Komparashon di preis Makutu No regulá

Ku regularidat Fundashon pa Konsumidó konhuntamente ku departamentu di inspekshon di  Ministerio di Desaroyo Ekonómiko (MEO) ta hasi komparashon di preis basá riba e asina yamá Makutu NO regulá. Gran parti di e produktonan den e makutu aki ta produktonan den bòter òf den bleki. Por ehèmpel fruta, karni, piska, mayonaise, jam, pindakaas i bèrdura den bleki.  E makutu aki ta konsistí tambe di karni i bèrdura di ‘diepvries’.  Durante e luna di òktober departamentu di inspekshon a anotá preis di 206 produkto na 15 diferente establesimentu. E establesimentunan ku a forma parti di e komparashon di preis aki ta: Arco Irs, Bon Bini, Boulevard Market Place, Centrum Mahaai, Centrum Piscadera, Dande, Esperamos, Luna Park, L-Z-F, Mangusa Hyper, Mangusa Rio, New Plaza/Ruyterkade, Supermarket 2000, Vreugdenhil i Zhifeng. 

Centrum Mahaai i Centrum Piscadera, e supermerkadonan ku mas produkto na un preis ekonómiko! (for di e makutu di produkto ku a keda selektá)

Resultadonan di e komparashon di preis aki ta indiká ku ámbos di e supermerkadonan di Centrum ta e supermarketnan ku tin mas produkto na un preis mas ekonómiko. For di e 206 produktonan ku a keda pre selektá, e supermerkadonan aki ta’tin un kantidat di 78 produkto na un preis mas kumbiniente. Mangusa Hypermarket ta keda na di dos lugá ku 31 produkto i Bon Biní supermarket i Vreugdenhil supermarket ta na di 3 lugá ku un kantidat di 25 produkto na un mihó preis.  

Centrum Mahaai i Centrum Piscadera ta mas mihó surti. 

(for di e makutu di produkto ku a keda selektá)

A base di e resultadonan di e komparashon di preis aki tambe Fundashon pa Konsumidó por a tuma nota di e supermerkado ku tin mas produkto optenibel den rèki. Na momentu di e anotashon di preis, Centrum Mahaai i Centrum Piscadera tabata tin 148 produkto den stòk.Mangusa Hypermarket tatin 139 I Boulevard Market Place  un total di 119 produkto.  

 Paga tinu! Kompará promé ku kumpra i asina evitá gastunan no nesesario

Fundashon pa Konsumidó a konstatá algun diferensia grandi den preisnan di entre otro karni, ‘luncheon meat’ i piska den bleki. Den e kategoria di karni por a tuma nota di un diferensia di preis di fl. 6.50 te ku fl. 11.00. Por ehèmpel un kilo di kabritu di eis ta kosta na ámbos Centrum fl. 14.95 i na Luna Park esaki ta kosta fl. 25.95, kual ta un diferensia di fl. 11.00. 

Tambe a tuma nota di diferensianan di preis den e kategoria di ‘Luncheon meat’, mihó konosí komo Spam. Un ‘luncheon meat’ di e marka Groot di 12oz ta kosta na ámbos Mangusa fl. 3.84 i na Dande Supermarket esaki ta kosta fl. 7.90, kual ta un diferensia di fl. 4.06. Manera ariba menshoná, pa loke ta trata piská den bleki tambe tin algun diferensia di preis relevante. Un bleki di saldinchi ‘Nuri spiced skinless & boneless’ ta kosta na ambos Centrum fl. 4.36 i na Boulevard Supermarket esaki ta kosta fl. 7.69, pues un diferensia di preis di fl. 3.33.

Ku e resultadonan aki Fundashon pa Konsumidó ke konsientisá nos konsumidónan pa konsultá e lista di komparashon di preis aki i kompará semper promé ku kumpra. No lubidá di kontrolá fecha di vensementu riba etikèt di e produkto ku bo tei kumpra.  Pa kualke pregunta òf remarke tokante di e komparashon di preis por yama Fundashon pa Konsumidó via telefòn na 462-6666. Bishitá nos wèpsait www.fundashonpakonsumido.org. pa un bista amplio di e lista di komparashon di preis. Fundashon pa Konsumidó ke rekordá un i tur ku nos a muda i ku nos ofisina nobo ta situá na Dr. Martin Luther King Boulevard 29A. Por bishitá nos pa kualke keho òf  informashon.

Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.