Komparashon di preis Makutu No regulá

Ku regularidat Fundashon pa Konsumidó i departamentu di inspekshon di  Ministerio di desaroyo Ekonómiko (MEO) ta hasi komparashon di preis basá riba e asina yamá Makutu NO regulá. Gran parti di e produktonan den e makutu aki ta produktonan den bòter òf den bleki. Por ehèmpel fruta, karni, piska, Mayonaise, jam, pindakaas i berdura den bleki.  E makutu aki ta konsistí tambe di karni i berdura di ‘diepvries’.  Durante e luna di januari MEO a anotá preis di 184 produkto na 15 diferente establesimentu. E establesimentunan ku a forma parti di e komparashon di preis aki ta: Arco Irs, Bon Bini, Boulevard Market Place, Centrum Mahaai, Centrum Piscadera, Dande, Esperamos, Luna Park, L-Z-F, Mangusa Hyper, Mangusa Rio, New Plaza/Ruyterkade, Supermarket 2000, Vreugdenhil i Zhifeng. 

Bon Bini supermarket, e supermerkado ku mas produkto na un preis ekonómiko! (for di e makutu di produkto ku a keda selektá)

Resultadonan di e komparashon di preis aki ta indiká ku Bon Bini supermarket ta e supermarket ku tin mas produkto na un preis mas ekonómiko. For di e 184 produktonan ku a keda pre selektá, e supermerkado aki ta’tin un kantidat di 56 produkto na un preis mas kumbiniente. Mangusa Hypermarket ta keda na di dos lugá ku 31 produkto i Mangusa Rio na di 3 lugá ku un kantidat di 27 produkto na un mihó preis.  

Bon bini supermarket ta mas mihó surti. (for di e makutu di produkto ku a keda selektá)

A base di e resultadonan di e komparashon di preis aki tambe Fundashon pa Konsumidó por a tuma nota di e supermerkado ku tin mas produkto optenibel den rèki. Na momentu di e anotashon di preis, Bon bini supermarket tabata tin 135 produkto den stòk.Mangusa Hypermarket tatin 134 I Esperamos supermarket  un total di 128 produkto.   

Ku e resultadonan aki Fundashon pa Konsumidó ke konsientisá nos konsumidónan pa konsultá e lista di komparashon di preis aki i kompará semper promé ku kumpra. No lubidá di kontrolá fecha di vensementu riba etikèt di e produkto ku bo tei kumpra.  Pa kualke pregunta òf remarke tokante di e komparashon di preis por yama Fundashon pa Konsumidó via telefòn na 462-6666. Si bo ta interesá di risibí e lista di komparashon di preis, manda nos un e-mail na info@fundashonpakonsumido.org

Fundashon pa Konsumidó ta un organisashon independiente ku ta sali na interes di e pueblo kumpradó. E publikashon aki ta konta ku ouspisio di Ministerio di Desaroyo Ekonómiko.