Lista di anotashon di preis  pa  BACK TO SCHOOL 

Falta poko pa “Back to School” I manera ta e kustumber Fundashon pa Konsumidó den kolaborashon ku Ministerio di Desaroyo Ekonómiko ta publiká e preisnan di e diferente establesimentunan ku ta ofresé material pa skol pa asina mayornan por tin un mihó bista unda ta kumbiní pa kumpra. 

E anotashon di preis aki a keda ehekutá den periodo di 5 pa 8 di Yüli 2022. A hasi bishita na un total di 14 establesimentu i a anotá preisnan di e materialnan ku mas e konsumidó ta pidi pe. E intenshon ta pa e konsumidó hasi uzo di e lista di preis amplio aki i asina huntu ku su lista di kompra e por hasi su komparashon a base di e artíkulonan ku e yu tin mester. 

Establesimentunan ku a forma parti di e anotashon di preis aki ta Office Stop, La Curaçao Zeelandia, Curaçao Office Supply, Mensing Caminada, Multi Centrum 2000,  Super Barata, Bruna, Office System, Casa Cesar, Home Plus Zeelandia, Samsom ,Martis Agencies, Alankar i Good Friends.

Fundashon pa Konsumidó a traha un lista di 63 artíkulo di skol mas usá pa por hasi e proseso di anotashon di preis mas fásil. Kolaboradornan di Ministerio di Desaroyo Ekonómiko (MEO) a anotá e preisnan di e artíkulonan aki na e 14 establesimentunan ariba menshoná . Mester enfatisá ku artíkulonan pa skol no ta kai bou di preis máksimo stipulá pa gobièrnu di Kòrsou, kual ta pone ku kada negoshante ta liber pa pone su mes preis.

Mester menshoná ku 3 establesimentu a resultá den e tòp 3 di establesimentu mihó surti. Esaki ta nifiká ku e establesimentunan aki tin mas tantu di e 63 artíkulonan riba e lista di produktonan mas usa. E Tòp 3 establesimentu mihó surti for di e lista pre selektá a resultá di ta Bruna na promé lugá ku 54 artíkulo, Mensing Caminada na di dos lugá ku 50 artíkulo i Samsom na di tres lugá ku 49 artíkulo.

Mas aleu Fundashon pa Konsumidó ta indiká di no a hasi komparashon di kalidat di produkto durante di e anotashon di preis aki. Tambe a konstatá ku tin un variedat grandi di marka di artíkulo di skol optenibel na e diferente establesimentunan aki. E variedat di markanan aki ta brinda un posibilidat mas amplio pa konsumidó por hasi su evaluashon i skohe esun ku ta kumbiní su saku.

Bo por tira un bista riba e lista di anotashon di preis di e 63 artíkulonan pa skol na e 14 diferente establesimentunan aki riba nos website www.fundashonpakonsumido.org tambe. Kòrda sigui nos página di Facebook Fundashon pa Konsumidó i pa kualkier pregunta por tuma kontakto na 4626666. 

Pa finalisá Fundashon pa Konsumidó ta deseá tur alumno for di awor un felis komienso di aña eskolar nobo.