Fundashon pa Konsumidó ku un interesante seminario titulá ‘Fair Digital Finance’ 

Fundashon pa Konsumidó ta den full preparashon pa organisá un tremendo seminario tokante “Fair Digital Finance. Durante di e seminario aki ekspertonan lo interkambiá informashon i asina huntu nos desaroyá i krese di un forma hustu i sólido den e area aki. 

E manera tradishonal pa duna servisio finansiero ta kambiando. Instansianan finansiero manera entre otro banko i kompanianan di seguro ta ofresé nan servisionan di forma digital. Mundu kompleto ta den e proseso di digitalisashon i ta importante pa nos ta bon informá tokante e benefisiosonan pero tambe e rísikonan di esaki. E kliente mester hasi uzo di internèt huntu ku aparatonan manera kòmpiuter, tablet i smartphone pa por hasi nan transakshonnan. Globalmente ta yama esaki  “Digital Finance”. “Digital Finance” ta hasi ku e servisionan aki ta bai muchu mas fásil i lihé. E manera di prosesá, kontrolá i reportá transakshonnan ta keda digitalisá. Miéntras ku hopi ta pensa ku ainda e tema aki ta den desaroyo aki na Kòrsou, diferente banko ya kaba ta permití bo paga òf apliká pa un fiansa di forma digital riba nan wèpsait. Awor bo por hasi uzo tambe di aplikashonnan riba bo telefòn pa bo hasi bo transakshonnan bankario. Pa sierto banko ta obligatorio pa e kliente hasi sierto transakshonnan bankario  via di “Online Banking” òf Bankomátiko. Pues e kliente no tin mester di bishitá un ofisina di banko pa por hasi transakshon. 

E servisionan digital aki ta kana fásil i lihé pero mester paga bon tinu riba algun aspekto hopi importante. Durante di e seminario nos ta bai atendé preguntanan manera “ Unda nos ta den e proseso di digitalisashon finansiero aki? Kon leu nos ta ku e lei nan ku ta protehá e privasidat i seguridat di e kliente? Unda mester bai ora algu bai robes? I kon inklusivo e proseso aki ta kana? Fundashon pa Konsumidó ta organisá e seminario aki pa risibí mas konosementu riba e tópiko aki i asina por kompartí esaki ku e konsumidó. E meta ta tambe pa por rekoudá e fondonan nesesario pa organisá charlanan informativo pa e konsumidó den futuro. E seminario aki lo tuma lugá dia 9 di sèptèmber 2022  den ouditorio di Banko Sentral di Kòrsou i St. Maarten i ta konta ku ekspertonan di inovashon di Banko Sentral di Kòrsou i St. Maarten, señora L. Silie-Eleonora i señor E. Cova pa brinda konosementu riba e tópiko importante aki. 

Tur persona i instansia konserní ta keda kordialmente invitá pa partisipá. Pa mas informashon por tuma kontakto ku nos Fundashon via di nos e-mail info@fundashonpapakonsumido.org òf yama por na 462-6666 pa mas informashon. 

Fundashon pa Konsumidó tei pa abo den e era digital aki tambe!