Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Komparashon di preis di karni i bèrdura yanüari 2021 – Fundashon pa Konsumido

Komparashon di preis di karni i bèrdura yanüari 2021

Ku e meta pa fasilitá konsumidónan den nan proseso di kompra, Fundashon pa Konsumidó durante e periodo di 25 di yanüari te ku 29 di yanüari 2021 a bishitá un kantidat di 22 establesimentu pa anotá preis di 93 produkto di karni, belèg, fruta i berdura. E 22 establesimentunan ku a forma parti di e komparashon di preis aki ta: Supermarket 2000, Van den Tweel, Arco Iris, Arti’s Otrobanda, Best Buy, Bon Bini, Boulevard Market Place, Centrum Mahaai, Centrum Piscadera, Dande, Esperamos, Exito, Mangusa Rio, Mangusa Hypermarkt, Ruyterkade, Vreugdenhil, L-Z-F Mini Market, LI’S, Feng FU (Bonam), Queens, Luna Park, i Tropicana (st.maria).

Fundashon pa Konsumidó ta enfatisá ku durante di e komparashon di preis aki no a tene kuenta ku pais di orígen, marka ni kalidat di produkto. 

Kategoria di supermarket mas ekonómiko 

Den e komparashon di preis aki Fundashon pa Konsumidó a analisá kada kategoria (karni, fruta, berdura i belèg) pa asina konstatá kua ta e establesimentu ku mihó preis pa kada kategoria. E analísis aki a trese e siguiente resultadonan.

Vreugdenil ta resaltá den kategoria di karni i belèg di kual ta hasié e supermarket ku preis mas barata pa loke ta trata produktonan di karni i belèg.  Pa loke ta trata e kategoria di bèrdura, Mangusa Rio Canario ta esun ku tin mas bèrdura na un preis mas ekonómiko i Esperamos Supermarket ta esun ku su frutanan ta mas barata kompará ku e demas establesimentunan. 

Mangusa Hypermarket ta e supermarket mihó surti den karni, fruta, berdura i belèg

Resultadonan di e komparashon di preis ta indiká ku Mangusa Hypermarket ta e supermerkado mihó surti pa loke ta trata karni, fruta, berdura i belèg. Di e 93 produktonan ku a keda anotá, Mangusa Hypermarket ta tin un total di 79 produkto den stòk. Centrum Mahaai, Centrum Piscadera i mangusa Rio Canario tambe tabata bon surti ku un kantidat di 75 produkto den stòk i Esperamos supermarket ku 71 produkto. 

Vreugdenil Supermarket: E supermerkado ku mas produkto di karni, fruta, bèrdura i belèg na preis mas ekonómiko

Despues di a analisá preisnan riba merkado durante e periodo di 25 te ku 29 di yanüari, por konkluí ku Vreugdenhil Supermarket ta e supermerkado mas barata pa loke ta trata produktonan di karni, fruta, bèrudra i belèg. Di e 93 produkto ku Fundashon pa Konsumidó a anotá, Vreugdenhil tabata tin 20 produkto na un preis mas kumbiniente. Mangusa Rio Canario ta na di dos lugá ku un kantidat di 17 produkto i Mangusa Hyper na di tres lugá ku 16 produkto.

Diferensia di preis  

Durante di e anotashon di preis aki, Fundashon pa Konsumidó a konstatá un diferensia grandi di preis entre e diferente kategorianan di produkto. P’esei nos lo suprayá e diferensianan di preis mas grandi for di kada kategoria. 

Karni:

Den e kategoria di karni nos a konstatá un diferensia di preis di fl.15.05 pa un kilo di Sirloinsteak entre e dos Mangusanan i Supermarket 2000. Na Supermarket 2000 un kilo di Sirloinsteak ta kosta fl. 30.00 i na Mangusa Rio i Hyper esaki ta kosta fl. 14.95. Un otro diferensia di preis notabel ku Fundashon pa Konsumidó a konstatá ta entre e supermerkadonan Luna Park, Tropicana i Vreugdenhil. Ta asina ku un kilo di Mondongo ta kosta Vreugdenhil Supermarket fl. 7.75 i na Luna Park i Tropicana esaki ta kosta fl. 17.95, kual ta fl.10.20 mas karu. 

Belèg: 

Den kategoria di belèg, Jonge Kaas i Schouder Ham ta e dos produktonan ku tin un diferensia di preis di mas grandi entre e diferente supermerkadonan. Ta asina ku e preis pa kilo di Jonge Kaas (na slais) ta na e Centrumnan fl. 13.95. Na Feng Fu esaki ta kosta fl. 23.95, kual ta un diferensia di preis di fl. 10.00. Pa loke ta trata Schouder Ham (na slais) su preis pa kilo na Vreugdenhil fl. 13.35 i na Feng Fu esaki ta kosta fl. 25.00, kual ta un diferensia di fl. 11.65

Berdura:

Pa loke ta trata e kategoria di berdura, nos a konstatá un diferensia di preis grandi entre un kilo di broccoli na Esperamos Supermarket i na LI’S. Un kilo di Broccoli ta kosta fl. 5.95 na Esperamos i na LI’S esaki ta kosta fl. 16.95, kual ta un diferensia di fl. 11.00

Fruta:

Tambe a konstatá diferensia di preis den e kategoria di fruta. Un di e diferensia di preis aki ta entre Boulevbard Market Place i Dande supermarket. Un kilo di ‘mandarijn’ ta kosta na Boulevard Market Place fl. 2.25 i na Dande supermarket esaki ta kosta fl. 9.50, kual ta un diferensia di preis di 7.25

Fundashon pa Konsumidó ta sugirí tur konsumidó pa konsultá e lista di komparashon di preis di karni, belèg, fruta i berdura i traha un lista di kompra promé ku bai tienda. Esaki ta hopi importante pa evitá ku ta kumpra kos i gasta sèn innesesariamente. Por último, no lubidá di kontrolá fecha di vensementu riba etikèt di e produkto ku bo tei kumpra.   

Pa kualke pregunta òf remarke tokante di e komparashon di preis por yama Fundashon pa Konsumidó via telefòn na 462-6666. E lista aki ta optenibel i visibel riba nos website www.fundashonpakonsumido.org.  Tira un bista riba e komparashon di preis aki i muchu mas.