Komparashon di preis Minimarket produktonan no- regulá 

Fundashon pa Konsumidó ta den pleno kampaña pa informá i konsientisá. Nos ta haña importante pa prinsipalmente den e tempu difísil aki, nos sigui ekipá e konsumidó ku informashon pa asina e por hasi su eskoho di kompra muchu mas konsiente. 

Komparashon di preis ta parti di nos tarea i den koperashon ku departamento di inspekshon di Ministerio di Desaroyo Ekonómiko nos ta hasi anotashon di preis di un forma mas regular. Den kuadro di esaki nos a para ketu e biaha aki riba komparashon di preis di minimarket riba produktonan no-regulá. 

Pues konsumidó, si durante di luna bo sa pasa hasi kompra na un minimarket ta importante pa bo tuma nota di e komparashon di preis aki. 

Departamento di inspekshon di Ministerio di Desaroyo Ekonómiko a bishita un kantidat di 33 minimarket den e promé siman di mart 2022 i anotá preis di un total di 106 produkto no-regulá. E kategoria di produktonan no regulá ku MEO a skohe ta suku, karni, kòfi, produktonan di karni i piska den bleki, berdura den bleki i ‘diepvries’, fruta den bleki i tambe produktonan manera mayonaise, ketchup, jam i pindakaas.

E establesimentunan kaminda a hasi e anotashon di preis ta; Minimarket Prince, Cas Cora, Hua Long, Mia Jian, Yong Roa, Sorpresa, Priceless, Stanley’s, Kenny’s, Tropical, Wah Fei, Gosie, Fu Hao, Steenrijk, Eleven, Leman, Lia He, kong Long, Fian Fu, Power, Jinger, Boca, Waterloo, Feng Yun, Nataly’s Grocery, Seru Lora, Chipi Chipi, Good Choice, Sta.Cruz, Sure, Sunshine Fresh, Pong Hong, i Duzu S&J Minimarket.

Resultado di e análisis ku Fundashon pa Konsumidó a hasi ta indika ku tin un diferensia di preis grandi den e kategoria di karni. Por ehèmpel na minimarket Jia He i Good Choice bo ta paga pa 1 kg di varkenskarbonade FL10.50 i na Stanly’s bo ta paga FL14.50 kual tin un diferensia di FL4.00. Otro diferensia ku nos a nota ta ku pa 1 kg di Lionribs, na Sure bo ta paga FL11.95 i na Sta.Cruz bo ta paga FL19.99 kual tin un diferensia di FL 8.04. Mas aleu nos a nota ku Spareribs tambe tin un diferensia grandi di preis. Un kilo di spareribs ta kosta na Gosie FL12.95 i na Kenny’s e ta FL24.50 kual ta un diferensia di FL11.55. Aparte di karni, por lo general e minimarketnan aki tin un diferensia di preis ku ta varia di FL0.15 te ku FL11.95.

For di e komparashon di preis entre e minimarketnan ariba menshoná, den e grupo di produktonan no-regulá nos a resumí e minimarketnan ku e mihó preis i a forma un tòp 3.

1.Minimarket Jia He ku 26 produkto mas barata.

2.Minimarket Good Choice ku 23 produkto mas barata

3. Minimarket Sorpresa ku 8 produkto mas barata. 

E tòp  minimarketnan mihó surti ta:

1. Kenn’ys ta e minimarket miho surti ku un kantidat di 79 produkto 
2. Good Choice ku75 produkto 
3. Tropical minimarket ku 73 produkto. 

Importante ta pa menshoná ku e komparashon di preis aki no a tene kuenta ku kalidat ni pais for di kua e produkto ta keda importá. Mester enfatisá si ku semper bai nos mester keda alerta komo konsumidó. Informá bo mes, lesa bon riba empake di e produkto promé ku bo hasi bo eskoho. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario. Pa e lista di komparashon di preis aki òf mas informashon por bishitá nos website www.fundashonpakonsumido.org, nos paginá di Facebook  Fundashon pa Konsumidó.

Por tuma kontakto ku nos na telefòn 4626666 òf pasa sera konosí ku nos ofisina nobo na Dr. M.L .King BLVD 29-A (Mari Pampoen)