Komparashon di preis produktonan NO regulá aprel vs mei 2020

Departamentu di inspekshon di Ministerio di Desaroyo Ekonómiko a bishita 15 establesimentu durante luna di mei, den kual a anotá preis di un total di 192 produkto NO regulá. Teniendo na kuenta e posibilidat ku supermerkadonan lo oumentá nan preisnan debí na e situashon di Covid-19, a kompará preisnan di luna di mei i aprel 2020. Meta di e komparashon aki ta señalá  subida di preis i konsientisá nos konsumidónan pa asina nan por kumpra aun mas konsiente i responsabel.  E 15 establesimentunan ku a keda bishitá ta: supermarket 2000,  Arco Iris, Bon Bini supermarket, Boulevard Market Place, Centrum Mahaai i Piscadera,  Esperamos supermarket, Dande, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade i Zhifeng.

A anotá i kompará preis di diferente kategoria di produkto, por ehèmpel: kategoria di suku, karni, kòfi, produktonan di karni i piska den bleki, berdura den bleki i ‘diepvries’, fruta den bleki i tambe produktonan manera mayonaise, ketchup, jam i pindakaas. 

Tòp 3 supermerkado ku mas oumento di preis pa loke ta trata e 192 produktonan no regulá

Segun análisis di e komparashon di preis di luna di mei vs aprel, a konstatá ku vários establesimentu a subi nan preisnan. Pa e motibu aki ta sumamente importante pa bo ta konsiente di unda bo ta hasi bo kompra. E supermerkado den kual a konstatá mas oumento di preis ta Luna Park supermarket. E supermerkado aki ta tin un kantidat di 21 produkto di e 192 produktonan ku a subi di preis. Mangusa Hypermarket, nos a konstatá un subida di preis di 20 produkto i na Boulevard, un subida di preis di 16 produkto. 

Ta bon pa menshoná ku e for di e análisis di e komparashon di preis entre e lunanan aprel i mei, nos por a konstatá ku Arco Iris supermarket ta e supermarket ku mas bahada di preis. Un total di 22 produkto di e 192 produktonan ku a keda anotá, a baha di preis. Gran mayoria di e produktonan aki ta den e kategoria di karni, por ehèmpel kilo di kabritu di eis, karni sòpi ku wesu, karni stoba, beefsteak, loinribs i pòrkchòp. E bahada di preis den e kategoria aki ta varia di fl. 1.00 te ku fl. 3.45. 

P’esei Fundashon pa Konsumidó ta hasi un petishon na tur konsumidó pa konsultá e lista di komparashon di preis di aprel vs mei i asina evaluá unda ta kumbiní bo hasi kompra den e temporada aki. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario. Pa petishon di e lista di komparashon di preis aki por tuma kontakto ku Fundashon pa Konsumidó via nos sistema di mail na info@fundashonpakonsumido.org