Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Komparashon di preis di karni, fruta i bèrdura – Fundashon pa Konsumido

Komparashon di preis di karni, fruta i bèrdura

Últimamente nos por a tuma nota di desaroyonan di preis den supermerkadonan na Kòrsou. Den kuadro di esaki Fundashon pa Konsumidó durante e periodo di 15 te ku 22 di sèptèmber 2021 a bishitá 22 supermerkado  ku e meta pa analisá preisnan aktual di karni, fruta i berdura riba merkado. Pa por logra esaki a anotá preis di un kantidat di 94 produkto en total. E 22 establesimentunan ku a forma parti di e komparashon di preis aki ta: supermarket 2000,  Arco Iris, Van den Tweel Arco Iris, Arti’s , Best Buy, Bon Bini supermarket, Boulevard Market Place, Centrum Mahaai i Piscadera,  Dande, Esperamos supermarket, Exito, Mangusa Rio Canario i Hypermarket, De Ruyterkade, Vreugdenhil, Minimarket LZF, Luna Park, LI’S, Feng Fu, Queens, i Tropicana.

Mangusa Rio Canario i Hypermarket esunnan mihó surti den karni, fruta, berdura i belèg

Despues di a analisá resultadonan di e anotashon di preis, Fundashon pa Konsumidó a konstatá ku E dos Mangusanan ta esunnan mihó surti basá riba e 94 produktonan di karni, fruta i berdura ku a keda anotá. Di e 94 produktonan pre selektá, ámbos di e Mangusanan  ta’tin un total di 78 produkto den stòk. Bon Biní Supermarket ta na di dos lugá ku 75 produkto i Esperamos supermarket i Arco Iris supermarket ta kompartí e di tres lugá ku un total di 69 produkto den stòk, den e periodo di e anotashon di preis.   

Mangusa Rio Canario i Hypermarket tin mas produkto di karni, fruta, bèrdura i belèg na un preis mas ekonómiko

Resultadonan di e komparashon di preis ta mustra ku e dos Mangusanan ta e supermarketnan ku tin mas produkto na un preis mas ekonómiko. Di e 94 produkto ku Fundashon pa Konsumidó a anotá, e dos  supermarketnan ariba menshoná tabata tin 21 produkto na un preis mas kumbiniente.Centrum Mahaai ta na di dos lugá ku 16 produkto i Esperamos supermarket ku 15 produkto mas ekonómiko kompaña ku demas establesimentunan.  

Diferensia grandi di preis  

E anotashon di preis aki a kondusí na resultadonan den kual por mira diferensianan di preis grandi entre e 22 establesimentunan ariba menshoná. Gran parti di e diferensianan di preis aki ta den e kategoria di karni. Un kilo di ‘Runderlappen’ ta kosta fl. 18.55 na e Mangusa Rio Canario i Hypermarket. Na Centrum Mahaai i Piscadera un kilo di ‘Runderlappen’ ta kosta fl. 29.95, kual ta un diferensia di preis di fl. 11.40. Tambe por a tuma nota di un diferensia di preis di fl.15.95 entre Exito supermarket i Luna Park. Na Exito supermarket un kilo di karni kabritu di eis ta kosta fl. 10.00 i na Luna Park esaki ta kosta fl. 25.95

Tambe den kategoria di belèg nos a tuma nota di diferensianan di preis grandi. Un kilo di ‘schouderham’ por ehèmpel ta kosta na Centrum Mahaai i Centrum Piscadera fl. 14.72, miéntras ku na Van den Tweel esaki ta kosta fl. 29.16. Pues un diferensia di preis di 14.44. 

Desaroyo di preisnan di karni, fruta, berdura i belèg   

Fundashon pa Konsumidó a analisá e desaroyo di preis di produktonan di karni, fruta, berdura i belèg for di febrüari 2021 te ku sèptèmber 2021. Resultado di e análisis aki ta indiká ku entre febrüari 2021 pa yüni 2021 ta tin un subida di preis di 3 te ku 11 florin. Entre yüni 2021 pa sèptèmber 2021 preisnan a subi di 2 te ku 15 florin. 

Pa e motibu aki Fundashon pa Konsumidó ta konsehá pueblo di Kòrsou pa ta mas konsiente na ora di hasi kompra. Prinsipalmente teniendo kuenta ku próksimamente nos lo sigui mira desaroyonan di preis den supermerkadonan. Tur esaki debí na e oumento di preis di flete di kònteiner ku importadónan a bini ta indiká. Awor mas ku nunka nos mester priorisá i kumpra loke realmente mester. A yega tempu pa nos hasi uzo di nos kreatividat i buska maneranan kon pa logra sobrebibí den e tempu difísil aki.  Ta hopi importante pa nos ta krítiko i realístiko. 

Konsultá bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Pa kualke pregunta semper por tuma kontakto ku Fundashon pa Konsumidó na number di telefòn 462-6666 òf manda nos un mail na info@fundashonpakonsumido.org. Tambe por bishitá nos wèpsait www.fundashonpakonsumido.org pa un bista amplio di komparashonnan di preis. 

Tene na kuenta ku Fundashon pa Konsumidó no ta kompará kalidat òf orígen di e produktonan den su komparashon di preis.



Leave a Reply