Un bista riba preisnan di produktonan di prome nesesidat
Siguiendo ku e análisis di preisnan den supermerkado i minimarketnan ku a tuma lugá di 13 pa 23 di febrüari 2016, Fundashon pa Konsumidó, e biaha aki ta pone atenshon na produktonan di promé nesesidat.
E makutu di produktonan di promé nesesidat ku nos a hasi uso di dje pa e komparashon di preis aki, ta konsistí di 118 produkto. E produktonan ta partí den e siguiente kategorianan: kos pa hunta den pan, bonchi di bleki, bonchi den paki, maishi di bleki/glas, sòpi di bleki/paki, spaguèti i makaroni, aros, ariña di funchi, ariña di pan, zeta, manteka, tomati pasta, suku, te, kòfi, cornflakes, djus di fruta, lechi di paki, lechi di bleki, lechi di puiru, stropi, limonada, pasta di djente, habon di baña, toaya sanitario, habon di laba tayó, desinfektante, kloròks i papel di w.c.
Bon Bini, e supermerkado ku mas produkto na mihó preis!
A base di e komparashon di preis ku Fundashon pa Konsumidó a hasi, Bon Bini supermarket a resultá e supermerkado ku tin mas tantu produkto na mihó preis for di e makutu di produktonan di promé nesesidat. Na Bon Bini Supermarket tabatin entre otro, e siguiente produktonan na mihó preis djèm (La Constancia: Pinneappel), sòpi (Unox), funchi fresku (hel), zeta (Vigo i Badia), Manteka (Becel), tomati pasta, suku (Royal), te (Lipton Yellow Label), Quacker, Djus (Gloria Orange). Na di dos lugá a sali Mangusa Rio i Mangusa Hyper, miéntras ku na di tres lugá a sali Esperamos. Den e komparashon di preis aki Fundashon pa Konsumidó no a tene kuenta ku pais di orígen, marka ni kalidat di produkto.
Mangusa Hypermarket, esun mihó surti
For di e komparashon di preis aki, Mangusa Hypermarket a resultá esun mihó surtí ku 99 produkto. Na di dos lugá a sali Esperamos Supermarket ku 94 produkto i na di tres lugá Arco Iris ku 92 produkto. Centrum Mahaai a resultá e supermerkado mihó surtí.
Fundashon pa Konsumidó a tuma nota for di e komparashon di preis aki ku no tin diferensia grandi di preis entre e produktonan di promé nesesidat na e diferente establesimentunan. E diferensia di preis mas haltu ku nos a tuma nota di dje ta fl 6.58 pa ariña di pan Gold Medal. E preis mas abou pa e ariña aki ta Fl 12,41 na Esperamos Supermarket i e preis mas haltu ta fl 18,99 na Boulevard market place. Pa un mihó bista di e preisnan nos ta referí bo na e lista di preis di produktonan básiko ku tambe nos a publiká riba nos wèpsait www.fundashonpakonsumido.org.
Fundashon tei pa sigui informá i sirbi konsumidónan. Si bo tin pregunta òf bo ke mas informashon tokante di komparashon di preis, bo por bishitá nos wèpsait www.fundashonpakonsumido.org i nos página di Facebook Fundashon pa Konsumidó, meil nos na info@fundashonpakonsumido.org, bèl nos na 462-6666 òf por pasa serka nos na ofisina na de Ruyterkade 53.
Pa konsultá e tabèlnan klek aki riba e potret!