Warning: call_user_func_array() expects parameter 1 to be a valid callback, class '' not found in /home/customer/www/fundashonpakonsumido.org/public_html/wp-includes/class-wp-hook.php on line 324
Komparashon di preis di karni òktober 2016 – Fundashon pa Konsumido

Komparashon di preis di karni òktober 2016

Fundashon pa Konsumidó den su afan pa informá i konsientisá konsumidónan, resientemente a hasi un komparashon di preis di karni den supermerkado i minimarketnan aki na Kòrsou. Un kantidat di 22 establesimentu a keda bishitá durante di e periodo di 16 pa 27 di sèptèmber 2016 kaminda a kompará e 35 produkto di karni i belèg mas kumprá dor di konsumidónan. E supermarket i minimarketnan  kaminda e komparashon di preis a tuma lugá ta: supermarket 2000, Albert Heijn, Arco Iris, Arti’s, Best Buy, Bon Bini supermarket, Boulevard Market Place, Centrum Mahaai i Piscadera, Colon supermarket, Esperamos supermarket, Exito, Mangusa Rio Canario i Hypermarket, Vreugdenhil, Minimarket LZF, Fei Cui, Bonam, Queens, Luna Park, sta. Maria, De Ruyterkade.

Ku e komparashon di preis aki Fundashon pa Konsumidó ta fasilitá konsumidónan den nan proseso pa un kompra konsiente. Ta bon pa menshoná ku durante di e komparashon di preis aki no a tene kuenta ku pais di orígen, marka ni kalidat di produkto.

Mangusa Rio Canario tin mas produkto di karni i belèg na mihó preis

Segun resultadonan di e komparashon di preis, Mangusa Rio Canario a resultá e supermerkado ku mas produkto di karni i belèg na mihó preis, ku un kantidat di 11 produkto di e 35 nan ku a keda selektá. Centrum Mahaai i Piscadera ta resultá na di dos lugá ku un kantidat di 10 produkto for di e lista di 35 produkto selektá i e di tres lugá ta pertenesé na Esperamos supermarket ku un kantidat di 9 produkto.

Mangusa Rio Canario i Hypermarket, esnan mihó surtí

E dos filial nan di Mangusa supermarket tin tur e 35 produktonan ku a keda selektá. Esaki ta hasi Mangusa Rio Canario i Hypermarket e supermerkadonan mihó surtí. Esperamos i Bon Bini supermarket ta na di dos lugá ku un kantidat di 34 produkto i e di tres lugá ku un kantidat di 33 produkto ta bai pa Vreugdenhil i Centrum Mahaai i Piscadera.

Diferensia grandi di preis 

Pa medio di e komparashon i preis aki, Fundashon pa Konsumidó a konstatá un diferensia grandi entre algun sorto di karni na e supermerkadonan ariba menshoná. Un kilo di kogelbeefsteak por ehèmpel ta kosta na Esperamos supermarket fl. 16.55 i na Bon Bini esaki ta kosta fl. 26.29, kual ta un diferensia di fl. 9.74. Un otro ehèmpel di karni ku tin un diferensia di preis grandi na supermerkadonan ta beef/runderlappen. Esaki ta kosta fl. 15.35 na Mangusa Rio Canario i na Exito e ta kosta fl. 27.00, kual ta un diferensia di fl. 11.65. E diferensia di mas grandi ku a keda konstatá ta entre Centrum Mahaai/ Piscadera i minimarket Bonam. Un kilo di schouderham ta kosta na Centrum Mahaai i Piscadera fl. 9.21 i na minimarket Bonam esaki ta kosta fl. 25.00, kual ta un diferensia di fl. 15.79.

E diferensia di preis por ta mará na diferente faktor. Por ehèmpel pais di orígen, kalidat di produkto, marka etc. P’esei Fundashon pa Konsumidó ta konsehá tur konsumidó pa traha nan lista i kumpra produktonan di karni kaminda ta kumbiní. Esaki ta hopi importante pa evitá ku ta kumpra kos i gasta sèn innesesariamente. Komo konsumidó, bo tin derechi di eskoho, pues ta krítiko i kumpra semper konsiente i responsabel.

Pa mas informashon tokante di komparashon di preis di produktonan di karni tuma kontakto ku Fundashon pa Konsumidó na telefòn 462-6666 òf e-mail info@fundashonpakonsumido.org. Tambe por mira e lista di komparashon di preis riba e wèpsait www.fundashonpakonsumido.org.    

pv-pakket-sept-2016-superm-minim-vlees-final