Komparashon di preis Supermarket, Minimarket i TOKO 

Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.

Fundashon pa Konsumidó konhuntamente ku Ministerio di Desaroyo Ekonómiko e aña aki ta inisiá un trayekto den kual lo anotá preisnan di produktonan  riba merkado i informá esakinan na  nos konsumidónan riba un base aun mas regular. E meta di e inisiativa aki no solamente ta pa duna informashon di preis, sino tambe pa eduká nos konsumidónan pa adaptá nan komportashon di kompra, spesialmente den e temporada difísil aki. Pa e motibu aki FPK i MEO lo anotá preis na diferente establesimentu e.o supermerkado, minimarket i tokonan i lo publiká esakinan 2 bia pa luna. 

Ta bon pa menshoná ku den  e komparashon di preis aki a kompará kada kategoria di establesimentu separá. 

Supermerkado

Den luna di yanüari 2022, departamentu di inspekshon di Ministerio di Desaroyo Ekonómiko a bishitá un kantidat di 10 supermerkado aki na Kòrsou i a anotá preis di 148 produkto. E supermarketnan ku keda bishitá ta: Arco Iris, Dande, Centrum Mahaai, Sure, Vreugdenhil, Luna Park, Esperamos, Mangusa Hypermarket, New California i Bon Bini Supermarket.  E  komparashon di preis aki ta duna di konosé e siguiente resultadonan. 

Mas Ekonómiko

E TOP 3 supermerkadonan mas ekonómiko ta Bon Bini, Mangusa Hypermarket i Centrum Mahaai. For di e 148 produktonan ku a keda anotá, Bon Bini ta tin 47 produkto na un preis mas ekonómiko. Mangusa Hypermarket tatin 27 produkto i Centrum Mahaai 24 produkto na un preis mas kumbiniente kompará ku e otro supermerkadonan. 

Mihó surti

Mangusa Hypermarket, Bon Bini Supermarket i Esperamos Supermarket ta e supermerkadonan ku mas variashon di produkto disponibel. Resultadonan di e komparashon di preis ta indiká ku for di e 148 produktonan ku a keda anotá, Mangusa Hypermarket ta tin 115, Bon Bini Supermarket 107 i Esperamos Supermarket 104 produkto. 

Diferensia di preis 

A konstatá diferensia di preis grandi den e kategoria di karni. Por ehèmpel un kolo di kabritu di eis ta kosta na Arco Iris fl. 14.95 i na Luna Park esaki ta kosta fl. 25.95, kual ta un diferensia di preis di fl. 11.00. Karni stobá di eis ta kosta na Bon Bini Supermarket fl. 14.45, miéntras na New California esaki ta kosta 

fl. 24.95, kual ta un diferensia di preis di fl. 10.50.  

Minimarket

A bishitá un kantidat di 34 minimarket den yanüari 2022 i a anotá preis di 105 produkto. E minimarketnan aki ta: Stanley’s, Good Choice, Priceless, Mi Jian, Sta. Cruz, Peng Hong, Boca, Sunshine, Hung Lang’s, Gosie, Kenny’s, Tomorrow, Seru Lora, Li’s, Tropical, Chipi Chipi, Sorpresa, Wah Sang, Cas Cora, Prince, S&J, Red Rosa, Jinger, Waterloo, Wah Fei, Hua Long, Tian Fu, Jia He, Power, Eleven, Steenrijk, Leman i Fu Hao minimarket. 

Mas Ekonómiko

E TOP 3 minimarketnan mas ekonómiko ta Jia He, Good Choice i Gosie. 

Mihó surti

Li’s, Good Coice i Kenny’s ta e 3 minimarketnan ku mas variashon di produkto disponibel. 

Diferensia di preis 

Tambe a konstatá diferensianan di preis di karni entre e minimarketnan ariba menshoná. Por ehèmpel un kilo di pòrkchòp ta kosta fl. 10.00 na Seru Lora Minimarket. Na Jia He esaki ta kosta fl. 15.95, kual ta un diferensia di preis di fl. 5.95. Otro diferensia di preis ku por tuma nota di dje ta den loinribs. Un kilo di loinribs ta kosta na Tomorrow fl. 13.95 i na Li’s esaki ta kosta fl. 23.95, un diferensia di preis di fl. 10.00. 

Toko

Tokonan ku a bishitá na e okashon aki ta: Oriental, Esperansa, Rong Yao, Alex, Caribbean, Feng Yun, Bon Cadushi, Nacional Soft Center, Nataly’s Grocery, King, San Pedro, Monalisa, Ming Wong, Grocery Kong Long i Jose Faria. 

Mas Ekonómiko

A anotá preis di 83 produkto na e 15 tokonan ariba menshoná. For di e anotashon di preis aki nos a konstata ku e 3 tokonan mas kumbiniente ta: Bon Cadushi, Ming Wong i Esperansa. 

Mihó surti

Pa loke ta trata tokonan miho surti, Toko King, Jose Faria i Bon Cadushi  ta e 3 tokonan ku mas variashon di produkto disponibel. 

Diferensia di preis 

Meskos ku Supermerkado i Minimarket, a konstatá diferensia di preis den e kategoria di karni na e diferente tokonan. Por ehèmpel un kilo di loinribs ta kosta na Bon Cadushi fl. 12.40 i na Caribbean esaki ta kosta fl. 24.50, kual ta un diferensia di fl. 12.10. 

Pa medio di e análisis di preisnan di produktonan riba merkado, Fundashon pa Konsumido a konstata algu remarkabel i ku sigur ta di atenshon. Ta asina ku diferente establesimentu (Supermarket, Minimarket i Toko)  ta mantené e mesun preis pa loke ta trata kofi. Esaki ta un posibel palabrashon di preis? Pa e motibu aki Fundashon pa konsumidó lo aserka Curaçao Fair Trade Authority pa asina investigá e kaso aki un poko mas di aserka. Paso al final, nos konsumidónan meresé un merkado hustu i sigur. 

Enfatisando esakinan, Fundashon pa Konsumidó ta konsehá nos konsumidónan pa hasi un análisis di nan komportashon di kompra. Ban ta kreativo ku nos sèn, kumpra responsabel i konsiente. 

Pa mas informashon tokante e anotashon di preis di fruta i berdura por tuma kontakto ku nos na number di telefòn 462-6666 òf e-mail info@fundashonpakonsumido.org. Pa e lista di preis kompletu por subi riba nos wèpsait www.fundashonpakonsumido.org.