Faltando algun siman pa fakansi grandi finalisá, Fundashon pa Konsumidó ke enfoká riba e importansia di kumpra konsiente i sabí. Fundashon pa Konsumidó konhuntamente ku Ministerio di Desaroyo Ekonómiko (MEO), a hasi anotashon di preis na diferente establesimentu, basá riba artíkulonan pa skol. E meta primordial di e anotashon di preis aki ta pa fasilitá e kompra di mayornan.
Den e periodo di di 14 pa 19 di yüli 2016, a hasi bishita na un total di 19 establesimentu i a anotá e diferente materialnan pa skol ku nan respektivo preisnan. E establesimentunan ku a forma parti di e anotashon di preis aki ta:
Office Stop, La Curaçao Zeelandia, Curaçao Office Supply, Mensing Caminada, Multi Centrum 2000, Señor Barata, Super Barata, Bruna, Office System, Casa Cesar, Building Depot, Home Plu st. Maria i Zeelandia, Samsom Chobolobo, Jan Noorduynweg i Colon, Samsom Digital Plus, Martis Agencies i Alankar Otrobanda.
Pa fasilitá e proseso di ehekushon, Fundashon pa Konsumidó a skohe e 64 artíkulonan di skol mas usá den i a anotá e preis mas barata na tur e establesimentunan. Mester enfatisá ku preisnan di artíkulonan pa skol no ta kai bou di un preis máksimo stipulá pa gobièrnu di Kòrsou, kual ta pone ku kada negoshante ta liber pa pone su mes preis. Den e anotashon di preis aki no a hasi komparashon di e kalidat di artíkulonan.
Mihó surtí
For di nos anotashon di preis, Samsom Chobolobo a resultá e establesimentu mihó surtí ku 58 artíkulo. Na di dos lugá ku un kantidat di 57 artíkulo, Samsom Jan Noorduynweg i Colon. Por último, na di 3 lugá nos ta haña Building Depot ku un total di 52 artíkulo pa skol.
Preisnan variá
Fundashon pa Konsumidó a tuma nota di un kantidat di markanan di artíkulonan pa skol disponibel na e diferente establesimentunan. Tur e variashon di markanan aki ta brinda e posibilidat pa konsumidónan por hasi nan eskoho konsientemente. Un agènda ku plachi por ehèmpel, riba e merkado aktual por kosta entre fl. 14.35 te ku fl. 36.99. Un otro ehèmpel ta map di 23 renchi. Esaki nan por kosta entre fl. 7.95 te ku fl.23.95.
Fundashon pa Konsumidó ta brinda mayornan i tur sobra konsumidónan un lista ku tur e establesimentunan, e artíkulonan disponibel i nan preis. Esaki sigur ta hasi e proseso di búskeda di artíkulonan pa skol na un preis kumbiniente i muchu fásil pa tur mayor.
E lista di anotashon di preis aki ta aksesibel riba nos wèpsait www.fundashonpakonsumido.org. Tambe konsumidónan por pasa libremente na nos ofisina situá na De Ruyterkada 53, bèl nos na (5999) 462-6666 òf pidi un kopia via nos meil info@fundashonpakonsumido.org
Pa finalisá, Fundashon pa Konsumidó ke probechá di e oportunidat pa deseá nos muchanan un aña eskolar sumamente eksitoso. Un aña den kua disiplina i trabou duru mester ta e base fundamental pa alkansá e meta deseá .