Produktonan di prevenshon COVID-19

Anotashon di preis

Produktonan di prevenshon COVID-19  

Mirando tur e desaroyonan di e vírùs di Corona aki na Kòrsou i rònt mundu, Ministerio di Desaroyo Ekonómiko konhuntamente ku Fundashon pa Konsumidó pa medio di e komunikado aki ke informá i konsientisá nos konsumidónan di e preisnan di produktonan riba merkado ku por fungi komo prevenshon pa loke ta trata COVID- 19. Durante e periodo di 3 di mart te ku 12 di mart 2020, Ministerio di Desaroyo Ekonómiko a anotá preis di entre otro handsanitizer, alcohol, mondkapjes i wipes na un kantidat di 9 botika i 4 supermerkado. 

E botikanan den kual MEO a anotá preis ta: botika Nos Deseo, Palu Blanku, Vredenberg, Rio Canario, Sorsaka, Stakamahachi, Zuikertuintje, Gosie i Juliana. E supermerkadonan ta Centrum Piscadera i Mahaai, Esperamos i Mangusa Hypermarket. E anotashon di preis aki ta indiká e ‘inkoopprijs’ i ‘verkoopprijs’ di kada produkto na kada supermerkado òf botika. Esaki ku e meta pa monitoriá i garantisá un merkado hustu pa nos konsumidónan. 

Nos por a tuma nota di e kantidat di konsumidónan ku ta bishita supermerkadonan i tambe botikanan e último dianan, despues ku e promé kaso di COVID-19 a keda konstatá. Konsekuensia di esaki ta ku hopi produkto di prevenshon pa ku e vírùs aki a kaba na diferente supermerkado i botika. P’esei ta bon pa tene kuenta ku e preisnan di e produktonan ku a keda anotá, pa asina por kumpra na un manera responsabel na momentu ku esakinan ta den ‘stock’ bek. Si akaso bo nota ku un establesimentu ta muchu karu, bo ta liber pa gasta bo plaka na un establesimentu diferente. Por manda un potrèt na e number di WhatsApp di MEO +59995111444 i indiká e subida di preis. 

Fundashon pa Konsumidó ta invitá komunidat kompletu pa sigui e desaroyonan di COVID-19 via e diferente ruedanan di prensa organisá pa Gobièrnu di Kòrsou. Ta importante pa nos ta bon informá i eduká pa asina nos por prevení. 

Pa mas informashon tokante e anotashon di preis aki òf otro informashon relashoná ku derechinan di konsumidó por manda nos un e-mail na info@fundashonpakonsumido.org òf bèl nos na 462-6666.