Resistensia kontra antibiótika
15 di mart 2016, ta Dia Mundial di Derechinan di Konsumidó! E aña aki, un biaha mas, Fundashon pa Konsumidó ta uni forsa ku organisashonnan di konsumidó internashonal, ku ta asosiá na Consumers International, pa pone un tema di sumo importansia pa bienestar di konsumidónan den spòtlait. E biaha aki nos ta elaborá riba e tema “Resistensia kontra antibiótika”.
Resistensia kontra antibiótika ta nombrá komo un di e sinkuenta rísikonan global den e rapòrt di e Foro Ekonómiko Mundial di Riesgonan 2013. Esaki debí na e impakto ku e por tin riba salubridat públiko na nivel mundial. Consumers International i World Health Organisation ta premirá si paisnan rònt mundu no tuma medidanan di prekoushon nesesario pa kombatí resistensia kontra antibiótika, mundu por bai bèk den un époka kaminda ta bira difísil òf kasi imposibel pa kombatí infekshonnan di bakteria.
Den kuadro di e Dia Mundial di Derechinan di Konsumidó, e organisashon internashonal di konsumidónan, Consumers International, ku e kampaña “Kita antibiótikanan for di menú”, ta para ketu prinsipalmente na e echo ku tin mal uso di antibiótika den agrikultura, esaki sigur pa loke ta trata krio di bestia. Mal uso di antibiótika den agrikultura por kontribuí grandemente den minimalisá efektividat di antibiótikanan ku por kombatí infekshonnan di bakteria. Esaki ta nifiká por ehèmpel, si un persona ku tin un infekshon di bakteria haña un antibiótika, e antibiótika por keda sin funshoná pa motibu ku e persona ta karga bakterianan resistente dor di a kome karni di un animal ku tabata karga bakterianan resistente òf pasobra e tabata den kontakto ku un animal ku ta karga bakteria resistente.
“Kita antibiótika for di menú!”
Pa kontrarestá e problemátika aki Consumers International ta mustra ku kadenanan di restorant multinashonal ta den un posishon faborabel pa por forsa un kambio den e uso di antibiótika den sektor di agrikultura. Ku mas ku 100.000 restorant rònt mundu, entre otro McDonalds, Subway i KFC por tin influensia signifikativo riba e demanda di karni na mundu. Segun Consumers International, e restorantnan aki por opta pa bende solamente karninan ku no a wòrdu tratá riba un base rutinario ku antibiótika ku ta wòrdu usá pa remedi humano. E akshon aki na su turno lo por kondusí agrikultornan na mehorá standardnan pa evitá i eliminá uso no nesesario di antibiótika. Di e manera aki agrikultornan por yuda preservá efektividat di remedinan esensial pa hende.
Konsientisashon Prevenshon Resistensia kontra antibiótika
Relashoná ku e Dia Mundial di Derechinan di Konsumidó di e aña aki Fundashon pa Konsumidó a skohe pa informá konsumidónan na Kòrsou kiko ta resistensia kontra antibiótika. Den esaki nos ke para ketu na e impakto ku resistensia kontra antibiótika por tin riba salú di hende i riba salubridat públiko. Nos ke konsientisá konsumidónan ku nan tambe por duna un granito den e kombate kontra resistensia di antibiótika. Tur konsumidó konsiente por yuda den e lucha pa mantené efektividat di antibiótikonan, dor di tene nan mes na algun punto básiko. Pa konkretisá e kampaña informativo aki Fundashon pa Konsumidó lo pasa un programa informativo kòrtiku na plantanan di televishon i radio emisoranan i lo repartí un foyeto di informashon. Fundashon pa Konsumidó ta invitá tur konsumidó pa sintonisá plantanan di televishon lokal, radio emisoranan, nos página di Facebook Fundashon pa Konsumidó i nos wèpsait www.fundashonpakonsumido.org pa tuma nota di e programa informativo i bira un poko mas konsiente di resistensia kontra antibiót