Komparashon di preis produktonan NO regulá febrüari vs aprel 2020

Departamentu di inspekshon di Ministerio di Desaroyo Ekonómiko a bishita 15 establesimentu durante luna di aprel, den kual a anotá preis di un total di 232 produkto NO regulá. Teniendo na kuenta e posibilidat ku supermerkadonan lo oumentá nan preisnan debí na e situashon di Covid-19, Fundashon pa Konsumidó a kompará preisnan di luna di aprel i febrüari 2020. Meta di e komparashon aki ta señalá  subida di preis i konsientisá nos konsumidónan pa asina nan por kumpra aun mas konsiente i responsabel.  

E 15 establesimentunan ku a keda bishitá ta: Supermarket 2000,  Arco Iris, Bon Bini supermarket, Boulevard Market Place, Centrum Mahaai i Piscadera,  Esperamos supermarket, Dande, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade i Zhifeng. 

A anotá i kompará preis di diferente kategoria di produkto, por ehèmpel: kategoria di suku, karni, kòfi, produktonan di karni i piska den bleki, berdura den bleki i ‘diepvries’, fruta den bleki i tambe produktonan manera mayonaise, ketchup, jam i pindakaas. 

Tòp 3 supermerkado ku mas oumento di preis pa loke ta trata e 232 produktonan no regulá

Segun análisis di e komparashon di preis di luna di aprel i febrüari, a konstatá ku vários establesimentu a subi nan preisnan. Pa e motibu aki ta sumamente importante pa bo ta konsiente di unda bo ta hasi bo kompra. E supermerkado den kual a konstatá mas oumento di preis ta Arco Iris supermarket. E supermerkado aki ta tin un kantidat di 32 produkto di e 232 produktonan ku a subi di preis. Esperamos Supermarket, nos a konstatá un subida di preis di 23 produkto i na Boulevard i Centrum Mahaai, un subida di preis di 22 produkto. 

Resultado i konklushon di e komparashon di preis: aprel vs febrüari  2020

Kategoria di suku blanku

Pa loke ta trata kategoria di suku blanku, Fundashon pa Konsumidó a tuma nota ku ta solamente 3 supermerkado a mantené e mesun preis. E tres supermerkadonan aki ta Dande, Esperamos, i L-Z-F. Di febrüari pa aprel a tuma nota di subidanan di preis di  fl.0.40 te ku  fl.1.26. 

Kategoria Kòfi

Resultadonan di e komparashon di preis aki ta indiká ku preis di kòfi marka ‘Nescafe Colombiana’ a baha na tur e 15 supermerkado ku a keda bishitá. E bahada ta di preis aki ta di fl.1.59 te ku fl.1.86. Pa loke ta trata otro markanan di kòfi, algun supermerkado a mantené e mesun preis ku eksepshon di Arco Iris, Centrum mahaai, Centrum Piscadera Mangusa Hypermarket, Esperamos i Mangusa Rio.

Kategoria di Karni

Den kategoria di karni, Fundashon pa Konsumidó a konstatá un subida di preis di fl. 6.51 te ku fl. 7.45 na algun supermerkado. Por ehèmpel na luna di febrüari un kilo di beefsteak tabata kosta fl. 17.50 na Arco Iris supermarket. Na luna di aprel esaki ta kosta fl. 24.95, kual ta un diferensia di preis di fl. 7.45. Pa loke ta trata karni stoba, un kilo na Esperamos supermarket tabata kosta fl. 13.99 na luna di febrüari. Awor esaki ta kosta fl. 20.50, kual ta un diferensia di preis di fl. 6.51. 

Kategoria di Pindakaas 

Un produkto ku tambe nos a nota un subida di preis di febrüari pa aprel, ta pindakas marka ‘Peanut Kids Creamy’ di 16 oz. Na febrüari esaki tabata kosta fl. 6.25 i awor esaki ta kosta fl. 9.99 na Boulevard supermarktet. Esaki ta un diferensia di preis di fl. 3.74.

Fundashon pa Konsumidó ta hasi un petishon na tur konsumidó pa konsultá e lista di komparashon di preis di febrüari vs aprel i asina evaluá unda ta kumbiní bo hasi kompra den e temporada aki. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario. Pa petishon di e lista di komparashon di preis aki por tuma kontakto ku Fundashon pa Konsumidó via nos sistema di mail na info@fundashonpakonsumido.org.