Klek riba e link pa download.
Ku regularidat Fundashon pa Konsumidó ta bishitá establesimentunan na Kòrsou pa hasi anotashon di preis. Na e okashon aki, Fundashon pa Konsumidó a hasi anotashon di preis di produktonan di fruta i berdura na supermerkado i minimarketnan.
E 21 establesimentunan ku Fundashon pa Konsumidó a anotá preis di fruta i berdura na dje ta: 2000, Arco Iris, Arti’s, Best Buy, Bon Bini, Boulevard Market Place, Centrum Mahaai, Centrum Piscadera, Colon, Esperamos, Exito, Mangusa Rio, Mangusa Hypermarket, Ruyterkade, Vreugdenhil, LZF, Fei Cui, Bonam, Queens, Luna Park i Sta. Maria.
E anotashon di preis a tuma lugá di 13 pa 23 di febrüari 2016.
Bon Bini i Centrum, tin mas fruta i berdura na mihó preis
For di e komparashon di preis ku Fundashon pa Konsumidó a hasi, Bon Bini, Centrum Mahaai i Piscadera a resultá e supermerkadonan ku tin mas fruta i berdura na mihó preis, ku 7 produkto. Na Bon Bini por haña tomati venezolano, broccoli, anasa (usa), apel (Golden Delicious), apelsina merikano, mango i papaya na mihó preis. Awakati, prei, wòrtel (jumbo), kiwi, pera, apel (Red Delicious), i dreifi pretu ta mas barata na Centrum Mahaai i Piscadera. Den e komparashon di preis aki Fundashon pa Konsumidó no a tene kuenta ku pais di orígen, marka ni kalidat di produkto.
Mangusa Hypermarket, mihó surtí den fruta i berdura!
Mangusa Hypermarket ta e supermerkado mihó surtí pa loke ta trata fruta i berdura. Na Mangusa Hypermarket tabatin 31 produkto for di e lista di 46 fruta i berdura ku Fundashon pa Konsumidó a hasi uso di dje pa anotá preis. E di dos supermerkado a resultá Mangusa Rio ku 30 produkto. Na di 3 lugá a sali Bon Bini, Centrum Mahaai i Piscadera, tur tres ku 28 produkto.
Fruta i berdura ta esensial pa bo salú! Pues Fundashon pa Konsumidó ke stimulá nos konsumidónan pa kumpra i kome fruta i berdura riba un base regular. Nos ke rekordá nos konsumidónan pa kumpra fruta i berdura ku atenshon, pa no resultá ora ku yega kas tin un kantidat di fruta i berdura putrí. Si ta kumpra fruta i berdura den un paki òf saku grandi, kontrolá esaki bon. Hopi biaha por tin un òf otro fruta dañá ku bo no ta mira mesora. Fundashon pa Konsumidó ta sugirí tur konsumidó pa kumpra e kantidat di fruta ku por kome denter di un siman. Preferibel no kumpra un kantidat di fruta ku no ta kaba mesora, pasobra fruta i berdura por daña hopi lihé. Riba nos wèpsait tin algun tep balioso pa tene kuenta kuné na momentu ku ta bai kumpra fruta i berdura.
Pa mas informashon tokante di komparashon di preis di produktonan di karni tuma kontakto ku Fundashon pa Konsumidó na telefòn 462-6666, via e-mail info@fundashonpakonsumido.org òf nos paginá di Facebook Fundashon pa Konsumidó.
Pa konsultá e tabèlnan klek aki riba e potret!