Komparashon di preis di produktonan di prome nesesidat (Mei 2016)

KOMPARASHON DI PREIS PRODUKTONNA DI PROME NESESIDAT DEN SUPERMERKADO i MINIMARKET

Kumpliendo ku su labor di informá i konsientisá konsumidónan, Fundashon pa Konsumidó ta publiká lista di komparashon di preis di produktonan di promé nesesidat pa luna di mei 2016. E anotashon di preis a tuma lugá den e periodo di 11 pa 26 di mei 2016. Pa realisá esaki, Fundashon pa Konsumidó a bishitá 21 establesimentu, kual ta: 2000, Albert Heijn, Arco Iris, Arti’s Otrobanda, Best Buy, Bon Bini, Boulevard, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarkt, Vreugdenhil, L-Z-F Mini Market, Fei Cui, Bonam, Queens, Luna Park i Sta. Maria.

E lista di produktonan ku Fundashon pa Konsumidó a usa ta konsistí di 116 produkto. E produktonan ta repartí den diferente kategoria, entre otro: kos pa hunta den pan, bonchi di bleki, bonchi di paki, maishi di bleki i bòter, sòpi di bleki i bòter, spaguèti i makaroni, aros, ariña di funchi, ariña di pan, zeta dushi, margarina, pasta di tomati, suku, te, kòfi, papa, djus di paki, lechi di paki, lechi bleki, lechi di puiru, stropi, limonada, pasta di djente, habon di baña, ‘toalla sanitario’, habon di laba paña, desinfektante, kloròks i papel di wc.

Bon Bini Supermarket, ku mas produkto na mihó preis na Bon Bini

For di e análisis ku Fundashon pa Konsumidó a hasi pa loke ta trata produktonan di promé nesesidat, Bon Bini a resultá e supermerkado ku tin mas produkto na mihó preis. Na Bon Bini supermarket tabatin 27 produkto na mihó preis for di e lista di 116 produkto. Einan por haña na mihó preis, entre otro: bonchi kòrá (grace), zeta dushi (Vigo/Badia), Margarina (Blue band), tomati pasta (Hunt’s paste/ La Constancia/ Royal), te (Lipton Yellow Label/ Crown), papa (Quacker) i djus (Baggio). E di dos supermerkado ku mas produkto na mihó preis a sali Mangusa Hypermarket ku 21 produkto. Mangusa Rio ta sigui na di tres lugá ku 18 produkto na mihó preis.

Mihó surtí

Resultadonan di e komparashon di preis ta indiká ku e supermerkado mihó surtí pa loke ta trata produktonan di promé nesesidat ta Mangusa Hypermarket ku 94 produkto for di e lista di 116 produkto ku a anotá su preis. Esperamos i Arco Iris ta sigui na di dos lugá ku 91 produkto i na di tres lugá a resultá Bon Bini ku 90 produkto.

Fundashon pa Konsumidó ta enkurashá konsumidónan pa hasi uso di e lista di preis ku nos ta publiká pa fasilitá hasimentu di kompra di produktonan di promé nesesidat. E lista aki ta práktiko tambe den e proseso di trahamentu di un presupuesto di luna balansá.

Pa konsultá e tabelnan, klek aki..!