Komparashon di preis produktonan NO regulá supermarket  

Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.

E luna aki tambe  FPK i MEO ta sigui ku anotashon i publikashonan di preis di Toko, Mini Market i Supermerkadonan. Fundashon pa Konsumidó a skohe pa publiká e siman aki e tabel di komparashon di preis Febrüari vs yanüari 2022 di  supermerkadonan. Pa asina yuda nos konsumidónan kompará preisnan i kumpra mas konsiente. Pa tabèlnan di komparashon di Toko i Mini Market por bishitá nos  wèpsait www.fundashonpakonsumido.org.   

E supermerkadonan ku keda bishitá ta: Arco Iris, Dande, Centrum Mahaai, Sure, Vreugdenhil, Luna Park, Esperamos, Mangusa Hypermarket, New California i Bon Bini Supermarket.

 A anotá i kompará preis di diferente kategoria di produkto, por ehèmpel: kategoria di suku, karni, kòfi, produktonan di karni i piska den bleki, berdura den bleki i ‘diepvries’, fruta den bleki i tambe produktonan manera mayonaise,  jam i pindakaas. 

Tòp 3 supermerkado ku mas oumento di preis pa loke ta trata e 149 produktonan no regulá ku a ser anotá.

Segun análisis di e komparashon di preis di luna di  febrüari, a konstatá ku algun establesimentu a oumentá nan preisnan den prome siman di febrüari. Pa e motibu aki ta sumamente importante pa bo ta konsiente di unda bo ta hasi bo kompra. E supermerkado den kual a konstatá mas oumento di preis ta Arco Iris supermarket. E supermerkado aki ta tin un kantidat di 16 produkto di e 149 produktonan ku un oumento di preis. Luna Park Supermarket, nos a konstatá un oumento di preis di 12 produkto i na Bon Bini i New California, un oumento di preis di 9 produkto. 

Resultado i konklushon di e komparashon di preis: febrüari vs yanüari 2022

Kategoria di Karni

Den kategoria di karni, Fundashon pa Konsumidó a konstatá mas oumento di preis na Arco Iris supermarket. Por ehèmpel na luna di yanüari un kilo di Karni sòpi sin wesu eis tabata kosta 

fl. 13.95. i pa prome siman di Febrüari esaki ta kosta fl. 18.00, kual ta un diferensia di preis di 

fl. 4.05. Pa loke ta trata karni stobá di eis, un kilo na Arco Iris supermarket tabata kosta 

fl. 19.00 na luna di yanüari. Awor esaki ta kosta fl. 20.00, kual ta un diferensia di preis di fl.1.00. 

Kategoria Corned Beef

Resultadonan di e komparashon di preis aki ta indiká ku preis di Corned Beef marka ‘Exeter’ tin oumento na Mangusa Hyper Market i New California. E oumento di preis aki ta pa Exeter 7 oz di fl.4.10 pa fl.5.64 un diferensia di fl.1.54. New California tambe ku un oumento pa Exeter 7 oz di fl.4.25 Pa fl.5.99 un diferensia di fl. 1.74. 

Kategoria di Berdura den bleki 

Resultadonan di e komparashon di preis aki ta indiká ku preis di berdura den bleki tin un bahada na Bon Bini i Vreugdenhil supermarket. E bahada ta di preis aki ta di e markanan Goya i Libby’s. Otro supermerkado a mantené mayoria produkto na e mesun preis. 

Fundashon pa Konsumidó ta hasi un petishon na tur konsumidó pa konsultá e lista di komparashon di preis di febrüari vs yanüari di supermerkadonan i tambe di toko i mini market asina evaluá unda ta kumbiní bo hasi kompra. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario. Tambe fundashon pa Konsumidó Pa petishon di e listanan di komparashonan di preisnan aki por tuma kontakto ku Fundashon pa Konsumidó via nos sistema di mail na info@fundashonpakonsumido.org. Pa e lista di preisnan kompletu por subi riba nos wèpsait www.fundashonpakonsumido.org. Tuma kontakto ku nos na number di telefòn 462-6666 pa kualke informashon.