KOMPARASHON DI PREIS DI KARNI, fruta i berdura DEN SUPERMERKADO I MINIMARKETNAN
Fundashon pa Konsumidó a bishitá supermerkado i minimarketnan pa anotá preis di karni, belèg, fruta i berdura den e periodo di 11 di mei pa 26 di mei 2016. E anotashon di preis a tuma lugá na 22 diferente establesimentu. Esakinan ta 2000, Albert Heijn, Arco Iris, Arti’s Otrobanda, Best Buy, Bon Bini, Boulevard, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarkt, Vreugdenhil, L-Z-F Mini Market, Fei Cui, Bonam, Queens, Luna Park, Sta. Maria i Ruyterkade Supermarket. Pa fasilitá konsumidónan ku hasimentu di kompra, Fundashon pa Konsumidó ta pone preisnan anotá di karni, belèg, fruta i berdura den un lista. Konsumidónan por hasi uso di e lista pa kompará e produktonan na e diferente establesimentunan pa haña un mihó bista kua produkto ta optenibel i na mihó preis na kua establesimentu. E lista aki por yuda konsumidónan pa kumpra kaminda ta kumbiní nan mas dependiente di nan saku i nesesidatnan.
Centrum tin mas produkto di karni, belèg, fruta i berdura na mihó preis
Di akuerdo ku e lista di komparashon di preis ku Fundashon pa Konsumidó a traha, Centrum Mahaai i Centrum Piscadera a resultá e supermerkadonan ku mas produkto na mihó preis. Na ámbos supermerkado tabatin 17 produkto na mihó preis for di e lista di 82 produkto ku a hasi anotashon di dje. Produktonan ku por haña na mihó preis na e dos filialnan di Centrum ta, ‘Sirloin Steak’, ‘sucadelappen’, karni kabritu (eis), rabu di baka, karni sòpi ‘schekelbeen’, mondongo, ‘loin ribs’, ‘whole legs’, ‘jonge kaas’, ‘schouderham’, wòrs salu, pampuna, banana, prei, kiwi, pera i milon (hinté). Vreugdenhill a resultá na di dos lugá ku 16 produkto na mihó preis.E dos Mangusanan ta mihó surtí! E supermerkadonan mihó surtí pa lokual ta trata karni, belèg, fruta i berdura a resultá Mangusa Rio i Mangusa Hypermarkt. Na e establesimentunan aki tabatin 62 produkto for di e total di 82 Produkto ku Fundashon pa Konsumidó a anotá preis di dje. Na di dos lugá a resultá Esperamos Supermarket ku 61 produkto, miéntras na di tres lugá a sali Bon Bini ku 60 produkto. Diferensia grandi di preis Fundashon pa Konsumidó a tuma nota ku tin un diferensia grandi di preis entre sierto produktonan. Por ehèmpel 1 kilo di ‘schouderham’ ta kosta Nafl. 9,21 na Centrum, miéntras ku na Bonam Supermarket e mesun kilo di ‘schouderham’ ta kosta Nafl. 25,-. Un kilo di ‘jonge kaas’ ta kosta Nafl, 9,21 na Centrum i na Queens e ta kosta Nafl. 24,95. Un kilo di ‘beefmula’ ta kosta Nafl. 12,95 na Boulevard i Nafl. 24,38 na 2000. E diferensianan di preis aki por ta depende di diferente faktor, entre otro marka di e produktonan, pais prosedente di importashon i kalidat di e produktonan. Fundashon pa Konsumidó ta partisipá ku no a tene kuenta ku e faktornan aki den e komparashon di preis aki.Pa konsultá e tabelnan, klek aki..!Fundashon pa Konsumidó ta sugirí tur konsumidó pa konsultá e lista di komparashon i traha un lista di kompra promé ku bai tienda. Esaki ta hopi importante pa evitá ku ta kumpra kos i gasta sèn innesesariamente. Komo konsumidó, bo tin derechi di eskoho, pues nos ke enkurashá bo pa skohe konsiente i sabí.Pa kualke pregunta òf remarke tokante di e komparashon di preis por yama nos via telefòn 462-6666.