Komparashon di preis produktonan NO regulá

Nos Pais ta pasando den un temporada krítiko i difísil. Un temporada den kual nos tur komo siudadano tin ku duna di nos banda pa asina huntu kombatí e asina yamá Covid19. Komo konsumidó, Covid19 di un òf otro manera a fòrsa nos pa ta aun mas alerta, responsabel i konsiente. Prinsipalmente ora ta trata di hasi kompra. 

P’esei departamentu di inspekshon di Ministerio di Desaroyo Ekonómiko (MEO), konhuntamente ku Fundashon pa Konsumidó ta fasilitá un lista di preis di produkto no regulá. E meta di e lista di preis aki ta pa informá nos konsumidónan di e preisnan aktual na diferente supermerkado. Ku e lista aki e konsumidó por evaluá i hasi su eskoho basá riba su kapasidat finansiero. 

Un kantidat di 15 establesimentu a keda bishitá den e luna aki, den kual a anotá preis di 202 produkto no regulá. Den e kategoria di Produktonan No regulá ta aki entre otro karni i produktonan di karni na bleki, suku, kòfi, piska, sòpi, fruta i berdura na bleki, berduranan ‘deepvries’ i tambe produktonan manera mayonaise, jam, pindakaas, choco pasta etc. E supermarket i minimarketnan  kaminda e komparashon di preis a tuma lugá ta: supermarket 2000,  Arco Iris, Bon Bini supermarket, Boulevard Market Place, Centrum Mahaai i Piscadera,  Esperamos supermarket, Dande, Mangusa Rio Canario i Hypermarket, Vreugdenhil, Minimarket LZF, Luna Park, New Plaza/ De Ruyterkade i Zhifeng. 

Di e 202 produktonan ku a keda anotá, Bon Bini supermarket tin mas produkto na mihó preis

Segun resultadonan di e komparashon di preis, Bon Bini supermarket a resultá di ta e supermerkado ku mas produkto na un mihó preis. Di e 202 produktonan ku a keda selektá, Bon Bini supermarket ta tin un kantidat di 50 produkto mas ekonómiko kompará ku otro supermerkadonan. Algun supermerkado ku tambe a resultá di tin un kantidat di produkto na un preis mas kumbiniente ta Centrum Mahaai, Mangusa Rio i Hypermarket. Tur tres ta tin un kantidat di 43 produkto na un preis mas ekonómiko. 

Mangusa Hypermarket, esun mihó surtí 

Resultadonan di e komparashon di preis ta indiká ku Mangusa Hypermarket ta e supermerkado mihó surti. Di e 202 produktonan ku a keda anotá, Mangusa Hypermarket ta tin un kantidat di 150 produkto den rèki. Supermerkadonan ku tambe ta bon surtii ta Mangusa Rio ku 143 produkto, Esperamos supermarket ku 136 produkto i Centrum Mahaai ku 132 produkto. 

Minimarket New Plaza/DE Ruyterkade, e establesimentu di mas karu. 

Di e 202 produktonan ku a keda selektá, Minimarket New Plaze/De Ruyterkade ta tin un kantidat di 48 produkto na un preis mas haltu kompará ku otro supermerkadonan. 

Diferensia grandi di preis  

Fundashon pa Konsumidó a konstatá un diferensia di preis grandi entre algun sorto di karni na e supermerkadonan ariba menshoná. Un kilo di ‘beefsteak’ por ehèmpel ta kosta na Centrum Piscadera fl. 13.95 i na Arco Iris esaki ta kosta fl. 24.95, kual ta un diferensia di fl. 11.- Un otro ehèmpel di karni ku tin un diferensia di preis grandi na supermerkadonan ta kabritu di eis. Esaki ta kosta fl. 9.95 na Mangusa Rio, Mangusa Hyper i Bon Bini. Na Zhifeng e ta kosta fl. 18.50, kual ta un diferensia di fl. 8.55.

Fundashon pa Konsumidó ta hasi un petishon na tur konsumidó pa konsultá e lista di komparashon di preis i asina evaluá unda ta kumbiní bo hasi kompra den e temporada aki. Realisá ku awor mas ku nunka mester tene kuenta ku e pòtmòni i kumpra loke di bèrdat ta nesesario. 

Pa petishon di e lista di komparashon di preis aki por tuma kontakto ku Fundashon pa Konsumidó via nos sistema di mail na info@fundashonpakonsumido.org.