80%. 

Pa un bista mas amplio riba e lista di komparashon di preis di produktonan di botika i otro informashon relashoná ku derechinan di konsumidó por bishitá nos wèpsait www.fundashonpakonsumido.org . Tambe bo por hasi petishon pa e lista via di nos e-mail info@fundashonpakonsumido.org òf bèl nos na 462-6666.