Durante e periodo di 16 pa 27 di sèptèmber 2016 , Fundashon pa Konsumidó a bishitá 22 establesimentu pa anotá i kompará preisnan di fruta i bèrdura. Pa hasi e proseso di komparashon di preis di fruta i bèrdura mas struktura, a selektá un kantidat di 46 produkto. E produktonan aki ta: batata, batata dushi, yuka, maishi, lamunchi, pampuna, banana, konofló, siboyo, siboyo kòra, tomati, promentòn, spinazi, awakati, broccoli, prei, wòrtel, anasa, kiwi, bakoba, mandarein, pera, plùm, apel, apelsina, milon, mango, papaya, patia i drùif.
Centrum Piscadera, mihó surti den fruta i bèrdura
Resultado di e komparashon di preis ta mustra ku Centrum Piscadera ta e supermerkado ku tin mas fruta i berdura den su surtimentu . Di e 46 produktonan ku a keda selektá, Centrum Piscadera tin un kantidat di 31 produkto. Bon Biní i Mangusa Rio Canario ta na di dos lugá ku un kantidat di 30 produkto i Mangusa Hypermarket na di tres lugá ku 29 produkto.
Na mei 2016 tambe a anotá i kompará e mesun fruta i berduranan ariba menshoná. Remarkabel ta ku na mei 2016, e supermerkadonan mihó surti tabata Mangusa Rio Canario i Hypermarket i na di dos i di tres lugá tabata Esperamos supermarket i Bon Bini. Pa medio di e resultadonan aki konsumidónan por haña un mihó bista kua ta e supermerkadonan mihó surti pa loke ta trata fruta i berdura.
Mangusa Rio Canario i Hypermarket, Vreugdenhil i Queens tin mihó preis di fruta i bèrdura
Pa loke ta trata mihó preis, Mangusa Rio Canario, Hypermarket, Vreugdenhil i minimarket Queens a sali na promé lugá ku un kantidat di 8 produkto. Na di dos lugá, ku un kantidat di 7 produkto ta Centrum Piscadera i na di tres lugá, Centrum Mahaai ku 6 produkto. Di akuerdo ku e komparashon di preis di fruta i bèrdura hasí na luna di mei, Centrum supermarket Mahaai i Centrum Piscadera tabata esunnan ku mas produkto na un mihó preis.
Fundashon pa Konsumidó ta konsehá tur konsumidó pa konsultá e lista di komparashon di fruta i bèrdura di luna di òktober i evaluá promé ku hasi kompra. Tambe Fundashon pa Konsumidó ke kordá konsumidónan pa pone bon tinu na momentu di kumpra fruta i bèrdura. Komo ku nos ta biba den un klima kalor, fruta i bèrdura por daña masha lihé. Pues wak, fula i hole fruta i bèrdura bon promé ku kumpra i asina evitá dispidimentu di sèn.
Pa kualke pregunta, remarke, informashon òf sugerensia basá riba e lista di komparashon di preis por bishitá nos wèpsait www.fundashonpakonsumido.org, meil nos na info@fundashonpakonsumido.org, bèl nos na 462-6666 òf pasa serka nos na ofisina na de Ruyterkade 53.