Komunikado di Prensa Kuaresma 2022

Konsumidó sea alerta pa diferensia grandi di preis di kosnan di laman.

Nos ta den siman santu. Un di e kustumbernan ku nos tin den e temporada aki ta di kome kumindanan di laman. Pues ta importante pa sa na unda tin un variashon amplio di kumindanan di laman i na unda nos ta haña e mihó preis. Fundashon pa Konsumidó den su ròl pa informá e konsumidó a hasi un komparashon di preis bou di e produktonan ku e konsumidó ta kumpra mas tantu den temporada di kuaresma. 

E anotashon di preis a tuma lugá den e periodo di 1 di aprel te ku 6 di aprel 2022. Na e okashon aki Fundashon pa Konsumidó a bishitá 15 diferente establesimentu i a anotá preis di un kantidat di 188 produkto. 

E supermerkado i minimarketnan ku Fundashon pa Konsumidó a bishita ta: Supermerkado 2000, Van Den Tweel , Arco Iris, Arti’s ,Best Buy, Bon Bini, Boulevard Market Place, Centrum Mahaai, Centrum Piscadera, Dande, Esperamos, Mangusa Rio i Mangusa Hypermarkt,  Vreugdenhil i Luna Park. 

Mayoria di e produktonan ku a keda kompará ta komestibelnan di laman ku no ta regulá dor di Gobièrnu. E produktonan ta repartí den diferente kategoria, entre otro: tuna den bleki, salmou den bleki, makrel den bleki, saldinchi den bleki, uster, piská, bòkel, bakijou ku wesu, bakiou sin wesu, krab den saku, mix seafood den saku, bèrdura, bonchi den paki i na bleki, sòpi den bleki, funchi, maishi, roibit i chukulati.

Bon Bini Supermarket a resultá esun mas barata ku 47 produkto

Analisando e komparashon di preis, Fundashon pa Konsumidó por konkluí ku Bon Bini supermarket ta e supermerkado ku mas produkto na mihó preis kompará ku e otro supermerkadonan pa loke ta trata nos selekshon di produktonan di kuaresma. Di e 188 produktonan ku nos a selektá, Bon Bini tin 47 produkto na un preis mas abou sigui pa Centrum Piscadera ku 30 produkto na un preis mas kumbiniente. Centrum Mahaai ta keda na di tres lugá ku un kantidat di 29 produkto. Bon Bini tin e mihó preis riba produktonan den bleki manera tuna, saldinchi i makrel. Pa loke ta trata diferente tipo di piská, Centrum tin e miho preis. 

Bon Bini ta resultá e supermerkado mihó surtí den e kategoria di kuaresma.   

Segun e resultadonan di e komparashon di preis, Bon Bini ta resultá e supermerkado mihó surtí pa loke ta trata e produktonan ku a keda pre- selektá.  Di e 188 produktonan ku a keda pre- selektá, Bon Bini tabatin 106 produkto den rèki. E di dos lugá ta bai pa Centrum Piscadera  Supermarket, kual tabatin un kantidat di 105 produkto i e di tres lugá ta bai Centrum Mahaai ku tabatin un kantidat di 103 produkto. 

Diferensia grandi den preisnan di  produktonan di laman 

Fundashon pa Konsumidó a nota un diferensia di preis basta grandi entre supermerkadonan pa loke ta trata preis di kosnan di laman. Karkó pa kilo, ta kosta na Arco Iris supermarket fl. 61.00 pa kilo. Na Centrum Mahaai i Piscadera bo ta paga fl. 47.25 pa un kilo di Karkó. Esaki ta un diferensia di fl. 13.75

Un otro ehèmpel ta preisnan di fillet di bòkel.  Na Best Buy esaki ta kosta fl. 13.99 pa kilo. 

Na Boulevard Market Place esaki ta kosta fl. 36.95, kual ta un diferensia di preis di fl. 22.96. Otro diferensia ta , Sea Food Krabmeat den saku di 2.5 lbs.ta kosta na Arco Iris fl. 16.30 i na Esperamos e esaki ta kosta fl. 27.35, kual ta un diferensia di fl. 11.05 

Tuma kontakto ku nos na number di telefòn 462-6666 òf e-mail info@fundashonpakonsumido.org si dado kaso tin kualke pregunta relashoná ku e komparashon di preis aki. Por tuma nota di e lista di preis riba nos website www.fundashonpakonsumido.org tambe riba nos página di Facebook. Alabes, ku e komparashon di preis aki nos ke konsientisá nos konsumidónan riba e importansia di ta bon informá. Fundashon pa Konsumidó ta konsehá pa tene bon kuenta ku e diferente preisnan di kosnan di laman. Apesar ku nos tin nos kustumbernan mester tene kuenta ku nos presupuesto i hasi eskoho konsiente.