Siklo di Kurso di Presupuesto 2015 ta entregá 93 kursista bon formá
Ku hopi satisfakshon Fundashon pa Konsumidó por mira bèk riba un eksitoso siklo di kurso di presupuesto 2015, kual nos a klousurá djasabra 12 di desèmber ku un anochi di entrega di sertifikado. Den un ambiente ameno Fundashon pa Konsumidó a entregá kursistanan nan sertifikado komo muestra ku nan a finalisá e kurso di presupuesto ku éksito.
Den kuadro di su tarea pa konsientisá i eduká konsumidónan, Fundashon pa Konsumidó a organisá pa di 4 aña konsekutivo kurso di presupuesto. Meskos ku tur aña, e biaha aki tambe e kurso tabata bon bishitá pa kursistanan di rònt Kòrsou. Kuminsando na luna di sèptèmber i finalisando e di dos siman di desèmber tabatin diferente grupo ku a sigui e kurso di presupuesto na ofisina di Fundashon pa Konsumidó. Un total di 93 kursista a logra finalisá e kurso di presupuesto 2015 ku éksito.
Durante di e anochi aki sr. Gregory Damoen a trese un charla komo representante di Banko Sentral di Kòrsou i St. Maarten. E charla a hiba e título “Edukashon finansiero for di perspektiva di Banko Sentral”. Den su presentashon sr. Damoen a enfatisá ku Banko Sentral ta dediká na establesé rekursonan pa mehorá edukashon ekonómiko i finansiero públiko. Di akuerdo ku sr. Damoen e motibu pa esaki ta ku bienestar finansiero di kada individuo ta konektá ku desaroyo ekonómiko di un nashon. Desishonnan finansiero tin implikashonnan signifikante riba un individuo su seguridat finansiero i su nivel di bida. Segun sr. Damoen kada mal desishonnan finansiero por resultá den un kantidat di resultadonan negativo, inkluyendo un nivel abou di abundansia/rikesa i nivel haltu di debenan imprudente.
Atraves di su diskurso sr. Damoen a pone atenshon na e tarea di Banko Sentral komo reguladó finansiero pa yuda monitoriá institutonan finansiero su kumplimentu ku leinan ku ta rekerí pa ofresé krédito i otro servisionan finansiero na un manera legal, hustu i imparsial. Relashoná ku e tarea aki sr. Damoen a indiká dos lei nobo ku Banko Sentral a introdusí e aña aki. E promé lei, ta e lei di Disposishonnan tokante Publikashon di Informashon di Preis di Krédito di Konsumo, kual ta enfoká riba protekshon di e konsumidó dor di duna informashon adekuá, lokual ta pèrmití pa e konsumidó tuma desishonnan korekto na momentu ku e ta apliká pa un krédito/fiansa. E di dos lei ta e lei di Disposishon tokante Prevenshon di Ekstenshon Eksesivo di Krédito kual ta enfoká riba prevení ekstenshon eksesivo di krédito na konsumidónan i fomentá práktikanan prudente di ekstenshon di krédito. Sigur un presentashon hopi interesante kaminda a para ketu na e leinan ku ta protehá e konsumidó ku ke hasi un fiansa.
E parti kulminante di anochi tabata e entrega di sertifikado, durante kual algun di e kursistanan a hiba palabra i ekspresá impakto di e kurso riba nan bida finansiero. For di reakshonnan di e kursistanan riba e anochi aki i for di formularionan di evaluashon di e kurso di presupuesto, Fundashon pa Konsumidó ta konkluí ku e kursistanan a eksperensiá e kurso di presupuesto komo un kurso balioso pa nan kresementu i stabilidat finansiero.
Fundashon pa Konsumidó ta felisitá kada kursista ku a finalisá e kurso di presupuesto aki ku éksito. Nos ta spera ku di awor en adelante tur e kursistanan aki pa sigui praktiká tur e tepnan ku nan a risibí durante di e kurso pa nan por biba un bida finansiero salú. Finalmente, Fundashon pa Konsumidó ta deseá nos kursistanan tur kos bon den 2016 i ta invitá komunidat pa keda pendiente pa kursonan nobo ku nos lo brinda den aña 2016.