Komparashon preis di Material di konstrukshon

Nos ta den e temporada di fin di aña, kual ta e temporada ku mas nos konsumidónan ta kumpra materialnan pa konstrukshon. Esaki netamente ta e motibu pa kual Fundashon pa Konsumidó 

a kompará un total di 145 produkto na 6 establesimentu ku ta bende materialnan di konstrukshon, durante e periodo di 14 pa 15 di novèmber 2021. A anotá preis di entre otro ‘Betonmaat, Kokerprofiel, Betonijzer Geribd, Betonijzer Glad, Hoekijzer’, Palu Bèrdè, Semènt, , ‘Groove-pine, Kozijn, PVC buizen’, Pipa di koper, Pego, Joint Compoun, Multiplex, Betonplex etc. E establesimentunan ku a forma parti di e komparashon di preis aki ta: Kooyman, Gomez Enterprises, Ferreteria Schèrpènè, Dijtham, Building Depot i tambe Staal Antillen.

Analisando e komparashon di preis di material di konstrukshon aki Fundashon pa Konsumidó a konstatá diferensianan  grandi entre e hartwernan aki na Kòrsou.

Unda ta kumbiní bo kumpra bo materialnan di konstrukshon?

A base di e komparashon di preis aki nos a konstatá  ku Building Depot ta e establesimentu ku mas tantu produkto na un mihó preis. Building Depot ku 42 produkto i na di dos luga Gomez Enterprises ku 41 produkto i na di tres luga Kooyman ku 37 produkto, pa loke ta trata e 145 materialnan di konstrukshon ku nos a anotá. 

Desaroyo di preis 

Fundashon pa Konsumidó a kompará e preisnan di material di konstrukshon aki i nos ta hasi un resúmen di e análisis: 

Betonmaat  

Aki nos a tuma nota ku Building Depot tin betonmaat i kokerprofiel na e mihó preis.

Palu Bèrdè

Loke ku nos a konstatá den e anotashon di preis aki, ta ku  Kooyman i Gomez Enterprises tin e miho preis i tambe e dos establesimentunan aki tin bahada den e preis di palu bèrdè kompará ku aña pasa.

Hoekijzer

Pa hoekijzer ta Kooyman tin e mihó preis.

Eterniet

Tambe tin subidá di preisnan  serka establesimentunan ku ta bende eterniet.  Apesar di subidá, Gomez Enterprises ta keda ku e mihó preis pa eterniet.

Multiplex

Gomez Eenterprises  tin e  mihó preis.

Kokerprofiel

Pa loke ta trata e kategoria di Kokerprofiel, aki nos a tuma nota di diferensia grandi di preis . Kokerprofiel 50×50 mm ( 6-meter dikte 3mm ) na Building Depot ta kosta fl.57.99 i na Staal Antillen e ta kosta fl. 160.- un diferensia di fl.102.01. 

Pipa di koper

Tin diferensia grandi den preis di pipa di koper. Na Gomez Enterprises  pipa 22 mm (5meter,dikte 19.8 mm) ta kosta fl.68.90  i na Dytham esaki ta kosta fl.209.69 un diferensia di fl. 140.79 

Lista di preis di materialnan di konstrukshon 

Aparte di e tabèl di november 2021, FPK a pone preisnan di añanan 2019, 2020 i 2021 den un tabèl pa ilustrá e dearoyo di preisnan di e ultimo añanan. Aki bo ta haña un bista kon kada establesimentu su preisnan a subi atrabes di añanan. Pa un bista amplio di e preisnan riba merkado, por subi riba nos wèpsait www.fundashonpakonsumido.org. Tambe por pidi e lista aki via mail info@fundashonpakonsumido.org òf tuma kontakto ku nos via telefon 462-6666. 

Fundashon pa Konsumidó ke pone énfasis i alabes remarká ku materialnan di konstrukshon ta keda importá for di diferente merkado i pais. Esaki ta pone ku e kalidat di materialnan ta diferente. E echo aki por tin influensia riba e diferensianan di preis entre e diferente artíkulonan optenibel den hartwernan aki na Kòrsou. Ta importante pa abo komo konsumidó tene esaki bon na kuenta.

Tepnan na ora di kompra

Promé ku kumpra, bo mester kompará preis, kalidat, garantia i servisio. Paga tinu ora di firma pa risibí un produkto, pasobra tin ora bo ta firma tambe pa e kondishon di e produkto, o sea si e ta den bon estado òf nò. Semper kontrolá, no firma sin kontrolá! Si bo no por a kontrolá e produkto, pone esaki riba e papel i ku bo ta firma solamente pa risibí e produkto. Eksigí pa tur palabrashon ta riba papel, preferiblemente riba bo bòn. No paga pa bo artíkulo si bo no tin e  informashon ku e ta den stòk.