Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Konsumidó, sea alertá – Fundashon pa Konsumido

Konsumidó, sea alertá

Kòrsou ta importá mayoria produkto. Pa e motibu aki e desaroyonan ku ta tuma lugá rònt mundu tin hopi impakto riba nos pais prinsipalmente, nos ekonomia. E konflikto entre Rusia i Ukrania a impaktá ekonomia global den ménos ku 2 siman. Rusia ta un di e paisnan mas poderoso di mundu i ta sòru pa gran parti di produkshon di energia i kuminda. Rusia a risibí sanshon serka diferente pais i bankonan pa motibu di e atakenan kontra Ukrania. Mas ku klaro mundu kompletu ta sinti e efektonan di e impakto ekonómiko i sanshonnan aki. E impakto ekonómiko aki por afektá e GDP mundial i inflashon. 

Komo Fundashon pa Konsumidó nos ta uni den  solidaridat ku tur persona afektá pa e konflikto aki i ta enfatisá ku pa nos e rèspèt  i balor humanitario ta sentral. 

Mirando tur e desaroyonan aki Fundashon pa Konsumidó ta sali pa e grupo mas vulnerabel ku ta e konsumidó. Realidat ta ku nos no por para ni kambia e efektonan aki pero nos ke hasi un súplika pa wak den diferente direkshon i sinta huntu pa bin ku maneranan ku lo por suavisá e situashon aki. Kiko gobièrnu, komersiantenan i nos mes komo konsumidó ta dispuesto pa hasi pa yega na un plan di akshon konkreto pa mitigá e efektonan sosial ekonómiko ku e situashon mundial aki ta trese ? Nos por a tuma nota ku diferente pais a kuminsá hasi sierto ahustenan kaba na bienestar di e konsumidó. Kòrsou tambe ta mustrando inisiativa. Pero unda nos ta den e proseso aki? Nos ta bai laga preisnan keda subi sin tuma inisiativa pa wak unda nos mes komo pais por hasi algu? Esaki ta gritunan di e konsumidó preokupá ku nos komo Fundashon ta skucha tur dia di nobo. 

Awor mas ku nunka Fundashon pa Konsumidó ta hasi apelashon na e komersiante pa keda hustu den e proseso aki. Apesar ku oumento di preis ta inevitabel, ta importante pa hasi esaki di forma hustu. 

Ku esaki nos ta referí pa no probechá di e situashon pa subi preis di un produkto kaminda no ta nesesario. Tambe nos lo sugirí pa tene un tiki kuenta ku e konsumidó tambe na momentu di stipulá e márgen di ganashi riba kada produkto.                                                                                                                  

Ban respetá e derechi di e konsumidó ku ta paga un preis pa su produkto. Fundashon pa Konsumidó ta risibí hopi reklamo relashoná ku kalidat di produkto. Pues ta importante pa awor mas ku nunka sòru pa e konsumidó risibí e kalidat hustu pa su preis ku e ta paga. 

Den nos ròl pa informá i konsientisá e konsumidó nos ke kòrda tur konsumidó ku ta importante pa bo ta bon informá i paga bon tinu na momentu di hasi bo kompra. Fundashon pa Konsumidó ta rekomendá e konsumidó pa lesa bon riba kada empake, paga tinu riba fecha di vensementu i hasi bo komparashon di marka i preis promé ku bo hasi bo eskoho. Ta hopi importante pa no “hamster”, i kumpra solamente e kantidat di produkto ku bo mester pa evitá skarsedat di produkto.

Finalmente Fundashon pa Konsumidó ta mustra su disponibilidat pa forma parti i duna aporte na kualkier inisiativa ku tin pa sali pa e bienestar di e konsumidó. Fundashon pa Konsumidó na su turno lo keda informá i konsientisá pa asina ekipá e konsumidó ku konosementu pa enfrentá su retonan finansiero. Pa kualkier informashon por semper tuma kontakto ku nos na 4626666, bishita nos página di Facebook òf pasa pèrsonal na nos ofisina na Dr. Martin Luther King Boulevard 29 A (Mari Pampoen).



Leave a Reply