Komparashon di preis Fruta i Berdura den Fruteria 

Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.

Fundashon pa Konsumidó usualmente ta hasi anotashon di preis di fruta i berdura den supermarket i minimarketnan na Kòrsou. Ku e meta pa brinda nos konsumidónan un bista amplio di preisnan riba merkado, Fundashon pa Konsumidó ta amplia i adaptá su anotashon di preis, poniendo énfasis e bia aki riba fruterianan na Kòrsou. Den e periodo di 27 te ku 31 di yanüari a bishitá 9 fruteria i anotá preis di un kantidat di 104 produkto. E 9 establesimentunan ku a bishitá ta: Aline Fruit Center, Bo Kunuku, Carrot Export, City Center, Dani’s Fruit Center, Fruteria Los Primos, Frutonica Market, Fruteria Helen i The Home of Fruits. 

Ta bon pa enfatisá ku Fundashon pa Konsumidó durante di e komparashon di preis aki no a tene kuenta ku pais di orígen, marka ni kalidat di produkto. 

Dani’s Fruit Center esun ku mas variedat di Fruta i Berdura

Despues di a analisá resultadonan di e anotashon di preis na e diferente Fruterianan ariba menshoná, Fundashon pa Konsumidó a konstatá ku Dani’s Fruit Center ta e fruteria mihó surti basá riba e 104  produktonan ku a keda anotá den e periodo di 27 te ku 31 di yanüari 2022. Di e 104 produktonan, Dani’s Fruit Center tatin un total di 62 produkto den stòk. Fruteria Los Primos ta resultá na di dos lugá ku un kantidat di 60 produkto i Aline Fruit Center ta na di tres lugá ku 49 produkto den stòk. 

Dani’s Fruit Center, e fruteria mas ekonómiko   

Resultadonan di e anotashon di preis ta indiká ku Dani’s Fruit Center ku tin mas produkto na un preis mas ekonómiko. Di e 104 produktonan ku Fundashon pa Konsumidó a anotá, Dani’s Fruit Center tabata tin 32 produkto na un preis mas kumbiniente. Fruteria Los Primos ta na di dos lugá ku un kantidat di 22 produkto i Carrot Export i Aline Fruit Center na di tres lugá ku 17 produkto. 

Diferensia grandi di preis  

Durante di e anotashon di preis aki nos a konstatá tambe algun diferensia di preis entre e diferente Fruterianan ariba menshoná. Fundashon pa Konsumidó lo pone énfasis riba algun di e diferensianan aki pa asina duna nos konsumidónan un mihó bista i kumpra mas konsiente. 

Un kilo di batata Hulandes ta kosta na Fruteria Los Primos Fl. 1.60. Na Fruteria Helen esaki ta kosta Fl. 3.95, kual ta un diferensia di preis di fl. 2.35.  Pa loke ta trata lamunchi, un kilo ta kosta na Aline Fruit Center Fl. 4.50 i na Carrot Export esaki ta kosta Fl. 7.00, kual ta un diferensia di Fl. 2.50. Tambe nos por a tuma nota di diferensia entre preisnan di Gember na e diferente Fruterianan.Un kilo di Gember ta kosta na Frutonica Market Fl. 7.50. Na Fruteria Helen esaki ta kosta Fl. 14.00, kual ta un diferensia di Fl. 6.50. 

Enfatisando esakinan, Fundashon pa Konsumidó ke para ketu riba e importansia di kome salú i alabes e relevansia di kompra konsiente i responsabel.   

Pa mas informashon tokante e anotashon di preis di fruta i berdura por tuma kontakto ku nos na number di telefòn 462-6666 òf e-mail info@fundashonpakonsumido.org. Pa e lista di preis kompletu por subi riba nos wèpsait www.fundashonpakonsumido.org.