Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Komparashon di preis di karni i bèrdura – Fundashon pa Konsumido

Komparashon di preis di karni i bèrdura

Fundashon pa Konsumidó durante e periodo di 11 te ku 17 di yüni 2021 a bishitá 22 supermerkado  ku e meta pa analisá preisnan aktual di karni, fruta i berdura riba merkado. Pa por logra esaki a anotá preis di un kantidat di 97 produkto en total. E 22 establesimentunan ku a forma parti di e komparashon di preis aki ta: supermarket 2000,  Arco Iris, Van den Tweel ,Arti’s , Best Buy, Bon Bini supermarket, Boulevard Market Place, Centrum Mahaai i Piscadera,  Esperamos supermarket, Dande, Exito, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade, LI’S, Feng Fu, Queens, i Tropicana.

Centrum Mahaai esun mihó surti den karni, fruta, berdura i belèg

Despues di a analisá resultadonan di e anotashon di preis, Fundashon pa Konsumidó a konstatá ku Centrum Mahaai ta esun mihó surti basá riba e 97 produktonan di karni, fruta i berdura ku a keda anotá. Di e 97 produktonan pre selektá, Centrum Mahaai ta’tin un total di 80 produkto den stòk.  

Mangusa Rio, Mangusa Hypermarket, Centrum Piscadera i Centrum Mahaai tin mas produkto di karni, fruta, bèrdura i belèg na un preis mas ekonómiko

Resultadonan di e komparashon di preis ta mustra ku e 4 supermarketnan: Mangusa Rio, Mangusa Hypermarket, Centrum Piscadera i Centrum Mahaai  ta e supermarketnan ku tin mas produkto na un preis mas ekonómiko. Di e 97 produkto ku Fundashon pa Konsumidó a anotá, e 4 supermarketnan ariba menshoná tabata tin 23 produkto na un preis mas kumbiniente. 

Diferensia grandi di preis  

Fundashon pa Konsumidó ta konsehá pueblo di Kòrsou pa kumpra mas konsiente.Fundashon pa Konsumidó a hasi un komparashon di e preisnan aktual (yüni 2021) versus e preisnan di febrüari 2021, pa asina rekonose posibel subida di preis. Durante di e komparashon di preis aki a konstatá diferensia grandi di preis den e kategorianan di karni, fruta i berdura.

Un kilo di Sirloin Steak, na febrüari 2021  tabata kosta fl. 30.00 na Supermarket 2000. Na luna di yüni esaki ta kosta fl. 41.00, kual ta un subida di fl. 11.00 . Pa loke ta trata loinribs, un kilo tabata kosta na luna di febrüari fl. 9.95 na Vreugdenhil supermarket. Aktualmente esaki ta kosta fl. 17.52 pa kilo, kual ta un subida di fl. 7.57. 

Un kilo di promentòn tabata kosta fl.5.95 na Dande Supermarket na luna di febrüari. E preis aktual di un kilo di promentòn na Dande Supermarket ta fl. 9.50, kual ta un oumento di fl.3.55. 

Basá riba e análisis aki Fundashon pa Konsumidó ta konkluí ku tin un oumento di preisnan den e kategorianan di karni, fruta i berdura na mayoria supermerkado. Sigur si kompará e preisnan aktual ku e preisnan na luna di febrüari. 

E diferensianan di preis ariba menshoná tabata e diferensianan mas grandi ku Fundashon pa Konsumidó a tuma nota di dje den e produktonan pre-selektá. Tene na kuenta si ku Fundashon pa Konsumidó no ta kompará kalidat òf orígen di e produktonan den su komparashon di preis. Na momentu di hasi bo kompra, kòrda ku e dos faktornan aki por tin influensia riba di e preis ku bo ta paga.

Konsultá bo tabèl

Pa fasilitá i pa informá nos konsumidónan mas mihó, Fundashon pa Konsumidó a pone diferente preisnan di e produktonan pre- selektá aki den un tabèl ya asina kada konsumidó por tin un bista mas amplio na kua supermerkado ta mas kumbiniente pe hasi su kompranan. Pa kualke pregunta semper por tuma kontakto ku Fundashon pa Konsumidó na number di telefòn 462-6666 òf manda nos un mail na info@fundashonpakonsumido.org. Tambe por bishitá nos wèpsait www.fundashonpakonsumido.org pa un bista amplio di komparashonnan di preis.  



Leave a Reply