Komunikado di Prensa: Konsepto di Lei Small Claims Court

Small claim court: Un prosedura na korte apropiá pa nos konsumidónan

Nos Kódigo Sivil ta kontené leinan ku ta protehá derechinan di Konsumidó. Un  ehèmpel ta e derechi riba un bon produkto. Si despues di kompra, e produkto resultá di ta defisiente, e konsumidó por eksihí di e komersiante pa drecha òf remplasá e produkto. Si e komersiante no ta dispuesto pa hasi esaki, e konsumidó por disolvé e akuerdo di kompra i eksihí su sèn bèk. Pues nos Kódigo Sivil tin reglanan spesífiko pa loke ta trata derechinan di un Konsumidó i por lo general no por desviá di e reglanan akí. 

Apesar ku lei ta otorgá konsumidónan diferente derechinan, den práktika e derechinan akí ta ser violá riba base regular komo ku ainda na Kòrsou no tin un sistema hurídiko apropiá pa trata mayoria kaso di konsumidó. Proseduranan na Korte por dura largu i por ta kompliká i gastunan mará na un prosedura den Korte ta haltu, sigur kompará ku preis di kompra di un produkto òf servisio. 

Ta pa e motibu akí, Fundashon pa Konsumidó pa añanan kaba ta luchando pa adaptá nos leinan pa yega na un prosedura na Korte fásil, aksesibel i pagabel pa konsumidónan por eksihí i haña un desishon di Korte pa imponé pa e komersiante kumpli ku su deber pa ku e konsumidó. Na aña 2015 nos a entregá un vershon di e lei akí na gobièrnu di Kòrsou. Sinembargo, den e añanan ku a pasa no a aktua riba adaptashon di e konsepto di lei ku a keda entregá. No opstante e echo aki, Fundashon pa Konsumidó a sigui traha pa simplifiká e konsepto di lei ainda mas i e resultado ta e konsepto nobo: e “concept-Landsverordening tot aanpassing van het Wetboek van Burgerlijke Rechtsvordering ter zake van rechterlijke bevelen in zaken van beperkt geldelijk belang (small claims court)”. Kopia di e konsepto di lei aki a ser entregá ayera 11 yanüari 2021 na Parlamento di Kòrsou.

E lei akí ta garantisá akseso na Korte, hasiendo uso di un proseso apropiá pa kasonan di konsumidó, na un tarifa muchu mas abou. Segun e proposishon di lei, un konsumidó por entregá un petishon na korte hasiendo uso di e prosedura akí si su kleim no ta surpasá e montante di ANG. 10,000.00. E konsumidó ku entregá su petishon ta paga solamente un montante di ANG. 50.00 ora e entregá e petishon na korte. Sigur pa loke ta trata balornan di produktonan, e suma akí ta kuadra muchu mas ku un kaso típiko na Kòrsou kaminda un komersiante a bende e konsumidó un produkto defisiente. E konsumidó por pidi pa e komersiante pag’é un suma, por ehèmpel si el a disolvé e akuerdo di kompra, pero tambe e por pidi pa remplasá un produkto òf drecha un produkto. Aktualmente, por usa e prosedura eksistente solamente pa eksihí pago di un suma ku no ta surpasá e montante di ANG. 10,000.00. Pues loke por pidi usando e prosedura akual di ‘rechterlijke bevelen tot betaling’ ta sumamente limitá, sigur pa e konsumidó.

Pa hasi e proseso ainda mas fásil pa nos konsumidónan, Fundashon pa Konsumidó lo traha formularionan básiko ku e konsumidó por yena na momentu ku e ke entregá un petishon na korte, hasiendo uso di e prosedura nobo. Asin’ei e konsumidó por entregá su petishon sin sintié obligá pa kontratá un abogado ku ta trese gastunan adishonal. E konsumidó, no opstante, semper por aserká un abogado si e ta haña esaki nesesario. 

E konsepto di adaptashon di lei akí a wòrdu presentá na e huesnan ku ta forma parti di nos Korte Komun di Hustisia di Aruba, Kòrsou i Sint Maarten i di Boneiru, Sint Eustatius i Saba, na Orden di Abogado i na Kámara di Komèrsio pa konsulta. A tene kuenta ku komentarionan di Orden di Abogado i a adaptá e konsepto a base di e komentarionan akí. Ademas, e proposishon di lei akí lo no tin konsekuensianan pa ku presupuesto di gobièrnu.

Komo tal, Fundashon pa Konsumidó ta hasi un yamada na gobièrnu di Kòrsou i Parlamento di Kòrsou pa pasa e lei akí mas pronto posibel. Kaminda derechinan di konsumidónan ta ser respetá, henter e ekonomia di e pais ta benefisiá. Un konsekuensia ku probablemente e adaptashon di lei akí lo trese kuné, ta ku kalidat di produkto- i servisionan na Kòrsou lo subi. Esaki sigur ta kumbiní nos tur. Pasó al final di dia: Nos tur ta konsumidó!

Atentamente, 
Fundashon pa Konsumidó 

Concept LV Small Claims Court
MVT Small Claims Court
Brief Staten Small Claims Court