Komparashon di Preis Makutu di Pasku

E temporada di fin di aña aki no solamente mester sirbi pa nos reflekshoná i plania pa futuro, si no tambe pa nos aktua i kumpra na un manera responsabel i konsiente. P’esei departamentu di Inspekshon Ekonómiko (MEO) a bishitá e aña aki 15 supermerkado durante e periodo di 12 pa 16 di dezèmber, pa asina anotá preis di 122 produkto ku ta kai den e asina yamá makutu di Pasku. E produktonan ku nos ta konsiderá spesialidatnan di Pasku. Por ehèmpel: ham i orea, makrel, pekelé, kalakuna, salmou, orea, biña, ròm, whiskey, ponche crema, serbes, limonada, chips, preimu, rasenchi, anasa den bleki, soda water etc. 

Fundashon pa Konsumidó a hinka e preisnan den un tabèl i a analisá e sifranan pa asin’ei informá nos konsumidónan na unda ta bende tin e produktonan aki na e preis di mas kumbiniente. Nos tin ku remarká un biaha mas ku solamente nos ta hasi komparashon di e preis i no di e kalidat di e produkto. 

Bon Bini Supermarket, e supermerkado ku por lo general tin mihó preis i tambe e supermerkado mas surtí kompará ku e demas supermerkadonan. 

For di nos análisis di pakete di Pasku, Bon Bini supermarket a sali e supermerkado ku mas tantu produkto na mihó preis. Di e 122 produktonan ku wòrdu anotá, e supermarket aki tin 25 produkto na un mihó preis. E produktonan aki ta entre otro kilo di makrel, alkapara 90ml, ham di fòrnu ku wesu, biña white zinfandel marka Gallo i Carlo Rossi, biña marka Beringer Pink Moscato i Red Moscato 1.5ltr, Bacardi Lemon 75cl, Malibu 750ml, Planters Mix Nuts 10.3oz, Planters Deluxe Jumbo Cashews 8.5oz, Mayonaise marka Hellman’s i Kraft di 15oz etc.  E di dos supermarket ku preis mas kumbiniente a resultá Mangusa Hyper ku 18 produkto i e di tres supermarket ku mas mihó preis a resultá di ta Centrum Piscadera ku 16 produkto.

Pa loke ta trata supermerkadonan mihó surti, di akuerdo ku resultadonan di e análisis di pakete di Pasku, Bon Biní supermarket a resultá e supermerkado mihó surti ku 98 produkto for di e pakete di 122 produkto. E di dos supermerkado a sali Mangusa Hypermarket ku 93 produkto, siguí pa Mangusa Rio Canario ku 87 produkto. 

Diferensia di preis

For di e resultadonan di e komparashon di preis nos por mira un diferensia di preis astronómiko den e kategoria di alkohòl i tambe den algun fruta seku. Diferensianan di preis te ku un máksimo di 37.05 florin. Por ehèmpel un bòter di Whiskey Dewars (12years) di 750ml ta kosta na Bon Biní supermarket fl. 57.95 i na Esperamos supermarket esaki ta kosta fl. 89.25, kual ta un diferensia di preis di fl. 31.30. Grey Goose Vodka di 750 ml ta kosta na Arti’s supermarket fl. 60.00 i na Arco Iris esaki ta kosta fl. 90.40, kual ta un diferensia di preis di fl. 30.40. pa loke ta trata fruta seku, un kilo di chèri kòrá ta kosta na Centrum Piscadera fl. 18.06 i na Luna Park i Boulevard supermarket esaki ta kosta fl. 39.95, kual ta un diferensia di preis di fl. 21.89. Por último, Tutti Frutti mix pa kilo ta kosta na ámbos Centrum fl. 11.96 i na Ruyterkade supermarket esaki ta kosta fl. 23.95, kual ta un diferensia di fl. 11.99. 

Pa motibu di e kantidat di diferensianan di preis aki Fundashon pa Konsumidó i Ministerio di Desaroyo ekonómiko ke pa nos konsumidónan ta praktiká un komportashon di kompra aun mas konsiente. 

Gasta bo plaka di un manera responsabel, tene kuenta ku bo presupuesto i konsulta e lista di komparashon di preis ku FpK i MEO ta brinda. Finalmente nos ta deseá tur nos konsumidónan un felis Pasku i un próspero aña 2022. Kòrda semper ku nos komportashon finansiero den luna di dezèmber lo definí kon ‘largu’ nos luna di yanüari lo ta.