- July 5, 2021
- Posted by: FPK
- Category: Uncategorized
Despues di a publiká nos komparashonnan di preis di karni i fruta i berdura, Fundashon pa Konsumidó ta publiká awe e último parti di nos komparashon di preis pa loke ta trata luna di yüni/yüli. E komparashon di preis aki ta konsistí di produktonan di e kategorianan ku mas nos ta kumpra den supermerkado. Un total di 141 produkto a keda selektá, anotá i kompará na un kantidat di 22 establesimentu den e periodo di 11 di yüni pa 17 di yüni 2021. E produktonan aki ta varia for di aros, hariña, bonchi, suku, zeta dushi, kòfi, te, lechi i limonada. Tambe tin produktonan di uso personal manera habon pa baña, pasta di djente, toaya femenino i papel di wc.
Pa medio di e komparashon di preis aki, konsumidónan por tin un bista amplio di kua supermerkado ta mas kumbiniente pa hasi nan kompra di forma responsabel. Ta bon pa menshoná ku Fundashon pa Konsumidó no a tene kuenta ku kalidat òf pais di orígen di e produktonan ku ta keda preselektá.
Bon Bini supermarket: e supermarket ku mihó preis (basá riba e 141 produktonan anotá).
A base di e resultadonan di nos komparashon di preis, Bon Bini supermarket ta resaltá komo e supermerkado ku mas tantu produkto na mihó preis pa loke ta trata e produktonan ku a keda selektá. For di e lista ku 141 produkto, Bon Bini supermarket tabatin un kantidat di 44 produkto na un preis mas abou. Mangusa Hypermarket ta na di dos lugá ku un kantidat di 22 produkto mas barata i na di tres lugá Mangusa Rio Canario ku un kantidat di 18 produkto.
Mangusa Hypermarket ta mihó surtí (basá riba e 141 produktonan anotá).
Ku un kantidat di 124 produkto for di e 141 produktonan selektá, Mangusa Hypermarket tabata e supermerkado mihó surtí na momentu ku Fundashon pa Konsumidó a pasa anotá preis. Despues di Mangusa Hypermarket, Bon Bini supermarket ta na e di dos lugá ku un kantidat di 118 produkto for di e lista di produkto selektá. E di tres lugá ta bai pa Esperamos supermarket ku un total di 115 produkto.
Diferensia di preis
Fundashon pa Konsumidó a konstatá algun diferensianan di preis durante e análisis di e komparashon di preis aki. Por ehèmpel: un bòter di ‘pindakaas’ marka Calve (creamy) di 350gr ta kosta na Luna Park fl. 5.95. Na Best Buy esaki ta kosta fl. 9.99, kual ta un diferensia di fl. 4.04. Un otro ehèmpel ta den e kategoria di zeta. Un bòter di spijsolie marka Goya di 16oz ta kosta na Esperamos supermarket fl. 13.65 i na Centrum Mahaai i Piscadera esaki ta kosta fl. 19.12, kual ta un diferensia di preis di fl. 5.47.
Fundashon pa Konsumidó ta konsehá kada konsumidó pa kontrolá i kompará e produkto promé ku kumpra. Tambe nos ta konsehá pa ta kreativo i buska remplaso pa produktonan ku kisas a subi di preis. Bo ta kumpra sierto marka òf produkto djis pa kustumber? Evaluá i analisá si esaki ta nesesario i asina hasi kompra na un manera konsiente i responsabel.
Pa mas informashon tokante e komparashon di preis aki, tuma kontakto ku nos na 462-666 òf via e-mail info@fundashonpakonsumido.org of tira un bista riba nos wèpsait: www.fundashonpakonsumido.org