Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Komparashon di preis Pakete di Karnaval – Fundashon pa Konsumido

Komparashon di preis Pakete di Karnaval

Karnaval, e temporada tan gustá pa un gran parti di komunidat di Kòrsou ta den kurpa. Karnavalistanan ya ta preparando pa e diferente marchanan i asina selebrá den kompania di famia i sernan kerí. Pa forma parti di e proseso di preparashon aki, Fundashon pa Konsumidó konhuntamente ku Ministerio di Desaroyo Ekonómiko (MEO) ta fasilitá nos konsumidónan pa medio di un lista di preis di produktonan spesial pa temporada festivo aki. E pakete aki nos a yama: Pakete di Karnaval i ta konsistí di preis di 140 produkto, ku a keda anotá na 14 supermarket durante 20 te ku 27 di yanüari último. E pakete di karnaval ta konsistí di produktonan manera, awa mineral, djus di paki, djus di bleki, stropi, limonada, awa di soda, ‘energy drink’, serbes, wiski, ròm, biña, ‘chips’, karni, sosèshi, tuna den bleki, makaroni, berdura di bleki, mayonès, kèchup, mòster, ‘wax papier’, fòil, nèpkin, kùp di plèstik, kùp pa kos kayente, baki di fom, bestèk di plèstik. E lista di komparashon di preis di karnaval ta basá riba preisnan ku funshonarionan di Ministerio di Desaroyo Ekonómiko (MEO) a anotá.

A base di e resultadonan di nos análisis, nos por konkluí ku: 

Pa bo Pakete di Karnaval, Mangusa Hypermarket tin mas produkto na un preis mas ekonómiko. 

Mangusa Hypermarket ta e supermerkado ku mas produkto di e pakete di karnaval na un mihó preis. Di e 140 produktonan, Mangusa Hypermarket tin 40 produkto mas barata kompará ku otro supermerkadonan. E Produktonan aki ta: awa mineral marka Luso, djus marka Rica, Baggio i Camisa, djus di orange den bleki marka Bluebird, Tip Top, Coca Cola/Fria di 1 i 2 liter,  soda water spellergrino, ‘energy drink’, krat di serbes Amstel di 25cl, Whiskey White Label di 70cl i 1.14 liter, chips marka Pringles i Piknik, soseshi marka Gwaltney, tuna den awa na bleki di marka Gomes de Costa 170gr, tuna den awa di e marka Bala 66.5oz, macaroni Casa Italiana, berdura den bleki, mayonaise marka Country Barn, Moster di Libby’s, saku di plestik mara Waxtex i Cutrite, nèpkin Noki di 200 pida, baki di fom i bestèk di plèstik. Na di dos lugá a sali Mangusa Rio ku 39 produkto i na di tres lugá Bon Bini Supermarket ku 36 produkto.  

Mangusa Hypermarket t’esun mihó surti 

Analisando e komparashon di preis di nos Pakete di Karnaval, nos por konkluí ku Mangusa Hypermarket ta esun mas surtí, kompará ku e otro establesimentunan. For di e 140 produktonan ku a keda anotá, Mangusa Hyper tin un kantidat di 121 produkto den stòk.  Supermerkadonan ku tambe ta bon surtí ta Mangusa Rio ku 116 produkto i Bon Bini ku un kantidat di 114 produkto. 

Ojo! Diferensia grandi di preis den bibidanan alkohóliko

Remarkabel den e investigashon aki ta e diferensia grandi di preis pa loke ta trata e kategoria di bibida alkohóliko. Un kaha di bòter di serbes Heineken di 25cl ta kosta na Boulevard fl. 65.00 i na Tropicana esaki ta kosta fl. 83.00, kual ta un diferensia di preis di fl. 18.00. Un krat di Heineken na bleki di 33cl ta kosta na Van den Tweel fl. 51.46 i na Esperamos supermarket esaki ta kosta fl. 75.30, un diferensia di preis di fl. 23.84. 

Pa loke ta trata Whiskey, preis di un White Label di 1.14 liter ta kosta na Bon Bini, Mangusa Hyper i Rio fl. 54.95. Na Dande supermarket esaki ta kosta fl. 74.50, kual ta un diferensia di preis di fl. 19.50. Si ta Johnny Walker Black Label bo ta bebe, paga tinu bon. Un bòter di 75cl ta kosta na Luna Park fl. 49.99 i na Van den Tweel esaki ta kosta fl. 84.05, un diferensia di preis di fl. 34.06

Tepnan útil pa temporada di karnaval 2020

Despues di a tuma nota di e resultadonan di e anotashon di preis di e pakete di karnaval, Fundashon pa Konsumidó ke motivá tur konsumidó pa hasi uzo di e komparashon di preis aki, pa por tin un bista di e preisnan den e diferente establesimentunan. Alabes Fundashon pa Konsumidó ke enfatisá ku e produktonan den e Pakete di Karnaval NO ta produktonan ku ta pertenesé den e asina yamá makutu Básiko. Pues, esaki ta nifiká ku e produktonan aki no tin un márgen di ganashi i ku ta pone ku e establesimentu ta liber pa stipulá su preis. 

Temporada di Karnaval meskos ku e temporada di fin di aña, ta unu hopi drùk. Pues tuma bo tempu i hasi bo kompra na un manera konsiente i responsabel. Por último Fundashon pa Konsumidó ta konsehá pa pone èkstra atenshon riba kalidat di produkto. Kòrda ku bo salú, meskos ku bo pòtmòni ta bo propio responsabilidat. 

Pa mas informashon tokante komparashon di preis òf otro aspektonan ku ta relatá na konsumidó, tuma kontakto ku Fundashon pa Konsumidó na telefòn 462-6666 òf manda un meil na info@fundashonpakonsumido.org

Fundashon pa Konsumidó ta deseá pueblo di Kòrsou un Felis Karnaval 2020. 

Kòrda gosa konsiente i aktua responsabel.



Leave a Reply