Komparashon di preis supermarket i minimarket

Pa fasilitá konsumidónan den nan proseso di kompra, Fundashon pa Konsumidó ta sigui bishita supermerkadonan, anotando preisnan di produktonan riba merkado. Durante e periodo di 28 di mei te ku 2 di yuni 2020 a bishitá un kantidat di 22 establesimentu pa anotá preis di 174 produkto. E 22 establesimentunan ku a forma parti di e komparashon di  preis aki ta: supermarket 2000,  Arco Iris, Van den Tweel ,Arti’s , Best Buy, Bon Bini supermarket, Boulevard Market Place, Centrum Mahaai i Piscadera,  Esperamos supermarket, Dande, Exito, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade, LI’S, Feng Fu, Queens, i Tropicana .

E produktonan ku a keda anotá ta por ehèmpel: produktonan pa hunta den pan, bonchi den paki i bleki, berdura den bleki i bòter, sòpi den bleki i paki, aros, aletria, hariña di pan i funchi, zeta, margarina, suku, te, kòfi, cornflakes, djus i lechi den paki, lechi puiru, limonada, papel di wc, desinfektante i bebida alkohóliko.  

Fundashon pa Konsumidó ta enfatisá ku durante di e komparashon di preis aki no a tene kuenta ku pais di orígen, marka ni kalidat di produkto. 

Mangusa Hypermarket esun mihó surti 

Despues di a analisá resultadonan di e anotashon di preis, Fundashon pa Konsumidó a konstatá ku Mangusa Hypermarket ta esun mihó surti basá riba e 174 produktonan ku a keda anotá. Di e 174 produktonan, Mangusa Hypermarket ta tin un total di 143 produkto den stòk. Bon Bini supermarket ta resultá na di dos lugá ku un kantidat di 131 produkto Mangusa Rio ta na di tres lugá ku 130 produkto den stòk. 

Bon Bini Supermarket tin mas produkto na un preis mas ekonómiko

Resultadonan di e komparashon di preis ta mustra ku Bon Bini Supermarket ta e supermarket ku tin mas produkto na un preis mas ekonómiko. Di e 174 produkto ku Fundashon pa Konsumidó a anotá, e Bon Bini Supermarket tabata tin 43 produkto na un preis mas kumbiniente. Mangusa Hypermarket na di dos lugá ku un kantidat di 35 produkto i Centrum Mahaai na di tres lugá ku 30 produkto. 

Diferensia di preis  

Abase di e anotashon di preis, Fundashon pa Konsumido ta hasi un analis di e diferensianan di preis entre e supermerkadonan ariba menshoná. Por ehempel un saku di papel di wc (12) marka Softex ta kosta fl. 8.99 na Best Buy i Centrum Mahaai. Na van den Tweel esaki ta kosta fl. 13.95, kual ta un diferensia di preis di fl. 4.96. Pa loke ta trata desinfektante marka Disicline (3.79ltr), esaki su preis na Dande supermarket ta fl. 13.25 i na De Ruyterkade supermarket esaki ta kosta fl. 17.99 kual ta un diferensia di preis di fl. 4.74. 

Diferensia di preis astronómiko den bibidanan alkohóliko 

Resultadonan di e análisis ta indiká diferensianan di preis grandi den e kategoria di bibidanan alkohóliko. 

Ta trata aki di diferensianan di preis di fl. 6.00 te ku fl. 40.00. Por ehèmpel, un boter di Whisky White label di 1.14 ltr. Ta kosta na Bon Bini Supermarket, Mangusa Hypermarkt i Rio Canario fl. 54.95 i na Boulevard Market Place e bòter aki ta kosta  fl 94.95. Esaki ta un diferensia di fl. 40.00. Otro bibida alkohóliko ku tambe tin diferensia grandi ta un bòter di Whisky Dewars (12 years) di 750ml. Preis di esaki na Luna Park ta fl.52.95 i na Esperamos e esaki ta fl. 89.25, kual ta un diferensia di fl. 36.30.  E último produkto ku nos lo duna komo ehèmpel ta Grey Goose Vodka.  Pa un boter di Grey Goose Vodka  di 750ml bo ta paga fl. 63.21 na van den Tweel i na Best Buy bo ta paga fl.94.66, kual ta un diferensia di fl.31.45.

Ta bon pa menshoná ku Fundashon pa Konsumidó no a tene kuenta ku kalidat òf pais di orígen di e produktonan ku ta keda preselektá.

Fundashon pa Konsumidó ta konsehá kada konsumidó pa hasi nan kompra na un manera konsiente i responsabel. Pa hasi esaki posibel, Fundashon pa Konsumidó ta brinda bo e lista di komparashon di preis aki kompletamente grátis. Manda nos un mail na info@fundashonpakonsumido.org i hasi bo petishon pa bo lista di komparashon di preis di supermarket i minimarket. Pa kualke informashon adishonal, por tuma kontakto ku Fundashon pa Konsumidó na number di telefòn 462-666 òf via e-mail info@fundashonpakonsumido.org