Produktonan di prevenshon COVID-19

Anotashon di preis 

Produktonan di prevenshon COVID-19  

Mirando tur e desaroyonan di e vírùs di Corona aki na Kòrsou i skuchando e gritunan di nos konsumidónan relashoná ku preisnan di entre otro tapa boka i ‘handsanitizer’,  Fundashon pa Konsumidó a bishitá 24 establesimentu (botika i supermerkado) durante e periodo di 8 te ku 14 di sèptèmber 2020 i a anotá preis di entre otro handsanitizer, tapa boka, alkohòl, hanskun, wipes i tèrmometer. 

Pa por duna un bista di e preisnan riba merkado, Fundashon pa Konsumidó a bishitá 9 supermerkado i 15 botika repartí den diferente distrito. E botikanan den kual Fundashon pa Konsumidó a anotá preis ta: botika Barber, Brievengat, Brion, Cerito, De Savaan, Dominguito, Gosie, Jannoordynweg, Juliana, Mahaai, Muizenberg, Palu Blanku, Sorsaka, Tera Cora i Zuikertuintje. E 9 supermerkadonan ku a keda bishitaa ta: van den Tweel, Bon Bini, Centrum Mahaai, Esperamos, Mangusa Hypermarket, Vreugdenhil, LZF, Queens, i Luna Park.

Resultadonan di e investigashon aki ta indiká ku tin diferensianan di preis grandi entre e establesimentunan ariba menshoná. Pa e motibu aki nos konsumidónan mester ta konsiente i bon informá pa sa unda ta kumbiní nan pa kumpra. Pa e motibu aki a repartí e resultadonan den diferente kategoria di produkto. Den e komunikado aki Fundashon pa Konsumidó ta pone énfasis riba e diferensianan di preis di e kategorianan: handsanitizer, tapa boka i alkohòl. 

Diferensia di preis grandi den kategoria di ‘Handsanitizer’

Un bòter di ‘handsanitizer’ Glycerona di 100ml ta kosta na Centrum Mahaai fl. 7.91 i na Botika Brievengat esaki ta kosta fl. 14.95, kual ta un diferensia di preis di fl. 7.04. Un pakete di 2 ‘handsanitizer’ di 60ml di e marka Healthsmart ta kosta na fl. 8.72 na Centrum Mahaai i na van den Tweel esaki ta kosta fl. 13.46, kual ta un diferensia di preis di fl. 4.74. 

Diferensia di preis grandi den kategoria di Tapa Boka

Den e kategoria aki a konstatá un diferensia di preis bastante grandi. Un kaha di tapa boka di 50 pida por ehèmpel, ta kosta na Botika Zuikertuintje fl. 26.25. Na Botika Dominguito esaki ta kosta fl. 47.64, kual ta un diferensia di preis di fl. 21.39. E tapa bokanan marka Kangzigcai (disposable masks) di 50 pida ta kosta na Mangusa Hypermarket fl. 25.95 i na Bon Bini Supermarket esaki ta kosta fl. 35.95, pues un diferensia di preis di fl. 10.00. 

Diferensia di preis grandi den kategoria di Alkohòl

Pa loke ta trata e alkohòl marka Glacial 70% di 250ml, na Mangusa Hypermarket esaki tin un preis di fl. 6.36 i na Botika Tera Cora esaki ta kosta fl. 10.73, kual ta un diferensia di preis di 

fl. 4.37. Alkohòl marka Nubia di 470ml ta kosta na Botika Sòrsaka fl. 8.78 i na Botika Barber 

fl. 11.66, kual ta un diferensia di preis di fl. 2.88. 

Ta bon pa menshoná ku tin diferente establesimentu (botika) ku nan propio marka di alkohòl. Preisnan di e produktonan aki ta varia i den mayoria kaso ta mas abou ku e markanan renombrá. Ta bon pa enfatisá ku Fundashon pa Konsumidó a anotá solamente preis i no a tene kuenta ku kalidat di e produktonan ariba menshoná. 

Aktua responsabel ku bo sèn, paso kada un florin ta konta!

Fundashon pa Konsumidó ke enfatisá i rekordá nos konsumidónan riba e variedat di marka di produktonan di prevenshon kontra COVID19 optenibel den establesimentunan na Kòrsou. Esaki ta pone ku tin diferente preis riba merkado, kual ta eksigí di bo banda pa aktua aun mas konsiente i responsabel. Si nos ta papia di tapa boka, kòrda sigui e instrukshonnan kon pa bisti i kita esaki. Si por, dependiendo di tipo di tapa boka, kambia esaki kada 3 ora i asina evitá kontagio. 

Fundashon pa Konsumidó ta invitá komunidat kompletu pa sigui e desaroyonan di COVID-19 via e diferente ruedanan di prensa organisá pa Gobièrnu di Kòrsou. Ta importante pa nos ta bon informá i eduká pa asina nos por prevení. 

Pa mas informashon tokante e anotashon di preis aki òf otro informashon relashoná ku derechinan di konsumidó por manda nos un e-mail na info@fundashonpakonsumido.org òf bèl nos na 462-6666.