- April 6, 2022
- Posted by: FPK
- Category: Komparashon di preis
Bon Bini Supermarket a bolbe resultá e supermerkado ku mas tantu produkto na un mihó preis.
Fundashon pa Konsumidó a bishita un kantidat di 20 establesimentu den e siman di 21 di Mart te ku 25 di Mart. Durante di e bishita aki Fundashon pa Konsumidó a anotá i kompará preis di 139 produkto. E komparashon di preis aki a tuma lugá na Supermarket 2000, Arco Iris, Van den Tweel, Arti’s, Best Buy, Bon Bini Supermarket, Boulevard Market Place, Centrum Mahaai i Piscadera, Esperamos Supermarket, Dande, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade, LI’S, Queens, i Tropicana
A kompará preis riba e produktonan den e siguiente kategoria: Kos pa hunta den pan, bonchi di bleki, bonchi den paki, maishi di bleki/glas, sòpi di bleki/paki, spaguèti i makaroni, aros, ariña di funchi, ariña di pan, zeta, manteka, tomati pasta, suku, te, kòfi, cornflakes, djus di fruta, lechi di paki, lechi di bleki, lechi di puiru, stropi, limonada, pasta di djente, habon di baña, toaya sanitario, habon di laba tayó, desinfektante, kloròks i papel di w.c.
Pues mayoria di e produktonan selektá ta kai bou di e makutu básiko. E resultado di komparashon di preis ta indiká tòp 3 di establesimentu ku e mihó preis i mihó surti.
Mihó preis
1 Bon bini supermarket ku 43 produkto mas barata.
2 Mangusa Hyper markt 19 produkto.
3 Centrum mahaai i Piscadera i Best Buy ku 16 produkto.
Mihó Surti
1 Mangusa Hyper Markt ku 124 produkto.
2 Bon Bini ku 117 produkto.
3 Esperamos ku 107 produkto.
Komo resultado di e komparashon di preis, Bon Bini supermarket a resultá e supermerkado ku tin mas tantu produkto na mihó preis for di e makutu di produktonan promé nesesidat. Bon Bini Supermarket tabatin e produktonan, Kos pa hunta den pan , tomati pasta, suku, te, kòfi, Quaker Quick cooking, Gold Medal (all purpose), Vigo (extra virgin), Bonle, Sun Quick orange, Jab i Vex, All Clean, Glorall, Softex, Swave i Noky na mihó preis.
Fundashon pa Konsumidó ta rekomendá pa traha un lista di kompra huntu ku su preisnan delantá, kumpra solamente loke ta nesesario, kòrda sali ku bo tas di kompra i warda bo bòn paso esaki ta bo prueba di kompra. Huntu ku bo bòn tambe bo por evaluá e kompra ku bo a hasi i prepará mihó pa e siguiente bia.
Anotashon di preis di e komparashon aki ta disponibel riba nos wèpsait www.fundashonpakonsumido.org. Por tuma kontakto ku nos na number di telefòn 462-6666 òf via e-mail info@fundashonpakonsumido.org. pa mas informashon, pregunta, remarke of pa pidi e lista di preisnan.
Ta bon pa menshoná ku durante di e komparashon di e preis aki, no a para ketu na kalidat di produkto ni pais di importashon.