Komunikado di prensa

Ku regularidat Fundashon pa Konsumidó ta publiká komunikado di prensa ku e meta pa informá konsumidónan di e último desaroyonan relashoná ku konsumidó. Riba e página aki bo por haña akseso na tur e komunikadonan ku Fundashon pa Konsumidó publiká.

KOMPARASHON DI PREIS DI MAKUTU DI KARNAVAL (JAN. 2016)

Pago hasí via Pagafásil i Pagomátiko ta rísiko di Aqualectra

Dia 10 di novèmber 2015 hues a duna veredikto den e huisio sumario ku Fundashon pa Konsumidó a entamá kontra Aqualectra i ku a keda presentá dilanti di korte riba 5 di novèmber. Fundashon pa Konsumidó a kuminsá e kaso aki kontra Aqualectra  basá riba diferente señalnan di konsumidónan ku a keda perhudiká dor di e desishon di Aqualectra pa no aseptá kèsh mas na su ofisinanan di pago na Sta. Rosa i Sta. Maria.

Den su veredikto korte a dikta na fabor di Aqualectra i no a honra e petishon di Fundashon pa Konsumidó pa revoká e desishon di no aseptá sèn kèsh. Korte ta di opinion ku e konsumidó por hasi uso di e puntonan di pago di Pagafásil òf Pagomátiko komo alternativa. Ku esaki hues ta duna di konosé ku e desishon di Aqualectra pa no aseptá pago kèsh mas na su ofisinanan no ta perhudiká konsumidónan klientenan di Aqualectra. Fundashon pa Konsumidó ta respetá desishon di korte pero ta lamentá esaki, ya ku den práktika a resultá ku tin konsumidónan ku ta keda perhudiká pa e desishon unilateral di Aqualectra. Apesar di e veredikto aki, Fundashon pa Konsumidó ta haña ku tin un punto positivo den e veredikto.

Korte a dikta ku den e veredikto ku, for di momentu di pago, Aqualectra ta karga rísiko di pagonan hasí na e mas ku 200 puntonan di pago di Pagafásil i Pagomátiko. Hues ta dikta ku si un konsumidó paga via di Pagafásil òf Pagomátiko, e konsumidó a kumpli ku su deber di pago. Esaki ta nifiká ku basá riba e veredikto, Aqualectra mester aseptá tur komprobante di pago di Pagafásil i Pagomátiko komo komprobante di pago di Aqualectra. Si akaso algu bai robes den e transakshon entre Pagafásil/Pagomátiko i Aqualectra, Aqualectra ta keda responsabel pa esaki. Si un kliente por mustra su komprobante di pago di Pagafásil òf Pagomátiko, Aqualectra no por stòp suministro di awa i/òf koriente. Tampoko Aqualectra no por kobra e konsumidó gastunan adishonal si akaso interumpí suministro di awa i/òf koriente tòg, despues ku e kliente ya a paga via Pagafásil i Pagomátiko.

Fundashon pa Konsumidó ta konsehá konsumidónan pa semper warda nan faktura na momentu ku nan hasi pago na puntonan di Pagafásil òf Pagomátiko. I si dado kaso, abo komo konsumidó tin un keho, manda esaki na Aqualectra i Fundashon pa Konsumidó. Por tuma kontakto ku nos via nos telefòn 462-6666, of meil: info@fundashonpakonsumido.org.

VAKATURE JURIDISCH BELEIDSMEDEWERKER

Fundashon pa Konsumidó is een groeiende, dynamische en onafhankelijke stichting die als doel heeft de belangen van de Curaçaose consumenten te behartigen. 

Ter versterking van ons team zijn we op zoek naar een:

Juridisch Beleidsmedewerker

Als Juridisch Beleidsmedewerker bij de Fundashon pa Konsumidó bekleed je een brede en uitdagende functie met een divers takenpakket. Je bent gezamenlijk met de directeur van het bureau “de spin in het web” en houd je bezig op diverse terreinen. Van juridisch onderzoek, beleidsontwikkeling, belangenbehartiging, ontwikkeling van conceptwetgeving, klachtenbehandeling, commissiezittingen en overlegorganen tot het beantwoorden van dagelijkse vragen en juridisch begeleiden van consumenten.

Wat houdt de functie in?

  • Je volgt ontwikkelingen op het gebied van consumentenrecht en adviseert de directeur hierover.
  • Je onderzoekt bestaande consumentenwetgeving en doet voorstellen voor optimale implementatie en handhaving hiervan.
  • Je onderhoudt externe contacten met overheidsdiensten, brancheorganisaties, bedrijven en andere belangenorganisaties over juridische aangelegenheden.
  • Je bent de trekker van of deelnemer aan de diverse projecten en werkgroepen die je werkveld geheel of ten dele raken.
  • Je doet beleidsvoorstellen aangaande relevante thema’s en verzorgt het beleidsplan van de stichting op het gebied van consumentenrecht.
  • Je bent verantwoordelijk voor het proces van bemiddeling tussen bedrijven en consumenten die ons benaderen voor het oplossen van hun consumentenklachten. Daar waar nodig vertegenwoordig je onze cliënten als gemachtigde in een rechtzaak.

Wie zoeken wij?

  • Wij zoeken een allround Juridisch Beleidsmedewerker met een bestaand netwerk.
  • Je beschikt naast een academische titel (jurist), actuele kennis van en ervaring met inhoud én uitvoering van wet- en regelgeving en beleidsontwikkelingen op het gebied van consumentenrecht.
  • Je beschikt over uitstekende onderhandelingstechnieken en overtuigingskracht.
  • Je bent flexibel, resultaatgericht, zelfstandig, pro-actief, creatief en staat stevig in je schoenen.
  • Je bent gewend snel te schakelen en te improviseren, je hebt een goed ontwikkeld analytisch vermogen en komt snel tot de kern van de zaak.
  • Je bent in staat om dieper in de verschillende onderwerpen te duiken en tegelijkertijd deze, meestal complexe, materie op eenvoudige wijze weer te geven.
  • Je hebt affiniteit met de consumentenproblematiek en de doelstelling van de Fundashon pa Konsumidó. Je bent in staat om trends te signaleren en kansen te creëren om op te komen voor de belangen van consumenten.
  • Naast een goede beheersing van Papiaments beheers je de Nederlandse, Spaanse en Engelse taal goed.
  • Je bent klantgericht en kan optimaal functioneren in teamverband.
  • Je bent sociaal, communicatief én schriftelijk sterk.

Ons aanbod

Wij bieden een zelfstandige, uitdagende functie met veel ruimte voor eigen verantwoordelijkheid en met strategische en tactische uitdagingen. De functie is een afwisselend baan waarin je jezelf persoonlijk goed kan ontwikkelen. Salariëring zal afhankelijk zijn van opleiding en ervaring.

Voel je door ons aangesproken?

Dan ontvangen wij graag je sollicitatiebrief met motivatie vòòr 31 augustus 2015, gericht aan de Fundashon pa Konsumidó, ter attentie van de heer Marc Marshall, De Ruyterkade 53 of mail naar mmarshall@fundashonpakonsumido.org.

Mocht je nog vragen hebben, dan kunt je contact opnemen met mevrouw Anne-Mae Josephina op telefoonnummer 462-6666.

TA BÈRDAT KU RIBA TUR PRODUKTO TIN 6 LUNA DI GARANTIA PA LEI?

TA BÈRDAT KU RIBA TUR PRODUKTO TIN 6 LUNA DI GARANTIA PA LEI?

Resientemente Fundashon pa Konsumidó a tuma nota ku tin basta konfushon ta reina den komunidat despues di publikashon di un artíkulo den un matutino lokal. E artíkulo a indiká ku un konsumidó tin derechi riba mínimo 6 luna di garantia riba tur produkto. A base di e artíkulo aki algun negoshante ta vosiferá ku un konsumidó tin derechi riba solamente 6 luna di garantia pa lei. Pues segun e negoshantenan si 6 luna a pasa ora ku e produkto haña un defekto nan no ta obligá na nada! Esaki no ta e kaso! 

A base di art. 7:17 insiso 1 di nos Kódigo Sivíl e produkto ku un konsumidó kumpra mester ta konforme e akuerdo di kompra. Lei además ta indiká den e siguiente insiso ku un produkto no ta konforme e akuerdo di kompra si, tene na kuenta ki sorto di produkto e ta i lokual e negoshante a bisa tokante e produkto, e produkto no ta kumpli ku e karakterístikanan ku e konsumidó tin mag di ferwagt. E konsumidó tin mag di ferwagt ku e produkto ta kumpli ku e karakterístikanan ku ta nesesario pa uso normal i di kual e no mester a kuestioná presensia di dje i tambe e kualidatnan nesesario pa uso speshal di e produkto si esaki ta loke a kumbiní ora a sera e akuerdo.

Pues e pregunta ku e konsumidó mester hasi ta: “Ta normal ku e produkto a haña e defekto aki? Ta algu ku mi mester a ferwagt?” Por ehèmpel: Ta normal ku un I-Phone ta daña den ménos ku 2 luna despues di kompra òf ku e televishon ‘flatscreen’ den 1 aña despues di kompra no ta traha mas?

Si e kontesta riba e pregunta ei ta un nò, lei ta duna e konsumidó sierto derechinan. A base di art. 7:21 insiso 1 i insiso 2 di Kódigo Sivíl, si e produkto no ta konforme e akuerdo di kompra, e konsumidó por eksihí a) entrega di lokual falta grátis; b) pa e negoshante drecha e produkto grátis, a ménos ku ta rasonabel ku e negoshante no por kumpli ku esaki i c) pa e negoshante remplasá e produkto grátis, a ménos ku e defekto ta muchu chikí pa hustifiká esaki òf e konsumidó no a sòru pa e produkto ku koutela manera por wòrdu ferwagt di dje.

E promé 6 lunanan despues di kompra konsumidó ta pará  hopi fuerte si produkto haña defekto

Lei no ta mara e derechinan aki na un periodo di tempu! Lei ta duna un sospecho ku si e produkto daña den e promé 6 lunanan despues ku e konsumidó a kumpra e produkto, e produkto no tabata konforme e akuerdo di kompra for di momentu ku a entregá e produkto na e konsumidó. Esaki a ménos ku e sorto di produkto òf e sorto di defekto ta oponé na e lei aki. Algún ehèmpel ta produktonan ku ta daña lihé manera fruta i defektonan manera raspá na un produkto pasobra el a kai. Pues den e promé 6 lunanan despues di kompra e konsumidó ta pará hopi fuerte si e produkto haña un defekto komo ku ta e negoshante tin ku prueba ku el a entregá e konsumidó un produkto konforme e akuerdo di kompra i ku ta pa falta di e konsumidó e produkto a haña un defekto. E sospecho legal aki no ta nifiká ku si e produkto daña despues di 6 luna e konsumidó no tin derechi riba reparashon grátis òf remplaso grátis di e negoshante!

Den e próksimo simannan Fundashon pa Konsumidó lo saka un foyeto ku tur informashon riba e tópiko di garantia!

FERIA DI SALU DEN KUADRO DI DIA MUNDIAL DI DERECHINAN DI KONSUMIDO 2015

Feria di salú 15 di mart 2015

Dia 15 di mart próksimo Fundashon pa Konsumidó, huntu ku otro organisashonnan rònt mundu ku ta bringa pa derechinan di konsumidó, lo selebrá Dia Mundial di Derechinan di Konsumidó 2015.

E tema e aña aki lo ta e derechi di kada konsumidó riba alimentashon saludabel.

Volksgezondheid Instituut Curaçao a base di un investigashon hasí na aña 2013 a raportá ku 62,6% di hende hòmber i 67,3% di hende muhé na Kòrsou tin sobrepeso òf ta obeso. Personanan ku tin sobrepeso òf ta obeso tin mas chèns di haña malesanan manera preshon haltu, diabétis mellitus tipo 2, diferente sorto di kanser, problemanan respiratorio i diferente otro komplikashonnan di salú. For di datonan di e senso di CBS hasí na aña 2011 a bini dilanti ku e malesanan ku tin lenk ku sobrepeso òf obesidat ta malesanan ku mas tantu persona tin aki na Kòrsou. Pa kambia e trènt aki, nos tin ku ban kome kumindanan mas saludabel i move mas tantu.

Fundashon pa Konsumidó riba dia 15 di mart 2015 lo organisá un feria di salú na Wilhelminaplein di 8 or di mainta te 3 or di atardi. e feria lo konta ku partisipashon di Sosiedat Kurasoleño di Diabétiko (SOKUDI), Prinses Wilhelminafonds, Curaçao Heart Foundation, Fundashon Alton Paas, Sociale Verzekeringsbank (SVB), Stichting Ontwikkeling Land- en Tuinbouw Nederlandse Antillen (Soltuna), Fundashon Servisio Edukashon, Hogar i Salú, Manrique Capriles i Maneho Agrario i Peska (LVV). Tambe dietista Blom di In Balance i dietista Fraai-Rojer lo tei pa duna informashon.

Riba e dia aki lo tin posibilidat pa tur ku ta interesá hasi un tèst di suku, kontrolá preshon i pa 50 persona hasi tèst di kolèsteròl. Serka e dietistanan kada persona por hasi un BMI-tèst pa saka afó si e tin sobrepeso òf e ta obeso.

Ademas di tur esaki entre 8 or i 12 or lo tin diferente trainer ku lo duna seshonnan di Yoga, Zumba, Taeboo, Aerobics i Pilates. Pa sierto seshonnan di moveshon ta nesesario pa hasi uso di un mat. Fundashon pa Konsumidó tin algun mat, pero esakinan ta limitá. Pues si bo tin bo mes mat, nos ta konsehá bo bini kuné pa asina bo no kore e rísiko ku mat ta kaba. E instruktornan lo ta Janina Ilha, Charlyne Balentina, Angelina Bakhuis, Ruth Croes i Camila Pinzon.

Un danki ta bai na Fundashon Alton Paas ku ta regla e parti di moveshon riba e dia aki. E diferente tèstnan ku bo por laga hasi riba e dia aki i tambe partisipashon na e seshonnan di moveshon lo ta kompletamente grátis!

Tambe pa tur esnan ku ke kuminsá planta nan mes bèrdura, Soltuna lo bende planchi i bèrdura! Pa e muchanan lo tin bouncer i pòpkòrn. Pòpkòrn lo ta grátis pero esaki naturalmente ta limitá.

Pues shonnan bini unu, bini tur! Nos ta konta ku boso presensia! Bin pasa un ratu agradabel ku nos selebrando nos derechinan komo konsumidó.

Kòrda bon: Konsumidó ta nos tur!

**Pa lesa e raport di Volksgezondheid Instituut Curacao tokante sobrepeso i obesidat, klek aki.

PREIS DEN REKI OF PREIS NA KAHA TA ESUN VALIDO...? (juli/aug 2014)

PREISNAN DEN RÈKI TA VÁLIDO

Ku regularidat Fundashon pa Konsumidó ta risibí keho tokante diferenshanan di preis den supermerkado na momentu ku kompará preisnan den rèki i esnan ku bo ta paga na kaha. A base di e señalnan aki Fundashon pa Konsumidó a hasi resientemente un petishon na departamentu di Inspekshon Ekonómiko, ku tin outoridat pa kontrolá, pa hasi un investigashon i kompará preisnan na kaha i den rèki di diferente produkto na un selekshon di supermerkado.

Den e periodo di 29 di yüli pa 4 di ougùstùs 2014 Inspekshon Ekonómiko a tuma muestra di alrededor di 40 produkto den e siguiente supermerkadonan: Albert Heijn, Arco Iris, Best Buy, Centrum Piscadera, Esperamos i Mangusa Supermarket Rio Canario. A anotá e preis den rèki di e produktonan selektá i, pa por a hasi e komparashon di un manera mas real, a kumpra e produktonan aki pa asina tin tambe e faktura ku e preis na kaha riba dje pa hasi un komparashon mas verídiko.

Pa resultado kompletu di e investigashon, nos ta referibo na e sekshon

“Kompara i Kumpra” di nos revista digital “Konsumidó Alertá” edishon nr. 9.

Pa konsultá e tabelnan so, klek aki...!!

 

EDISHON NR. 1 - Introdukshon Revista Digital (Novèmber 2013)

LANSAMENTU REVISTA DIGITAL

“Konsumidó Alertá”

Fundashon pa Konsumidó tambe ta bai ku tempu.

Den e era digital aki Fundashon pa Konsumidó a lansa resientemente su revista digital riba merkado. Un revista moderno ku ta aksesibel i fásil pa lesa via bo kòmpiuter, smartphone of tablèt. Entrante mañan edishon number dos di nos revista digital ta online i aksesibel pa komunidat por disfrutá di dje. E edishon aki ta kontené temanan interesante i informativo p.e. komparashon di preis di makutu di Pasku, Fèrf i tambe tepsnan práktiko pa dianan di fiesta. Tambe tin informashon balioso pa e konsumidó ku tin pensa di kumpra un outo den e aña benidero. Pa mas informashon i suskripshon, por mail Fundashon pa Konsumidó ku bo nòmber i e-mail na info@fundashonpakonsumido.org i risibí akseso na e revista digital aki.

Kòrsou, 19 dezèmber 2013

Introdukshon di preis di konsumidó

For di promé di òktober tur preis di benta mester ta inkluso OB

E kambio di lei di OB di 1 di mei 2013 no solamente a introdusí un sistema ku mas ku un tarifa di OB, pero tambe a trese un kambio den e manera ku e komersiantenan tin ku pone preis pa produkto- i servisionan ku nan ta bende. Un kambio importante ta e prohibishon pa un komersiante pa pone su preisnan sin inkluí OB den  e preis.

 

 

 

 

 

 

 

 

 

Na mei 2013 komersiantenan a  pidi tempu pa nan por hasi adaptashonnan nesesario na entre otro nan sistema di kasa promé ku e lei a drenta na vigor i keda implementá. Minister di Finansa riba 28 di mei 2013 a saka un “aanschrijving” pa regla esaki kaminda komersiantenan a haña te ku 1 di òktober 2013 pa hasi nan kambionan nesesario i pone preisnan ku ta inkluí OB pa tur produkto i servisio. Pues komersiantenan a haña 4 luna di tempu pa adaptá tur nan preisnan pa asina esakinan kumpli ku lokual lei ta preskribí.

Pa evitá spekulashon ku preisnan e lei ta preskribí tambe un periodo di transishon den kua pa tur produkto mester indiká dos preis, e preis inkluso OB  i e preis sin OB. E periodo di transishon aki ta kana di 1 òktober 2013 te ku 1 yanüari 2014. Komo ku den algun sektor indikashon di dos preis por trese problemanan práktiko, Minister a stipulá tambe ku ta na e komersiante mes, dependiendo di e sorto i tamaño di su establesimentu, kon e ta kumpli ku e obligashon aki. E komersiante por keda sin pone e preis sin OB riba kada produkto- i servisio individual tanten e konsumidó di un otro forma por sigui desaroyo di e preisnan aki p.e. pa medio di un karta di menú bieu den un restorant. No opstante esaki, e negoshante mester duna e informashon na e konsumidó ku puntra i hasi e desaroyo di preis di su produkto- i servisionan transparente.

Mas aleu, for di 1 òktober tur bòn òf faktura mester menshoná e preis inkluso OB. Tambe riba e bòn mester indiká kua tarifa e komersiante a usa riba kua produkto anto abou riba e bòn e total ku bo a paga na OB. Pues Fundashon pa Konsumidó ke alertá tur konsumidó pa ta atento! Na dado kaso ku komersiantenan keda sin kumpli ku lei i stipulá nan preisnan sin OB, bo por entrega un keho serka nos. Pa kualke pregunta òf  informashon por pasa na nos ofisina situá na De Ruyterkade 53 òf tuma kontakto ku nos via nos number di telefòn 462-6666 òf email: info@fundashonpakonsumido.org

Edukashon di nos yunan ta e invershon ku ta paga mihó interes

Mensahe pa aña eskolar nobo di Fundashon pa Konsumidó

Fundashon pa Konsumidó ke hasi uso di e espasio aki pa deseá tur nos studiantenan ku a sali pa eksterior pa desaroyá i enrikesé nan mes, forsa, sabiduria i perseveransia pa logra e meta ku nan ta bandoná nos dushi isla kuné. Edukashon ta e hèrmènt mas importante pa desaroyo personal di kada unu di nos. Hasi bon uso di kada oportunidat i habri wowo, orea i mente pa siña algu nobo i algu otro.  Dediká bo tempu valioso pa kaba bo estudio. I ora bo ta leu fo’i kas tambe siña komprondé kulturanan diferente i maneranan di traha otro i saka algu positivo for di kada eksperiensha ku bo pasa aden. Pa na momentu ku bo ta bèk riba nos dushi Kòrsou bo ta prepará pa yuda fortifiká futuro di nos nashon. I traha na bienestar di bo famia, bo bario i bo pais.

Pa mayornan i nos hóben i muchanan ku lo kuminsá un aña eskolar nobo aki na Kòrsou tambe Fundashon pa Konsumidó ke ekstendé e mesun mensahe di animo i deseo di éksito. Aunke ku tempu por ta difísil, mira mas leu ku e bareranan den kaminda i  kòrda riba e meta ku abo ke alkansá pa bo mes òf pa bo yunan. Pensa positivo, lucha i bringa pa yega kaminda bo ke ta. Edukashon di nos yunan ta e invershon ku ta paga mihó interes.

Komo mayor, partisipá aktivamente den edukashon di bo yu. Mustra interes den estudio di bo yu na kas i organisá  komishonnan di mayor pa tin influensha den maneho di e skol i di gobièrnu tokante di por ehèmpel bendementu di unifòrm, enseñansa liber i kontribushonnan ku bo mester paga. Hasi kompra pa skol konsiente usando e komparashon di preis “Back to School“ di Fundashon pa Konsumidó i tambe hasi uso di posibilidatnan ku gobièrnu ta brinda manera transporte pa skol grátis, si bo ta ménos pudiente.

Komo representante di nos konsumidónan na Kòrsou, Fundashon pa Konsumidó ta kere i invertí den nos hóbennan, ku ta futuro di nos nashon. Dunando charlanan na skolnan pa eduká i konsientisá nos hóbennan i muchanan. Semper ku e meta pa alsa kalidat di bida i duna aporte na desaroyo di nos futuro generashon.

Kurso di Presupuesto 2013

Oportunidat úniko aki pa siña manehá bo sèn mas mihó.

Bo a gasta tur bo sèn na e fakansi di bo soño? Kompranan pa “back to school” pa bo muchanan a lagabo sin muchu forsa finansiero? Bo ta sinti ku sèn ta kaba lagabu ku mitar luna pa bai?     

Fundashon pa Konsumidó, den kuadro di su maneho pa konsientisá nos konsumidónan, ta kuminsá den luna di ougùstùs ku su di dos seri di kurso di presupuesto. Meta di e kurso aki ta pa siña nos konsumidónan kon pa manehá nan entrada mihó.

Kosto di bida ta subi i hopi di nos ta konstatá ku dia pa dia bida ta mas difísil pa kumpli ku tur nos obligashonnan. Banda di esaki mundu di merkadeo tur dia ta tenta nos ku kosnan nobo pa kumpra, ku ta hasi tin ora difísil pa resistí e tentashon di kumpra kosnan ku no ta nesesario. Ta p’esei ta hopi importante pone prioridat den bida pa por biba un bida finansiero sano.

Den e kurso di presupuesto di Fundashon pa Konsumidó nos lo pone atenshon na entre otro:

  • kon manehá bo sèn mas mihó;
  • siña kontrolá bo gastunan;
  • fia sèn? kuantu esaki lo kostami? mi por page bek?;
  • teps i informashon tokante sparmentu;
  • kon pa gasta ménos koriente,kon kumpra konsiente.

Pa esnan ku mester di mas guia tin posibilidat na final di e kurso pa risibí sigui un trayekto personal di guia.  Meskos ku den e kurso eksitoso di aña pasá nos tin e intenshon di sera e kurso ku un “Supermarket Tour” kaminda bo ta haña bon tepnan pa ora di hasi kompra den supermerkado.

Bo kier sa mas? Tuma kontakto ku Fundashon pa Konsumidó na nos number di telefon 462-6666 òf via nos mail: info@fundashonpakonsumido.orgPartisipashon ta GRATIS..!!

Pa Formulario di inskripshon: klek aki..!

*Tene kuenta ku kurso nobo ta kuminsá segun un grupo yena…! Pa info di fechanan siguiente: 462-666 òf info@fundashonpakonsumido.org

Enkuesta Fundashon pa Konsumidó

Kon bo ta haña nos servisio? Fundashon ta profilá na bo satisfakshon? Kiko bo kier mira mehorá?

 Por fabor klek riba e link aki bou pa yena e enkuesta:  

http://fppvu.qualtrics.com/SE/?SID=SV_85QT7ow0HqGOxBb

 

 

Nos tur komo konsumidó a yega di pasa den situashonnan kaminda nos no tabata satisfecho ku un produkto òf servisio ku nos a kumpra. Pero no ta tur konsumidó sa kon pa solushoná problemanan ku por surgi komo ku hopi di nos no ta na altura di nos derechinan òf sa unda nos por akudí pa haña informashon i ayudo.  Ademas,  kambionan den lei i den maneho tambe ta afektá nos konsumidónan, tantu individual i komo grupo. Pues ta hopi importante pa bo ta bon informá tokante bo deber i derechinan komo konsumidó.

Un di tareanan prinsipal ku Fundashon pa Konsumidó tin ta pa sigui desaroyonan ku ta konserní i por afektá abo komo konsumidó. Pa por sirbi nos konsumidónan di e forma nesesario Fundashon pa Konsumidó ke sa kiko bo ta balorá di Fundashon pa Konsumidó i tambe kiko abo ta haña importante pa e fundashon hasi pa e konsumidónan. Esaki nos ke logra pa medio di un enkuesta kòrtiku.

Ku bo yudansa Fundashon pa Konsumidó ta spera di por alsa e kalidat di servisio na abo komo konsumidó. P’esei nos ta pidi pa bo partisipá i kompletá e enkuesta, komo ku ta sumamente importante pa e opinion di tur konsumidó wòrdu representá.

Pa yena e enkuesta por klek riba e link:http://fppvu.qualtrics.com/SE/?SID=SV_85QT7ow0HqGOxBb

E resultadonan di e enkuesta lo wòrdu publiká riba nos wèpsait i nos página di Facebook na forma di un resúmen pa protehá anonimidat di abo enkuestadó.

Nos ta apresiá bo partisipashon.

Pa pregunta tokante e enkuesta i/òf e resultadonan por tuma kontakto ku Laura Dirksz of Eugelyne Mongen na Fundashon pa Konsumidó. Telefòn: (599-9) 462-6666. Tambe bo por pasa na nos kantor na De Ruyterkade 53, Punda. Òf manda nos un e-mail na info@fundashonpakonsumido.org

Enkuesta Fundashon pa Konsumidó bou di Studiante

Resultado di enkuesta di Fundashon pa Konsumidó bou di Studiante riba World Consumers Right Day 2013

Den kuadro di World Consumer Rights Day 2013, Fundashon pa Konsumidó (FpK) a tene charlanan informativo na diferente skolnan sekundario na Kòrsou. A probechá di e oportunidat aki pa hasi un enkuesta bòu di e studiantenan tokante nan konosementu di FpK i su servisionan.

Un total di 113 studiante a yena e enkuesta. E partisipantenan a konsistí di 84 mucha muhé (74%) i 29 mucha hòmber (26%) ku un edat averahe di 18 aña. E resultado di e enkuesta lo wòrdu presentá den e siguiente figuranan interaktivo ku nan splikashon. Pa mas detaye klek riba e lenk.

http://infogr.am/enkuestanaskol-56/

Pa un impresion di pòrtrètnan saká riba e dia Internashonal di drechinan di konsumidó klek riba e lenk aki bou:

http://www.fundashonpakonsumido.org/galeria-di-p%C3%B2rtr%C3%A8t

KAMBIO TARIFA OB (Mei 2013)

KAMBIO TARIFA OB (Mei 2013)

Kambio di tarifa di Impuesto riba benta ku a drenta na vigor entrante 1 mei 2013. Pa e lista di produktonan klik aki

Fundashon investigando preisnan di botika. Novo esun ku mihó preis.

Fundashon investigando preisnan di botika.

Novo esun ku mihó preis.

Resientemente Fundashon pa Konsumidó a investigá preisnan di produktonan di botika ku mas ta wòrdu kumprá dor di nos konsumidónan. Meta di e investigashon aki ta pa haña un mihó bista riba e desaroyo di preisnan riba merkado lokal, en espera di posibel oumento di OB di 6% pa 9% riba sierto produktonan . Komo ku a keda anunsiá ku posiblemente pa mart 2013 e oumento di OB lo keda implementá, fundashon ta haña ta importante pa kuminsá vigilá e preisnan pa komersiantenan no kuminsá probechá for di awó di e posibel oumento aki. E anotashon di preis a tuma lugá entre 17 -26 Yanüari 2013. Nos a anotá preisnan di un total di 163 produktonan, ku ta varia for di puiru, deodorante, toaya femenino, pomada, body lotion, shampu/conditioner, relaxer pa kabei i pintura, palitu pa limpia orea, katuna, remover pa uña, zalf pa kurpa, krema pa feita i tambe splash lotion.

Loke a resaltá durante di e investigashon di preis aki ta ku diferente botikanan no tabata tin markanan popular, manera “Pampers” i “Huggies”, den nan surtimentu na momentu ku Fundashon a bishitá e establesimentunan pa asina anotá e preisnan di e produktonan. Di otro banda nos ta konstatá ku tin un variashon grandi di markanan ménos konosí riba merkado. Merkado lokal ta ofresé muchu mas variashon. Pa e motibu aki ta importante pa nos konsumidónan paga tinu riba kalidat di e produktonan nobo aki. Tene kuenta tambe ku no nesesariamente markanan deskonosí pa definishon tin un kalidat inferior na markanan mas popular.

BOTIKA NOVO, ESUN KU MIHO PREIS

Resultado di e komparashon di preis ta mustra botika Novo komo e botika ku mas tantu produkto na mihó preis. Huntu ku botika Novo e otro botikanan ku tambe a skor bon ta Botika Groot Piscadera i Botika Cerrito. E tres botikanan aki ta konosí pa nos kaba komo e botikanan ku usualmente ta skor mas mihó den nos komparashon di makutu di botika.

No opstante di esaki, fundashon ke resaltá ku botikanan ku ta afiliá na  Vereninging Samenwerkende  Apothekers ta duna e konsumidó ku ta miembro òf tin nan karchi di miembresia un deskuento di 10% na kada kompra. Konsekuentemente e deskuento aki tambe por influenshá preis di e produktonan den nos makutu di botika. P’esei ta importante pa kada konsumidó buska i konsultá nan tabèl  di produkto pa asina nan ta mihó informá i por saka mihó probecho di nan sèn.

Tambe ta importante pa remarká ku mayoria di e produktonan ku ta wòrdu bendí den nos botikanan, ku eksepshon di remedi, ta produktonan ku bo ta haña tambe den supermerkadonan. Tene kuenta ku esaki i semper konsulta bo lista promé ku hasi bo kompranan.

Pa fasilidat di nos konsumidónan Fundashon a pone tur e produktonan ku nan preisnan den un tabèl pa asina e konsumidó por haña un bista mas amplio i kla na kua botika e produkto en kuestion ta mas barata i e botika ku tin e produkto mas karu. Tur interesado ku kier haña kopia di e tabèlnan aki por pidi esaki via nos email: info@fundashonpakonsumido.org òf por pasa tambe na nos ofisina na de Ruyterkade 53.

Pa download e tabelnan klik aki.

Por último Fundashon ke informá komunidat ku nos lo sigui vigilá desaroyo di preisnan riba merkado lokal pa evitá spekulashon ku preis pendiente un posibel oumento di OB. Nos ke sigui hasi un apelashon riba nos konsumidónan pa nan informá nos di kualke iregularidat ku nan topa kuné riba merkado.

Atentamente,

Fundashon pa Konsumidó

Anotashon di preis Makutu di Botika 2012

Botika Groot Piscadera komo esun ku mas tantu produkto na mihó preis.!

Komparashon di preis di botika ta mustra Botika Groot Piscadera komo esun ku mas tantu produkto na mihó preis.

Fundashon pa Konsumidó resientemente a hasi un komparashon di preisnan den botikanan riba nos isla a base di un makutu pre-selektá. E anotashon di preis a tuma lugá entre 26 sept -2 òktober 2012. A kompará preis di un kantidat di 73 produkto. A repartí e produktonan den 17 kategoria. E gruponan ta entre otro awa pa higiena pa boka, pasta di djente, habon pa baña, gel pa baña kuné, puiru, deodorante, toaya femenino, pomada, body lotion, shampu/conditioner, relaxer pa kabei i pintura. A kontrolá tambe palitu pa limpia orea, katuna, remover pa uña, zalf pa kurpa, tambe habon pa man, krema pa feita i tambe splash lotion.

A kompará preis den tur botika riba nos isla, ku eksepshon di botika Antillana.

 

BOTIKA GROOT PISCADERA, ESUN KU MIHO PREIS

Basá riba e resultado di e komparashon di preis, Botika Groot Piscadera a resultá e botika ku na momentu di e kontròl, tabatin 30 produkto di nos makutu di 73 produktonan pre-selektá, na un preis mas ekonómiko. Huntu ku Botika Groot Piscadera, Botika Novo i Botika Cerrito ta e otro 2 botikanan ku un biaha mas ta skor mihó den kantidat di produkto na un preis mas ekonómiko.

Mirando ku e tres botikanan aki ta kai bou di mesun mando, i ta kumpra huntu i na kantidat grandi, nan ta en e posibilidat di ofresé e konsumidó un mihó preis. Bo por nota ku den hopi kaso nan preisnan ta mas ekonómiko ku sobra botikanan i e preisnan entre nan mes no ta varia mashá. Konsekuentemente no tin masha kompetensha entre nan mes!

VARIASHON DI PRODUKTO

Pa loke ta surtido, Botika Gosie a skor e biaha aki komo e botika mihó surti ku 60 di e 73 produktonan di nos makutu pre-selektá, sigui pa botikanan Zuikertuintje ku 59 i Groot Piscadera ku 58 produkto.

Un punto notabel ku Fundashon a konstatá ta ku na momentu di e anotashon di preis aki, diferente botika tabata falta un gran parti di e produktonan ku Fundashon a investigá. Por ehèmpel na botikanan Banda Bou i de Goede Hoop, e konsumidó ku lo a deseá di kumpra e produktonan di nos makutu pre-selektá, lo a sali sigur desapuntá.

Nos ke remarka aki si ku algun botika a indiká ku ta na komienso di luna nan ta hasi pedido di produkto, pues por surgi ku dado momentu nan stòk ta agotá ku konsekuensha ku por surgi e impreshon ku e botika ta bashí.

KON NOS BOTIKANAN TA SKOR?

Si nos kue por ehempel Botika Groot Piscadera (i den sierto kasonan tambe botikanan Novo i Cerrito) nos ta nota ku e botika aki ta skor bon tantu na preis komo surtido den e kategorianan di pasta di djente, pomada, shampoo i rinse i tambe crema pa feita.

Algun ehempel:

  • Un Colgate Whitening di 119gr. ta kosta na botika Groot Piscadera fl. 6.40, ku ta entre fl. 0.25 i fl. 2.20 mas barata ku otro kompetidornan.
  • Un potchi di pomada Zambesi Herbal Growth di 5.5 oz. ta kosta na e botika aki fl. 10.60, siendo na mayoria otro botika e mesun produkto aki ta kosta entre fl.11.00 pa fl. 13.20.
  • Un  crema di feita Magic with Aloe and vitamine E di 4.5 oz. ta kosta na Botika Groot Piscadera fl. 5.45, siendo na otro botikanan e preis ta varia entre fl. 6,80 te ku fl. 9.73.
  • Den kategoria di shampoo i rinse, di e 6 produktonan ku nos a investigá, Botika Groot Piscadera tabatin 5 di e produktonan, i tur e tabatin na e miho preis kompará ku otro botikanan.

Asina tin un kantidat mas di diferenshanan den preis, prinsipalmente debí ku aki ta trata produktonan aki no ta mara na un preis máksimo stipulá dor di Gobièrnu. Pa tal motibu Fundashon pa Konsumidó ta keda strès e importansha di kana kompará preis i oferta promé ku kumpra, voral den tempunan aki kaminda preisnan ta subi tur dia.

Pa duna mihó informashon na nos konsumidónan Fundashon pa Konsumidó konstantemente ta evaluá su lista pa asina yega na unu ku tin e produktonan mas bendí, mas usá i mas kumprá dor di nos konsumidónan. Akinan nos ke bolbe aksentuá ku e análisis di e komparashon di preis aki ta pa duna komunidat un indikashon di e preisnan riba merkado.

Pa tur konsumidó ku ke sa desaroyo di preisnan den e diferente botikanan, Fundashon pa Konsumidó a pone tur e produktonan den un tabèl pa asina e konsumidó por haña un bista mas amplio i kla di e botika kaminda e produkto ta mas barata i esun ku tin e produkto mas karu. Tur interesado ku kier haña kopia di e tabèlnan aki por pidi esaki via nos email: info@fundashonpakonsumido.org òf por pasa tambe na nos ofisina na de Ruyterkade 53.

Fundashon pa Konsumidó

/sites/default/files/files/Prijsvergelijking Botika sept_ 2012(1).xls

Anotashon di preis di Artikulonan di skol 2012

Anotashon di preis artíkulonan eskolar 2012.

Tene kuenta ku tin un variedat grandi di artíkulonan eskolar riba merkado lokal. Pa evitá konfushon i frustrashon semper kompará preis, kalidat, garantia i oferta promé ku kumpra. Tambe paga èkstra tinu  riba funshonalidat di e artíkulonan.

Fundashon pa Konsumidó resientemente a hasi un inventarisashon di artíkulonan eskolar den e prinsipal establesimentunan ku bende artíkulonan pa skol.
Tene kuenta ku esaki no ta un komparashon di preis ya ku tin un kantidat grandi di marka i modèl loke ta hasi difísil pa kompará preisnan.
Mirando ku ainda tin hopi mayor pendiente pa kaba di hasi nan kompranan pa e aña eskolar entrante, nos tin sigur ku e anotashon di preis aki lo sirbi komo un guia pa kada mayor hasi nan eskoho di un forma konsiente i kritiko. Aki ta di aploudí ku skolnan a bira ta  duna e alumno na final di aña un lista di artíkulonan ku nan lo bai tin mester, loke sigur lo fasilitá tur mayor pa kumpra loke ta realmente  nesesario.
Pa e okashon aki Fundashon pa Konsumidó a nota preis di un kantidat di artíkulo ku ta varia for di un gùm i pèn te na un agènda i tas. E establesimentunan ku nos a bishitá ta: Samsom, Casa Cesar, Bruna, Building Depot, Office Stop, Martis Agencies, Curaçao Office Supply, Mensing Caminada, e 3 filialnan di Señor Barata i Multi Centrum 2000. Dovester i La Curaçao no a partisipá den e anotashon aki, ya ku na momentu di e akshon aki, ainda nan kònteiner di artíkulonan di skol no a drenta.
Pa Back to school; eskoho de sobra.
Durante añanan Fundashon pa Konsumidó a  konstatá ku tin un variashon grandi di artíkulonan eskolar riba merkado. Bo por haña  produktonan trahá na diferente pais, ku diferensha den kalidat, kantidat i tamaño. Tin tambe produktonan di markanan konosí, marka deskonosí i den sierto kasonan asta artíkulonan sin marka. Importante ta pa kada konsumidó tene kuenta ku e akshonnan básiko nan momento di kompra, esta kompará preis, kalidat, oferta, i tene kuenta ku funshonalidat di e artíkulonan promé ku kumpra. Tur esakinan ta hasi e proseso di kompará preis promé ku kumpra un poko difísil. P’esei ta rekomendabel pa bo tin un bista adelantá  kiko presis e alumno lo bai tin mester.
Importante ta tambe pa skohe artíkulonan eskolar segun e mucha su edat i nesesidat. P.e. un kalkuleitor sientífiko ta di gran utilidat pa un alumno di skol sekundario. E mucha na skol básiko por yuda su mes ku unu mas simpel.
Paga tinu riba durabilidat di un artíkulo. Invertí den artíkulonan ku e mucha por bai basta tempu kuné. Siñ’é tambe ku e mester kuida su kosnan.!
Un tep pa mayor i yu: bishitá e diferente establesimentunan ku ta bende artíkulonan eskolar huntu, shòp around, interkambiá di idea pa asina boso por skohe mas konsiente i keda satisfecho ku bo a haña e mihó deal.

Pa fasilidat Fundashon pa Konsumidó a pone tur e diferente artíkulonan den un tabèl, di moda ku kada konsumidó por haña un bista mas amplio di e surtido i preis ku e diferente establesimentunan ta ofresé pa “Back to School”. Por pidi esaki via email: info@fundashonpakonsumido.org of por pasa tambe na nos ofisina na de Ruyterkade 53.

Atentamente,
Fundashon pa Konsumidó

Anotashon di preis di Artikulonan di skol 2012

Fundashon pa Konsumidó komparando preis:

Alves Supermarket e supermerkado mihó surtí

Resultado di komparashon di preis a base di un makutu preselektá
Fundashon pa Konsumidó den luna di aprel un biaha mas a hasi un komparashon di preisnan den supermerkadonan riba nos isla a base di un makutu preselektá. E komparashonnan a tuma lugá di 24 te ku 27 di aprel 2012. A kompará preis di un kantidat di 79 produkto. E produktonan a ser repartí den 30 kategoria. E gruponan ta piska, karni, berdura, fruta, belèg, kos di hunta riba pan, bonchi, maishi, sòpi den bleki, spaguèti i makaroni, aros, hariña pan, zeta, pasta di tomati, suku, te, kòfi, corn flakes, sereales, djus, limonada na stropi, apelmoes, tuna i oester den bleki, pasta di djente, habon pa baña, ferbant di luna, habon di laba tayo, blich i papel higiéniko.

For di nos análisis Alves a resultá e supermerkado mihó surtí, ku un total di 75 produkto den rèki na momentu di nos komparashon, sigui pa Mangusa Hypermarket ku 70 i Arco Iris ku 68 produkto for di nos makutu preselektá.

PREISNAN VARIÁ
Un análisis di e komparashon di preis aki ta mustra ku tin un diferensha grandi den preis di produktonan di karni, piska, fruta i berdura. Fundashon pa Konsumidó ke remarká ku den e kategorianan aki a kompará solamente preis i no marka, kalidat òf pais di orígen. Tene esaki na kuenta ora ta kumpra produktonan manera karni, piska, fruta i berdura.  Pa loke ta fruta i berdura, preis di plum i papaya i tambe preis di siboyo (kòrá i blanku) i tomati, ta varia hopi. Di otro banda si nos kompará e preisnan di papaya awe ku e preisnan na mart 2012 nos ta nota ku preisnan no a kambia mashá den e último 2 lunanan.

Otro produkto ku Fundashon pa Konsumidó a nota ku su preisnan ta varia den nos diferente supermerkadonan ta Corn flakes, un produkto ku no por falta kaminda tin mucha.  Preis di e empake di 12.3oz. ta varia entre fl. 4,69 na Albert Heijn te ku fl. 7,60 na San Pedro. E empake di 17.6oz. ta varia entre fl. 5,69 na Bon Bini te ku fl. 9,75 na San Pedro. Ripará ku San Pedro su Cornflakes chikí ta mas karu ku Bon Bini su Corn Flakes grandi.

Pa por haña un mihó idea di preisnan i unda ta mas ekonómiko pa kumpra, Fundashon pa Konsumidó a kompilá un lista di produktonan ku e seguidamente supermerkadonan tin na miho preis.

Centrum Mahaai: pòrchòp (pa kilo) fl. 8,60, promèntòn bèrdè (pa kilo) fl. 4,95, banana pa hasa (pa kilo) fl. 2,95, mandarein (pa kilo) fl. 3,75, keshi Jong Belegen slais (pa kilo) fl. 18,55, turkey ham  (pa kilo)
fl. 10,18, schouderham (pa kilo) fl. 12,16, Peanut Kids, pindakas creamy (12oz) fl. 4,04, Patillia Chocolade Pasta Nut (400gr) fl. 4,07, Jam La Constancia Pineapple (300gr) fl. 3,27, S&W Red Kidney Beans den bleki (432gr) fl. 2,96, Monarch maishi den bleki (432gr) fl. 1,96, Wesson Canola Oil (48gr) fl. 7,80, La Constancia tomati pasta (500gr) fl.  3,44, Sun Quick Tropical (330ml) fl. 3,64, Santa Rita tuna den bleki (170 gr) fl. 1,26, Dr Tichenor’s Tandpasta (181gr) fl. 8,66, Palmolive Badzeep (110gr) fl. 1,61, Lux Badzeep (125gr) fl. 1,17, Fresca Afwasmiddel (125gr) fl. 3,76, Tempo afwasmiddel (64oz) fl. 6,33,
Tempo bleekmiddel (64oz) 2.33.

Bon Bini: Batata dushi kòrá (pa kilo) fl. 3.95, Banana pa hasa (pa kilo) fl. 2.95, Jam la Constancia Pineapple (300gr) fl. 3.27, S&W,red kidney beans den bleki (432gr) fl.2.96 , Continental sopa de fideos den paki (107gr) fl.2.47, Honig macaroni elbow (250 gr)fl. 1.27, Vigo Olive Oil 100% pure (250 ml) fl. 5.65, La Contancia Tomati pasta (500 gr) fl. 3.44, Hardon Thee (25 pida) fl. 1.98, Original Kellog’s Corn Flakes USA  (17.6oz) fl. 5.69, Gloria Orange (1 ltr) fl. 2.25, Baggio Pronto Peer (1 ltr) fl.2.07, Hak Appelmoes (360 gr) fl.2.59, Santa Rita Tuna den Bleki (170 gr) fl.1.26, Roland Oester den Bleki (8oz) 5.26, Softex Toiletpapier (12 pida) fl.8.48, Noky Toiletpapier (12 pida) fl.6.55.

Alves: Batata dushi kòrá (pa kilo) fl.3.95, Banana pa hasa (pa kilo) fl.2.95, Jam la Constancia Pineapple (300gr)fl.3.27, S&W,red kidney beans den bleki (432gr) fl.2.96,Continental sopa de fideos den paki(107gr) fl.2.47, Honig macaroni elbow (250 gr) fl.1.27, Vigo Olive Oil 100% pure (250 ml) fl.5.65
La Contancia Tomatipasta (500 gr) fl.3.44, Hardon Thee (25 pida)fl.1.98, Original Kellog’s Corn Flakes USA  (17.6oz) fl.5.69,Gloria Orange (1 ltr) fl.2.25, Baggio Pronto Peer (1 ltr) fl.2.07, Hak Appelmoes (360 gr) fl.2.59, Santa Rita Tuna den Bleki (170 gr) fl.1.26 , Roland Oester den Bleki(8oz) fl.5.26, Softex Toiletpapier (12 pida) fl.8.48, Noky Toiletpapier (12 pida) fl.6.55.

Fundashon pa Konsumidó a kompará tambe preis di produktonan na supermerkadonan di mesun nòmber. Resultado ta mustra ku si bo kumpra nos makutu preselektá na Centrum Mahaai e ta sali bo mas ekonómiko ku na Centrum Piscadera. Di otro banda, na supermerkadonan Mangusa no tin muchu variashon.

Pa tur esnan interesá Fundashon pa Konsumidó a pone tur e produktonan den un tabèl di moda ku kada ken por haña un bista mas amplio i kla di diferente preisnan den nos supermerkadonan lokal. Tur interesado ku kier haña kopia di e tabèlnan aki por tuma kontakto ku ofisina di Fundashon pa Konsumidó na 462-666 òf por mail nos na info@fundashonpakonsumido.org. Por download e tabèlnan tambe via nos websait fundashonpakonsumido.org.

Mirando kon e preisnan ta den e diferente supermerkadonan, Fundashon pa Konsumidó ta konsehá tur konsumidó pa semper kompará preis, kalidat i servisio promé ku kumpra. Traha bo lista di kompra di bo supermerkado favorito i kompará esaki ku un otro supermerkadonan pa bo tin idea kuantu lo bo por spar òf gasta mas si bo varia di supermerkado.  Atraves di e análisis aki, nos ke yuda e konsumidó pa mihó posibel asumí su responsabilidat komo konsumidó konsiente i kumpra loke ta kombin’é i loke ta nesesario.
Komparashon di preis april 2012

Dia di Mama

Aki ta sigui algun rekomendashon pa tene kuenta kuné espesialmente den e temporada aki:

• Lesa tur foyeto ku ofertanan bon promé ku kumpra
• Paga bon tinu riba komersiantenan ku ta trata na tur forma di konvensé bo pa kumpra un produkto i hasi palabrashonnan ku nan no por kumpli kuné
• Eksigí pa tur palabrashon ta riba papel, preferiblemente riba bo bòn
• No laga niun bendedó pone bo kumpra kosnan ku bo no mester
• Eksigí pa bo haña bon informashon riba un produkto manera p.e. fasilidatnan pa bo por hasi un bon eskoho
• Kontenido di un empake mester indiká klaramente ki produkto tin aden, si esaki no ta e kaso mester por habri i kontrolá esaki promé ku bo kumpr’é
• Asina abo komo konsumidó bai di akuerdo riba un preis, bo a sera un kombenio di kompra. Si mayan bo topa e mesun produkto pa un mihó preis, bo no por reklamá mas.
• E preis ku tin riba e rèki òf produkto ta esun ku bo mester paga, si tin diferensia na kaha, e preis aki ta robes
• Paga tinu ora di firma pa risibí un produkto, pasombra tin ora bo ta firma tambe pa e kondishon di e produkto, o sea si e ta den bon estado; Dor ku bo no por a kontrolá esaki pone riba e papel, ku bo ta firma solamente pa risibí e produkto
• No lubida ku e komersiante mester haña oportunidat pa drecha un produkto ku daña den un tempu hopi kòrtiku. Si reparashon no ta posibel bo tin derechi riba mesun otro produkto
• Warda tur bòn bon, nan ta prueba di pago; Kontrolá semper si tur kos ta poné ariba, manera preis i garantia
• Kambia un produkto pa un otro tipo produkto, no ta un derechi sino un prerogativa dje komersiante; Si e produkto ta kibrá ta un otro kos, e mester kambi’é;
• Ora un produkto no ta por drecha mas, i e komersiante no por duna bo un meskos, bo tin derecho riba bo sèn bèk
• Semper bo por pidi pa haña un preis mas faborabel; Kòrda ta negoshá bo ta negoshá, e komersiante por ninga òf aseptá bo oferta pa un preis mas barata
• En prinsipio si bo bai di akuerdo ku un solushon pa un konflikto bo no tin mag di kambi’é  mas, pero semper bai bo por purba bo suerte si.
• Kliente ta Rei: si bo no ta kontentu ku un produkto òf e preis no kumpr’é pa laga e komersiante komprondé ku ta abo ta Rei.

Fundashon ke deseá tur mama un dushi dia riba nan dia.

LEI MATERNIDAT KU YEN BENEFISIO P’E MAMA

E lei di maternidat ta kla, esaki despues di un trayekto largu ku a tuma hopi tempu. Dia 6 di aprel e lei a keda publiká, pues por bisa ku e lei ta den funshonamentu. Eunice Eisden di MAN a bini ku kambio den e lei di maternidat. Esaki ta loke minister Hensley Koeiman a duna di konosé.

Relashoná ku funshonamentu di e lei, djaluna 14 di mei di 7’or pa 9’or anochi lo duna splikashon dje lei na Biblioteka Públiko. E lei no ta bai ku forsa retroaktivo.
E kambionan ta relashoná ku verlòf p’e mama.

Por repartí e simannan di embaraso promé i despues. Antes tabata 6 siman promé i 6 siman despues, pues 12 siman. E kambio di lei ta ku 14 siman. Aworaki e mama por disidí ku for di dos siman promé ku parto e por baha ku verlòf i tuma e 12 simannan despues di parto.
Un doño di trabou no por hasi distinshon/ deskriminashon entre hende hòmber i hende muhé. Pues nan tin di haña pago igual, treinen etcetera.

Ta prohibí pa durante kombersashon di solisitut ku e dunadó di trabou ta pidi e dama pa bini ku prueba ku e no ta embarasá. Si keda probá ku esaki a tuma lugá, e desishon ta keda nulofiká i e doño di trabou tin di tuma e damita na trabou. Si no t’asina e trahadó por kuminsá kaso den korte, kaminda e dunadó di trabou ku prueba tin di mustra ku tabatin motibunan bálido pa kita e hende for di trabou.
Ta prohibí pa obligá e dama di traha 8 siman promé ku parto, oranan di warda, esta anochi. Tambe ta prohibí pa na 12 siman di embaraso e dama para traha mas ku 1 ora riba pia.

Despues di parto e doño di trabou tin di duna e mama algun ora bou di ora di trabou pa kuida su yu, esta pa bai dun’é lechi òf pa por kolf lechi na trabou.
No por retirá e mama ora e ta na estado.
Pa loke ta trata e hende hòmber, minister Koeiman a indiká ku esaki ta haña sobrá verlòf di e mama, si den kaso e mama keda hospital i/òf e mama fayesé ora di parto.

Esaki ta e puntonan esensial dje lei. Tur esnan ku ke un kopia dje lei por yama e ministerio di minister Koeiman 461-0017. Tambe e lei lo bai pa VBC, Parlamentu i Kámara di Komersio.

OJO Suministro di gas ta delikado

Komo konsumido Konsiente:

  • Marka riba e cilender di gas dia ku bo ta habri esaki
  • Purba di balotá mas o menos kuantu tempu bo gas ta dura, pa bo por bestel un nobo na tempu
  • No warda ora bo gas kaba pa bo bestel un otro!!!!

Entrega di gas for di Refineria Isla na Curgas ta delikado despues ku Refineria Isla a keda konfrontá ku problemanan na momentu di entrega di gas na Planta di Gas di Curgas pa falta di stom i airu komprimí ku a afektá e produkshon di gas for di CD-3.

Un paro di suministro di gas for di Refineria Isla tin un impakto direkto riba e servisio ku Curgas ta brinda na komunidat di Kòrsou i Boneiru. Konsekuensia di esaki ta hasi yenamentu di silinder di gas riba e planta di Curgas i e bulk trùk ku ta yena silinder komersial imposibel.

30 di aprel tabata e último fecha ku LPG Plant di Curgas a risibí gas riba un fluho normal. Entrante 6 di mei Curgas a kuminsá risibí gas riba un base “slow” for di CD-3 (Crude Distiller Unit 3) di Refineria Isla. E kantidat di gas ku Curgas risibí ta wòrdu repartí entre klientenan doméstiko i komersial na Kòrsou i na Boneiru.

Asina e situashon normalisá i Curgas risibí gas di Refineria Isla, por kuminsá yena silinder i prepará distribushon di gas pa uso doméstiko i komersial na Kòrsou i Boneiru manera kustumbrá i sigui ku e kampaña di entregá gas den wikènt tambe.

Mas Kompetensha

Mas Kompetensha

Lei di Kompetensia na benefisio di abo konsumidó  

Na 2011 gobièrnu di Kòrsou ku sosten di USONA a start e proyekto pa yega na un Lei di Kompetensia,  òf asina yamá  “Mededingingswet”.   Meta di e lei ta pa yega na un instituto spesialista i outónomo ku ta enkargá ku mantenshon di leinan ku ta kombatí opstrukshonnan ku ta impedí kompetensia sano  i ta promové kompetensha riba nos merkado ekonómiko .

federal-trade-commission-ftc-logo.png

Consumentenautoriteit-waarschuwt-voor-verkoopdemonstraties-tijdens-busreisjes-35695_image.jpgRònt mundu ta eksistí un outoridat independiente ku ta salvaguardá un merkado nashonal sano, kompetitivo i honesto. Merka konosé Federal Trade Commission, Hulanda tin un Consumentenautoriteit i den Karibe, Jamaica, Barbados  i otro islanan hopi tin un organisashon outónomo ku ta sòru pa transakshonnan entre ami i abo konsumidó i komersio bai na un manera honesto i transparente.

 

logo.jpgDikon un Outoridat di kompetensia?

Pa un merkado ta den balanse e mester ta habrí i liber pa unu i tur por partisipá. Tur ku ke subi e merkado mester por haña akseso liber, bou di kondishonnan transparente, pa tambe por kompetí i bende su produkto . Tambe ta importante pa no tin palabrashonnan entre (asosashonnan di) komersiante ku ta stroba kompetensha habrí i sano. Den un merkado kompetitivo tampoko tin konsentrashon di poder seka un kompania, empresa òf komersiante, kaminda esun ku ta mas grandi por hasi uso di su puesto pa saka kompetidónan for di merkado. Fushon di kompanianan den mes un sektor no por pasa sin wòrdu investigá dor di un outoridat imparsial.

Un di e motibunan prinsipal pa introdukshon di un Lei di Kompetensha den otro paisnan tabata ku komersiantenan ta sera kabes i pone ku no tin variedat di preis i produkto, ku konsekuensia ku e mesun produktonan tur kaminda ta wòrdu bende na kasi mesun preis.

Fundashon pa konsumidó, ku ta un instansia independiente ku ta protehá derechinan di abo konsumidó, a partisipá den e grupo di trabou ku a presentá e proposishon di lei, asina yamá, “Ontwerp Landsverordening inzake Concurrentie”, òf “Mededingingswet” pa introdusí aki na Kòrsou un Outoridat di Kompetensha pa evitá ku komersiantenan por será kabes i limitá eskoho di e konsumidó.

Kiko ta e ròl di e Outoridat di kompetensia?

E Outoridat di Kompetensha tei pa evitá ku tres kos ku por pasa:

  • ku komersiantenan por palabrá mesun preis pa diferente produkto ku ta subi merkado;
  • ku komersiantenan ta hasi mal uzo di poder, dor ku nan ta mas grandi i tin kaba parti grandi di merkado den nan man, i stoba otro komersiante nan di funshoná optimal;
  • ku kompanianan ta uni i bira un negoshi mas grandi i mas fuerte kitando e opshon di eskoho di e konsumidó.

E tres puntonan aki ta opstákulonan pa kompetensha habri i sano riba merkado.

Kiko ta kompetensha?

Kompetensha riba merkado ta nifiká ku empresanan ta kompetí ku otro pa bende nan produkto ku nos. Kompetensha riba merkado ta kondusí na un preis mas abou. Resultado di kompetensha riba merkado ta ku e komersiante mester hasi su produkto òf servisio mas atraktivo posibel dor di baha preis i mehorá kalidat di su servisio pa e por atraé e konsumidó komo kliente. Riba merkado di telekomunikashon, por ehèmpel, ya nos a mira efektonan di un merkado habrí kaminda preis di internèt a baha i spit a subi konsiderablemente. Esaki solamente pasombra banda di e úniko provedó ku tabata UTS a bini mas kompania ku ta ofresé e mesun servisio. Pues benefisionan di kompetensha riba merkado ta entre otro mihó kalidat pa preis i mas eskoho di produkto i servisio.

Mihó kalidat

Abo konsumidó ta kumpra un produkto òf hasi uso di un servisio mas lihé i fásil si bo sa ku esaki ta di bon kalidat. Mehoramentu di kalidat por enserá produkto ku durashon mas largu òf ku ta traha mas mihó i tambe mihó trato pa e konsumidó òf kliente i mihó servisio i asistensia tékniko. I sigur e komersiante lo atendé un keho na un manera hopi mas nechi i mihó si e sa ku e tin chèns di pèrdè kliente i entrada.

Mas eskoho

Pa un komersiante su produkto òf servisio bende, e mester siña distinguí su mes for di e otro komersiantenan. Esaki por kondusí na un oferta mas amplio i varia. Tambe e lo invertí mas den inovashon i bini ku produkto i servisio ku ta duna nos oportunidat  pa skohe a base di mihó preis i/òf kalidat.

E ròl di abo konsumidó den esaki

Por ta difísil pa kere, pero abo komo konsumidó tin un posishon hopi klave den esaki. Pa medio di bo eskoho di e produkto bo ta yuda e komersiante sa den ki direkshon e tin ku amplia su produkto. Loke e no ta bende e no ta kumpra. Òf e ta baha preis si e ta bende muchu karu. Keda sin kumpra ta e poder mas grandi ku nos komo konsumidó tin. Ehersé esaki i e resultado ta ku e komersiante ta hañ’é obligá na adaptá su komportashon.

I pa medio di sigui e desaroyo nan e komersiantenan mester por brinda e konsumidó  kompetensha sano dus mas demanda, mihó kalidat, mas inovashon i preisnan mas abou.

E Lei di Kompetensha  na e momentunan aki ta wòrdu tratá den Konseho di Minister. Fundashon pa Konsumidó lo bringa pa mas pronto posibel aprobá e lei aki i kuminsá ku su implementashon.

DIA DI LABOR 1-5-2012

DIA DI LABOR 1-5-2012

 

“E trabou mas importante no ta pa kambia mundu, pero pa kambia nos mes”

Papa Juan Pablo II

Ta ku trabou duru i dedikashon so nos por logra di krese, madurá i bira kada dia di nobo mihó yunan di Kòrsou trahando huntu na bienestar di nos komunidat.

Felis dia di labor di parti di direktiva i personal di Fundashon pa Konsumidó  

Download for di nos website: "Manual di presupuesto"

Download for di nos website: “Manual di presupuesto”

Download e foyeto “Manual di presupuesto” for di nos website.
Klik aki pa download e foyeto of bishita nos sekshon di “Publikashonnan”.

Transporte eskolar, kòrda apliká

Fundashon pa Konsumidó ke rekordá tur mayor ku tin yu ta bai sea skol básiko, skol avansá of skol speshal i ku ta kumpli ke kriterionan athunto, pa kòrda apliká pa transporte eskolar. Transporte eskolar ta un fasilidat ku Gobièrnu a krea pa aliviá e echo ku no tin sufisiente skol na alkanse di un i tur. Pa tal motibu Fundashon pa Konsumidó ta konsehá tur mayor, ku ta kumpli ke kriterionan ku ta wòrdu apliká, pa hasi uso dje oportunidat aki i apliká pa bo yu tambe bini na remarke.

No laga pa esaki ta un motibu pa bo yu keda sin bai skol. Kòrda ku tur mucha bou 18 di tin derecho di ta na skol segun e lei di enseñansa obligatorio. Nos sa di muchu kaso kaminda esnan ku tin moda, pero ku ta kai net den e grens dje kriterionan si ta hasi uso dje oportunidat aki i esnan ku echt tin mester ta mis de bus (letterlijk) dor di no ta konsiente dje posibilidatnan aki.

Ki ora un alumno ta bin na remarke pa hasi uzo di Transporte Skolar?
E siguiente reglanan ta aplikabel pa bini na remarke pa transporte eskolar.

Kriterio 2011-2012

  1. E alumno mester ta kai bou di lei di enseñansa obligatorio i mester ta bishitá un skol ku ta supsidiá pa gobièrnu, ku eksepshon di e alumnonan ku no ta kai bou di enseñansa obligatorio, ku ta bishitá un skol di VSBO òf HAVO/ VWO i no tin un diploma di enseñansa avansá.
  2. Esnan responsabel pa e alumno (mayor, tutor) tin un entrada brutu di ménos ku NAƒ 3335,-pa luna, anto nan por prueba esaki.
  3. Mayornan ku ta kue job i no tin un entrada fiho mester presentá ku un papel di impuesto (verklaring di belasting).
  4. Solamente esnan responsabel pa e alumno por hasi petishon pa transporte.
    Den kaso ku un tutor bin hasi petishon, e mester bin ku dokumento ofishal for di kua por verifiká ken ta tutor di e alumno.
    Den kasonan ku pa motibunan soshal bálido, esaki na huisio di e “leerplichtambtenaar”, esnan responsabel pa alumno no por bin inskribié lo inskribí e petishon tòg.
  5. Alumnonan ku ta bai SBO/HAVO/VWO ta bin na remarke pa transpòrt supsidiá na momento ku nan no ta haña un finansiamentu di estudio ku eksepshon di esunnan ku nan mayornan ta kobra ònderstant. Nan mester kumpli ku tur otro kriterionan.
  6. Si e skol ku e mucha ta bishitá ta un skol básiko speshal (Mytyl, LOM, MLK, ZMLK), òf un skol avansá speshal.
    Den kaso ku e mucha ta bishita AGO, ku ta un parti di VSBO, lo apliká e reglanan ku ta apliká pa ‘regulier onderwijs’. Esaki kier men tur enseñansa supsidiá dor di gobièrnu
  7. Durante di e aña den kua un mucha ta bishitá un “schakelklas”, kaminda e distansha ta mas ku tres kilometer for di su kas.
  8. Si e mucha ta biba den “Tweede òf Derde District”, i e skol di fundeshi òf skol básiko di mas serka ta keda na un distansha di mas ku 3 (tres) kilometer for di su kas.
  9. Si e mucha ta bai un skol avansá di un tipo ku no tin denter di 3 (tres) kilometer for di su kas.
  10. Den kaso ku no tin skol òf no tin lugá pa e mucha na un skol denter di 3 (tres) kilometer for di su kas, e por haña transporte pa e promé skol pafó di e tres kilometernan. Mester presentá ku un deklarashon di e skol(nan) ku ta bisa ku nan no tin lugá pa e mucha. E fecha di e deklarashon mester ta promé ku e fecha di inskripshon.
  11. Den kaso di kambiamentu di kas durante di aña eskolar, i e kas nobo ta keda mas ku tres kilometer for di su skol, temporalmente e mucha por haña transporte pa e por kaba e aña skolar na su skol bieu. Esnan responsabel pa e alumno mester por prueba e kambio di direkshon ku ‘papel ofishal di Kranshi’.
  12. Pa bin na remarke mayornan mester hasi un petishon na SAE. Pa e petishon mayornan ta entregá na SAE:
    • Karta di inskripshon nan e skol
    • Sédula di mayor/tutor
    • Prueba di entrada (di trabou òf ònderstant)
  13. SAE ta disidí riba e petishon i ta partisipá e desishon na mayornan via karta.
  14. Religion òf orientashon filosófiko no ta un motibu pa deskartá un skol primario, komo ku artíkulo 40 di Landsverordening Basisonderwijs, PB 1979 nr. 28, ta habri posibilidat pa un mucha bai skol primario serka di su kas ounke ku e skol no ta di su religion. Sin ku skol ta obligá e mucha di partisipá na aktividatnan ku ta bai kontra di prinsipionan religioso di e mucha i su mayornan.
  15. Religion òf orientashon filosófiko no ta un motibu pa deskartá un skol avansá, komo ku artíkulo 46 di Landsverordening Voortgezet Onderwijs, PB 1979 nr. 29, ta habri posibilidat pa un mucha bai skol avansá serka di su kas ounke ku e skol no ta di su religion. Sin ku skol ta obligá e mucha di partisipá na aktividatnan ku ta bai kontra di prinsipionan religioso di e mucha i su mayornan.

Den kaso ku mester di mas informashon Fundashon pa Konsumidó ta konsehá tur mayor pa tuma kontakto ku Servisio Asuntunan di Enseñansa, Bon Bini Business Center Schottegatweg Oost 10, na e telefònnan 732-4279 / 732-4319 / 732-4324.

Fundashon ta hasi un apelashon na tur mayor ku tin yu ku lo ta bini na remarke pa haña transporte eskolar, pa no lubidá di apliká pa esaki, pero kòrda semper si ku e responsabilidat pa un mucha yega skol i bai kas bèk ta di mayornan.

Na nòmber di Fundashon pa Konsumidó,

 

Marc Marshall

Kompania TDS a duna un kompensashon na konsumidónan

Finalmente e kompania TDS a duna un kompensashon na konsumidónan pa motibu teniendo kuenta ku último tempu konstantemente tabatin reklamo riba e señal di televishon ku e kompania ta suministrá na su konsumidónan. E  kompensashon aki ta enserá ku tur konsumidó sin eksepshon ta hañá durante un periodo definí, e posibilidat di sigui algun kanal èkstra ku TDS a pone na nan disposishon.

Pa Fundashon pa Konsumidó esaki ta nifiká ku e prinsipio a vense. Si komo produktor bo entrega un produkto òf servisio di kalidat inferior of no e loke e konsumidó a paga pe i òf a verwacht di haya, bo mester kompensá e konsumidó di un of otro forma.
Den kombersashon ku FpK tabatin ku representantenan dje kompania TDS, nos a mustra ku en prinsipio nos lo tabata kier a mira e kompensashon den forma di un redukshon riba kuenta di kada konsumidó, pero teniendo kuenta ku e romp slomp atministrativo ku esaki lo a trese kuné, nos ta kontentu tòg ku e loke e kompania a duna nos konsumidónan .

For di kuminsamentu Fundashon pa Konsumidó a remarka ku ta imposibel ku konsumidó tin ku akseptá sin mas ku pa motibu dje kambionan den e sistema, konsumidónan mester keda konforme un produkto defisiente. E punto importante pa Fundashon ta ke e kompania a rekonosé su responsabilidat i a aktua na benefisio dje konsumidó.

Por tin hopi diskushon riba enkuanto e forma ku a kompensá, pero pa Fundashon pa Konsumidó ta keda e punto importante ku e prinsipio a vense. Si e konsumidó tin un kontrato ku bo, bo mester kumpli na drechi kuné. I no pensa ku pasobra bo por ta den un posishon monopolistiko òf e konsumidó mester di bo, por trata ménos nechi ku esaki. E punto di bista aki ta konta pa tur kompania òf instansha ku ta duna servisio. Tene kuenta kon ta anda ku e konsumidó, paso si e servisio ta inferior, e por kosta bo kompania a lo largu plaka. Kòrda ku mal propaganda ta kosta!

Di otro banda Fundashon pa Konsumidó lo sigui konsientisá nos pueblo riba nan derechi debernan. Komo konsumidó bo tin e derechi di eksihí servisio optimal pero di otro banda ta bo deber di kumpli ku palabrashonnan hasi.
Den e aña noba aki Fundashon pa Konsumidó lo sigui vigilá e kalidat di servisio duna na nos pueblo i lo sigui hasi tur esfuerso pa garantisá ku negoshinan I kompanianan ta tene kuenta mas ku e interes di e konsumidó
Na number di Fundashon pa Konsumidó

Sr. Rene Trenidad
Kordinadó di ofisina

Color Skin

Header Style

Nav Mode

Layout

Wide
Boxed