Dia Internashonal Derechi di Konsumidó 

Awe 15 di Mart 2022 ta Dia Internashonal Derechi di Konsumidó. Meta prinsipal di e dia aki ta pa para ketu riba e importansia di konsientisá, empoderá i protehá e konsumidó. Den kuadro di esaki Consumers International a skohe pa trese konsientisashon rondó di e tópiko “Fair digital finance”. Pues globalmente lo para ketu kon instansianan ku ta duna servisio finansiero di forma digital ta sòru pa e servisionan aki ta inklusivo pues na alkanse di tur hende, sigur,duradero, i privá.  

Finansa digital ta enserá entre otro hasi transakshonnan online, hasi aplikashon pa fiansa òf seguro I maneho di plaka di forma digital.  Durante di Covid 19 e konsumidó I tambe empresanan a kuminsá hasi mas uzo di fasilidat digital pa hasi nan finansa. Esaki sigur ta algu positivo i tin vários benefisio pa komèrsio manera entre otro benta por bai muchu mas fásil i lihé. Apesar ku aki na Kòrsou ainda e tópiko aki ta den desaroyo, Fundashon pa Konsumidó tambe ta pendiente di e proseso i ta sigui e desaroyo aki hopi di aserka di manera ku nos por kumpli ku nos tarea di eduká i protehá e konsumidó.

Loke ta hasi e Dia Internashonal di derechi di Konsumidó aki spesial pa nos aki na Kòrsou ta ku awe Fundashon pa Konsumidó ta lansa su kampaña Informá i Konsientisá. E kampaña aki lo dura 3 luna i ta inisiá awe 15 di Mart 2022 ku bishita na media ilo finalisá dia 15 di Yüni 2022. Meta di e kampaña aki ta pa ekipá e konsumidó ku konosementu pa asina e por enfrentá su retonan finansiero, manehá su entrada i tuma mihó desishon na momentu di hasi kompra. Durante di e kampaña aki nos lo duna informashon i konsientisá e konsumidó riba e tereno di inovashon i edukashon finansiero. Tempu ta difísil, kosto di bida a subi i ta importante pa nos sa kon ta e mihó manera pa manehá esaki. Fundashon pa Konsumidó ta bai ofresé diferente charla ku tópikonan inovativo. Tambe nos ta bai ta di bishita na skolnan ku e meta pa krea un bon fundeshi riba tópikonan finansiero. Por spera diferente tep nan balioso riba nos página di Facebook. I no lubidá riba nos kurso di presupuesto ku semper sa ta masha eksitoso. Fundashon pa Konsumidó ta invitá bo pa sigui nos pa bo ta bon ekipá pa enfrentá bo retonan finansiero. 

Di parti di Fundashon pa Konsumidó un felis dia na tur konsumidó. 

Pa kualke informashon tokante e tópiko aki por tuma kontakto ku Fundashon pa Konsumidó na number di telefòn 462-666 òf via e-mail na info@fundashonpakonsumido.org.